8
Ka peggimu ne me talagpanubad ki Aarun wey te anak din
(Iks. 29:1-37)
1 Ne ingkahiyan te Magbebaye ne Manama si Muwisis,
2-3 “Dumaa nu si Aarun wey ka me anak din ne me lukes diye te gumawan te Balungbalung ne Temuwanan, wey libulunga nu ka langun ne kabuhalan ni Israil diye. Uyana nu naa ka igpasaluub te me talagpanubad, ka lana ne ig-itis te peg-urdina, wey ka turu ne baka ne igpanubad te peg-awe te sale. Ne uyana nu man‑e ka daruwa ne lukesan ne karniru wey senge-liyang ne paan ne ware patulin.”
4 Ne intuman ni Muwisis ka insuhu te Magbebaye ne Manama kandin. Te nalibulung e ka langun ne kabuhalan ni Israil diye te gumawan te Balungbalung ne Temuwanan,
5 migkahiyan e sikandan ni Muwisis, “Insuhu keddi te Magbebaye seini se eggimuwen ku.”
6 Ne dutu, impeendiyad e ni Muwisis te tangkaan si Aarun wey ka me anak din wey indihus din e sikandan.
7 Ne insaluuban din e si Aarun te egpekeiling te linayun ne malayat se belad, wey intaberan din wey insaluuban te binelaran ne kumbale. Insaluuban din pad man‑e te kumbale ne egngaranan te ipud wey impalilibed din e te libed ne in-ay-ayaran te eggimu.
8 Nataman, impakepkep e ni Muwisis te kumeng ni Aarun ka hagpi te kumeng ne due me burusa wey intahu din e dutu ka Urim wey ka Tumim.
9 Nataman, insalakayan din e si Aarun, wey intahuan din te malibusen ne balieg ne bulawan ka tangkaan te salakey eyew egkeila ne in-alam sikandin te Manama. Inggimu sika ni Muwisis su insuhu ma sikandin te Manama.
10 Ne ingkuwa ni Muwisis ka lana wey in-itisan din ka Balungbalung ne Temuwanan wey ka langun ne diye te seled, wey inhalad din e seeye.
11 Ne kapapitu rin itisi te lana ka altar ne tutunganan te igpanubad wey ka langun ne kasangkapan diye, ka pelenggana wey ka egpapinnuuwan kayi. Inggimu rin sika eyew te peghalad diye te Magbebaye ne Manama.
12 Ne in-itisan ni Muwisis te lana ka ulu ni Aarun eyew te peg-urdina kandin.
13 Ne impeendiye din e degma ka me anak ni Aarun te tangkaan te me etew wey insaluuban din te egpekeiling te linayun ne malayat se belad. Intaberan din degma sikandan wey insalakayan. Inggimu sika ni Muwisis su sika ka insuhu kandin te Magbebaye ne Manama.
14 Pegkapenga dutu, ingkuwa ni Muwisis ka turu ne baka ne igpalangesa eyew ig-awe te sale, wey indagket ni Aarun wey te me anak din ka palad dan diye te ulu te turu ne baka.
15 Nataman, inggimatayan e ni Muwisis ka baka wey ingkuwa rin ka langesa. In-eled din ka kemel rin te langesa wey impulitan din ka me sungey-sungey te altar, eyew egmalinis. Ne in-ule din ka nasame ne langesa diye te pabunsuranan te altar ne eg-unturan te egtutungen eyew iglinis te altar.
16 Ne ingkuwa degma ni Muwisis ka langun ne tabe ne diye te getek, ka atey ne indeketan te tabe, ka me iihian wey ka tabe kayi, wey intutung din diye te altar.
17 Piru ka nasame ne baad te turu ne baka, iling te laplap, te sapu, wey te bituka, diye din tutunga te lihawangan te kampu sumale te insuhu kandin te Magbebaye ne Manama.
18 Nataman, impakuwa ni Muwisis ka an-anayan ne lukesan ne karniru eyew igpanubad ne egtutungen, wey indagket ni Aarun wey te me anak din ka belad dan diye te ulu te lukesan ne karniru.
19 Ne inggimatayan ni Muwisis seini wey inlingut din isawig ka langesa diye te me kakiliran te altar.
20-21 Insapu din ka karniru wey inlu‑luan din ka langun ne diye te getek wey ka me paa. Nataman, intutung din e ka langun diye te altar, lagkes ka ulu wey ka me tabe eyew igpanubad, wey meemut ka lansi due diye te Magbebaye. Inggimu seini ni Muwisis sumale te suhu te Magbebaye.
22 Ne impakuwa ni Muwisis ka ikarangeb ne lukesan ne karniru ne igpanubad para te peg-urdina. Ne imparagket ni Aarun wey te me anak din ka belad dan diye te ulu te lukesan ne karniru.
23 Ne nataman, inggimatayan e ni Muwisis ka karniru wey migkuwa sikandin te langesa wey impulit din diye te sesel-ayan te igkakawanan ne talinga ni Aarun wey diye te timbebakal te igkakawanan ne belad din wey te paa rin.
24 Nataman, impeendiye degma ni Muwisis te tangkaan ka me anak ni Aarun wey impulitan din degma ka sesel-ayan te igkakawanan ne talinga ran wey te timbebakal te igkakawanan ne belad wey te paa ran. Nataman, inlingut din isawig ka duma ne langesa diye te altar.
25 Ne ingkuwa rin ka me tabe, ka malambu ne ikug, ka langun ne tabe ne diye te getek, ka atey ne nandeketan te tabe, ka me iihian wey ka tabe kayi, wey ka kawanan ne bubun.
26 Ne migkuwa sikandin te sabeka ne paan puun te liyang ne intahuan te me paan ne ware patulin ne inhalad e diye te Magbebaye ne Manama. Migkuwa degma sikandin te paan ne insewuhan te mentika, wey te manipis ne paan. In-untud din seini langun diye te tabe wey te kawanan ne bubun te karniru.
27 Ne imbehey rin e seini langun diye ki Aarun wey te me anak din eyew igkayew ran diye te Manama isip igdasag ne egkayawen.
28 Pegkeimpus dan te egkayew, ingkuwa red seini ni Muwisis wey inlagkes din te egtutung te igpanubad ne egtutungen diye te altar. Igpanubad seini para te peg-urdina kandan wey meemut ka lansi due diye te Magbebaye ne Manama.
29 Ne ingkuwa degma ni Muwisis ka kumeng te karniru wey ingkayew rin diye te Manama eyew igdasag ne egkayawen. Seini ka baad din te lukesan ne karniru ne impanubad para te peg-urdina. Inggimu seini langun ni Muwisis su insuhu sikandin te Magbebaye.
30 Ne migkuwa si Muwisis te lana ne ig-itis te peg-urdina wey te langesa ne diye te altar wey impatihisan din si Aarun wey ka me anak din, wey ka me kumbale dan. Iling due ka peg-urdina ki Aarun wey te me anak din wey te me kumbale dan.
31 Ne migkahiyan ni Muwisis si Aarun wey ka me anak din, “Hilutua niyu ka ngalap te ikarangeb ne karniru diye te gumawan te Balungbalung ne Temuwanan. Nakahiyan kud sikaniyu te diye niyu re seini keena wey ka paan ne diye te liyang ne inhalad para te peg-urdina.
32 Ne tutunga niyu ka same niyu te egkeen.
33 Kene kew awe kayi te seled te Balungbalung ne Temuwanan te pitu ne aldew, taman te egkeimpusan e ka peg-urdina kaniyu.
34 Ne ka langun ne inggimu ta kuntee, insuhu te Magbebaye ne Manama eyew iglinis te me sale niyu.
35 Ne kene kew awe diye te gumawan te Balungbalung ne Temuwanan te aldew wey marusilem te pitu ne aldew. Ne himuwa niyu ka insuhu te Manama keddi ne igpeyimu rin kaniyu eyew kene kew egpatey. Sika ka insuhu te Magbebaye keddi.”
36 Purisu, intuman ni Aarun wey te me anak din ka langun ne insuhu te Manama ki Muwisis ne igpeyimu kandan.