11
Ka inged ne Tabira
1 Ne migsagsahukul ka keet-etawan tenged te me malised ne nabayaan dan. Te pegkarineg te Magbebaye ne Manama kandan, nabelu-belu sikandin wey impeuyanan din sikandan te hapuy ne nakatutung te duma ne diye te eletanan te kampu.
2 Ne tenged kayi, migpabulig sikandan ki Muwisis. Ne mig-ampu si Muwisis te Magbebaye, wey neebukan e ka hapuy.
3 Sikan naa ka ingngaranan seeye ne inged te Tabira su migkanlabkanlab ma ka hapuy te Magbebaye diye te taliware dan.
Ka pegsagsahukul te keet-etawan
4 Ne ka me talagsagsahukul duma te me etew, amane e egkekeibeg te ngalap. Ne ka duma ne me kabuhalan ni Israil, migmanagsahukul e wey migkahi sikandan, “Meupiya ubag perem ke due egkakeen ta ne ngalap!
5 Te diye ki pad te Ihiptu, egpakakeen ki te isda ne ware bayad, me timun, tanggiyayun, bumbay, sibuyas, wey me ahus.
6 Piru kayi, kene kid e egkekeibeg ne egkeen su egkeelin naan de iya ne mana se egkakeen ta.”
7 Egpekeiling ka mana te dereisek ne beni ne memaangkag.
8 Egmanlimuren seini te me kabuhalan ni Israil tagse maselem, wey eggalingen dan seini wey ke egbinayyuwen naa. Ne egpakalkalaan dan seini diye te kuren wey eggimuwen dan ne manipis ne paan. Ne ka nanam kayi, egpekeiling te nanam te paan ne inggilutu te mentika.
9 Egmakatapik ka mana te egkengeulug ne demmug diye te kampu tagse marusilem.
10 Narineg ni Muwisis ka pegsagsahukul te tagse pamilya diye te me gumawan te me balungbalung dan. Ne nalanglangetan ka Magbebaye ne Manama, wey tenged dutu, nasuhey degma si Muwisis.
11 Ne migkahi si Muwisis diye te Magbebaye, “Mania te inlised-lised a nikeykew se suluhuanen nu Magbebaye? Mania te ware ka nahale keddi wey imbehayan a nikeykew te katenged te pegpangulu te seini ne keet-etawan?
12 Sikeddi bes ka naberes wey migpalelesut kandan? Mania te igpasapipi nu sikandan keddi iling te talagtanggu ne egsapsapipi te bate peendiye te tane ne insaad nu te me kabuybuyahan dan?
13 Hendei e naan e egpamitew te ngalap ne igpakeen ku kandan? Migsagsahukul e sikandan keddi ka egbuyu te ngalap ne egkeenen dan.
14 Kene ku egkeyimu te sikeddi de ka pegtanggu te seini se keet-etawan. Dakel amana seini ne himu para keddi.
15 Ke iling ma rue, meupiya pad mule ke eggimatayan ad nikeykew. Ke ingkahale e red nikeykew ne kene nu balahara ne eg-antus e pad.”
16 Ne ingkahiyan te Magbebaye si Muwisis, “Libulunga nu ka pitu ne pulu (70) ne me igbuyag te me kabuhalan ni Israil ne neilaan nu ne me pangulu wey me upisyal te keet-etawan. Ne peendiyaa nu sikandan te Balungbalung ne Temuwanan, wey pasasindeha nu sikandan diye duma keykew.
17 Egpamaneug a diye eyew egpakiglalag keykew. Ne egbaaren ku ka Panisingan ne imbehey ku keykew wey igbehey ku kandan eyew egbulihan ka nikandan te pegtanggu te me kabuhalan ni Israil.
18 Ne kahii nu ka keet-etawan, ‘Matulusa niyu ka pegkeetew niyu su kaaselem ne aldew duen e ngalap ne egkakeen niyu. Narineg te Magbebaye ka pegpaninehew niyu wey ka pegkahi niyu te egkeupian kew ne egkeen te ngalap, wey ka pegkahi niyu te meupiya pad ka keugpe niyu diye te Ihiptu. Purisu egbehayan kew kaaselem te Magbebaye ne Manama te ngalap ne egkakeen niyu.
19 Ne kene ne senge-kaaldew re ne egpakakeen kew kayi wey ke daruwa naa wey ke lalimma naa wey ke sapulu naa wey ke daruwa ne pulu (20) naa ne aldew,
20 ke kene, senge-bulan iya. Egbehayan ku sikaniyu taman te egkasengit kew wey kene kew e egkengeupian ne egkeen kayi, su imbalahad e ma nikaniyu se migduma-ruma kaniyu wey migsinehew kew wey migkahi keddi te meupiya pad perem ke ware kew mig-awe puun te Ihiptu.’ ”
21 Piru migkahi si Muwisis diye te Magbebaye, “Hen‑em ne gatus ne libu (600,000) ka langun ne etew ne migduma keddi, wey kuntee migkahi ka te egbehayan nu sikandan te ngalap ne egkakeen dan te senge-bulan?
22 Minsan pad eglapeen ney ka langun ne karniru wey me baka ney wey ke egbiyaleen ney naa ka langun ne isda diye te dahat, eleg naa seini kandan?”
23 Ne ingkahiyan te Magbebaye si Muwisis, “Migsuman-suman ke buwa ne kene ku egkeyimu sika? Egkakita nu kuntee ne egkeyimu ku ke nekey ka ingkahi ku.”
24 Purisu miglihawang si Muwisis wey ingkahiyan din e ka keet-etawan te ingkahi kandin te Magbebaye. Ne inlibulung din e ka pitu ne pulu (70) ne me igbuyag wey impalingut din pasasindeha diye te Balungbalung ne Temuwanan.
25 Ne migpamaneug ka Magbebaye ne migpeiling te gapun wey migpakiglalag ki Muwisis. Ne ingkuwa te Magbebaye ka duma ne Panisingan ne diye te ki Muwisis, wey imbehey diye te pitu ne pulu (70) ne pangulu. Te narawat dan e seini, migpanagne sikandan ne iling te prupita piru kasabeka re seeye neyitabu.
26 Ne due daruwa ne etew ne egngaranan ki Ildad wey ki Midad ne inlagkes te eglista isip me pangulu, piru ware sikandan nekeendiye te Balungbalung ne Temuwanan, su diye de mule sikandan te kampu, piru nabehayan degma sikandan te Panisingan wey migpanagne degma sikandan diye te kampu.
27 Ne due sabeka ne lukes-lukes ne migpallahuy diye ki Muwisis wey migkahi, “Migpanagne ensi Ildad wey si Midad diye te kampu.”
28 Ne migkahi si Huswi ne anak ni Nun wey talagbulig ki Muwisis puun pad te pegkabate din, “Ahalen, pape-peenenga nu sikandan.”
29 Piru migtabak si Muwisis, “Nalaggew ke naa ke nekey ka egkatamanan te pegkapangulu ku? Para keddi, egkeupian a mule perem ne egkeyimu ne prupita ka langun ne keet-etawan te Manama wey egbehayan te Panisingan din.”
30 Ne miglibed e diye te kampu si Muwisis wey ka me pangulu te me kabuhalan ni Israil.
Ka peg-peuyan te Manama te me puhu
31 Ne migpeuyan ka Magbebaye ne Manama te kalamag puun te dahat wey mig-uyan te susuluhi ne puhu. Ne miglingut seini migmanlatun diye te ingkekampuwan dan. Ne hep‑at ne dangew ka katikangan kayi puun te tane. Ne ka kaluahan te impanlatunan kayi, senge-kaaldew ka peggipanew peendiye te tagse kilid ke egtaleen seini.
32 Ne migmanlihawang ka keet-etawan wey migmandakep te me puhu te intiru ne aldew wey marusilem, wey te seup pad man‑e ne aldew. Ne ware minsan sabeka ne nakarakep te de-deisek de te sabeka ne libu (1,000) ne kilu. Ne impalingut dan seini immandampil diye te kampu.
33 Piru te diye pad te be‑be dan ka ngalap wey ware pad naabeleng, amana nabelu kandan ka Magbebaye, wey impeuyanan din sikandan te dalu wey migpatey ka masulug ne etew.
34 Purisu ingngaranan ka seeye ne inged te Kibrut-Hataaba su diye ma iglebeng ka me etew ne me halamlamen.
35 Ne puun te Kibrut-Hataaba, nangipanew e man‑e ka me kabuhalan ni Israil peendiye te Hasirut wey diye pad man‑e sikandan nangekampu.