12
Ka peglegpad ki Miryam
1 Taheed te diye sikandan te Hasirut, inderew‑ey enni Miryam wey ni Aarun si Muwisis su migpangasawa ma sikandin te malitan ne matig-Kusi.
2 Migkahi sikandan, “Si Muwisis bu re iya mule ka egpakiglalahan te Magbebaye ne Manama? Kene bes naa degma sikandin egpakiglalag kanta?” Piru narineg seeye te Magbebaye.
3 Ne si Muwisis iyan subla ne mapariralemen ne etew te intiru ne kalibutan.
4 Te sikan de, ingkahiyan te Magbebaye ensi Muwisis, si Miryam, wey si Aarun, “Lihawang kew ka tatelu, wey hendiye kew te Balungbalung ne Temuwanan.” Ne migmanlihawang e sikandan se tatelu.
5 Ne migpamaneug ka Magbebaye pinaahi te gapun ne iling te sungkaleg, wey migsasindeg diye te gumawan te Balungbalung ne Temuwanan. Ne in-umew rin e ensi Aarun wey si Miryam. Ne migparani e sikandan se daruwa.
6 Ne ingkahiyan sikandan te Magbebaye, “Pammineg kew! Ke due prupita te Magbebaye due te kaniyu, egpeila a kandin pinaahi te igmakita wey egpakiglalag a kandin pinaahi te me taheinep.
7 Piru kene ne iling due ne paahi ka pegpakiglalag ku te suluhuanen ku ne si Muwisis. Sikandin ka impiyalan ku te pegpangulu te keet-etawan ku.
8 Egpatangtangkeey key ka egpalalahey te klaru wey kene ne pinaahi te me lalag ne malised ne egsabuten, wey nakita a nikandin. Ne mania te ware kew naaldek ne egderew‑ey kandin?”
9 Ne migpangebel-ebel ka langet te Magbebaye kandan, wey mig-awe e sikandin.
10 Te warad e ka gapun diye te dibabew te Balungbalung ne Temuwanan, in-ibung e si Miryam wey migmaangkag e ka laplap din. Te pegpitew ni Aarun, nakita rin ne in-ibung e si Miryam.
11 Ne migkahi si Aarun ki Muwisis, “Ahalen ku, kene key re ubag nikeykew legpari tenged te keungelan ne neyimu ney wey nakasale key.
12 Kene nu ituhut ne egpekeiling e si Miryam te bate ne miglesut ne migpatey e wey namewu e ka liware te lawa.”
13 Ne migpeyimmimenew si Muwisis te Magbebaye ne Manama te migkahi, “He Manama, bawii nu re ubag si Miryam.”
14 Piru ingkahiyan te Magbebaye si Muwisis, “Ke egkulepaan te amey ni Miryam ka ulaula rin, eg-antusen din ka keyilawan te pitu ne aldew. Purisu palihawanga nu sikandin te kampu te pitu ne aldew. Ne peglihad te pitu ne aldew, henduen pad man‑e ne egpakaseled sikandin te kampu.”
15 Purisu impalihawang e te kampu si Miryam te pitu ne aldew. Ne ware nangipanew ka keet-etawan taman te impaseled e man‑e si Miryam.
16 Pegkeimpus dutu, mig-awe e man‑e sikandan diye te Hasirut, wey diyad man‑e nangekampu te disirtu, diye te Paran.