17
Ka pegsubing te tuked ni Aarun
1 Ne ingkahiyan te Magbebaye ne Manama si Muwisis,
2 “Kahii nu ka me kabuhalan ni Israil ne egbehey keykew te sapulu wey daruwa (12) ne tuked—sabeka ne tuked ka egpuun te tagse pangulu te tagse tribu. Ne pasulati nu te ngaran te tagse pangulu ka tuked din.
3 Iyan nu isulat te tuked ni Libi ka ngaran ni Aarun su sabeka man de ne tuked ka egpuun te pangulu te tagse tribu.
4 Ne ipanahu nu ka me tuked diye te katangkaan te Tahuanan te Kasabutan diye te Balungbalung ne Temuwanan ne egpakigkitaan ku kaniyu ki Aarun.
5 Ne egsubingan ka tuked te etew ne eg-alamen ku. Ne te seini ne paahi, egpeeneng-eneng ka me kabuhalan ni Israil ne egsagsahukul keykew.”
6 Purisu inlalahan ni Muwisis ka me kabuhalan ni Israil, wey migbehey kandin te tuked ka tagse pangulu te tagse tribu. Sapulu wey daruwa (12) ka langun ne tuked; sabekeen iya dutu ka tuked ni Aarun.
7 Ne impanahu e ni Muwisis ka me tuked diye te tangkaan te Magbebaye diye te Balungbalung ne Temuwanan ne intahuan te Tahuanan te Kasabutan.
8 Te pegkamaselem, migseled si Muwisis te Balungbalung ne Temuwanan ne intahuan te Tahuanan te Kasabutan, wey nakita rin ne migsubing mule ka tuked ni Aarun ne puun te me kabuhalan ni Libi; migbubulak seini wey migbebehas te neneyinuhan ne almindras.
9 Ne impanguyan ni Muwisis diye te lihawangan ka langun ne tuked puun te tangkaan te Magbebaye, wey impapitew rin te me kabuhalan ni Israil. Intengtengan dan seini wey ingkuwe e te tagse pangulu ka tuked din.
10 Ne ingkahiyan te Magbebaye si Muwisis, “Ilibed nu itahu ka tuked ni Aarun diye te tangkaan te Tahuanan te Kasabutan. Itines nu seini isip tuus te pegsukul. Ne egpatey iya sikandan ke kene sikandan egpeeneng-eneng ka egmanagsahukul keddi.”
11 Ne intuman ni Muwisis ka insuhu kandin te Magbebaye.
12 Ne ingkahiyan te me kabuhalan ni Israil si Muwisis, “Ke iling ma rue ne egpatey key bes iya langun,
13 su egkapatey ma ka minsan hentew ne egdani-rani re te Balungbalung te Magbebaye. Egpatey key bes iya mule langun?”