18
Ka himu te me talagpanubad wey me Libita
1 Ne ingkahiyan te Magbebaye ne Manama si Aarun, “Sikeykew wey ka me anak nu wey ka me karumaan nu, iyan egpakababa te me sale ne egkeyimu niyu te pegtrabahu niyu diye te Balungbalung ne Temuwanan. Piru sikeykew re wey ka me anak nu ka egpakababa te me sale ne egkeyimu niyu ne due kalabetan te pegkatalagpanubad niyu.
2 Ne pandumaa nu ka me karumaan nu ne me kabuhalan ni Libi eyew egbulig sikandan keykew wey te me anak nu te egtrabahu diye te Balungbalung ne Temuwanan.
3 Keilangan ne eggimuwen dan ka me katungdanan dan kaniyu, wey diye te Balungbalung ne Temuwanan. Piru keilangan ne kene sikandan egparani te matulus ne me kasangkapan, wey te altar su ke eggimuwen dan sika egpatey sikandan, wey egpakalagkes ka degma.
4 Egbulihan kew nikandan wey eggimuwen dan ka katungdanan dan ne iyan ka pegtanggu te Balungbalung ne Temuwanan, wey ka peggimu te langun ne gulinganan diye te seled. Ne keilangan ne warad lein ne egbulig kaniyu.
5 Himuwa niyu ka me himu diye te Balungbalung ne Temuwanan lagkes ka me himu diye te altar eyew kena ad e egkalangetan te me kabuhalan ni Israil.
6 In-alam ku ka me karumaan nu ne me kabuhalan ni Libi puun te langun ne kabuhalan ni Israil eyew egpabulihen ku kaniyu. Imbehey ku sikandan kaniyu isip dasag eyew eggimu te me gulinganan diye te Balungbalung ne Temuwanan.
7 Piru sikeykew re wey ka me anak nu ka egtrabahu isip me talagpanubad. Sikaniyu re ka eggimu te langun-langun ne eggulinganan diye te altar wey diye te Amana ne Matulus ne Sinabeng. Dasag ku kaniyu ka pegkatalagpanubad niyu. Ne eggimatayan ku ka minsan hentew ne kene ne talagpanubad ne egdani-rani te Amana ne Matulus ne Sinabeng.”
8 Ne ingkahiyan te Magbebaye ne Manama si Aarun, “Igbehey ku keykew ka langun ne matulus ne igdasag keddi te me kabuhalan ni Israil. Igbehey ku seini keykew wey te me kabuhalan nu isip baad niyu ne kene egkataman.
9 Ne seini ka me baad niyu puun te me halad ne ware tutunga ne ingkapanubad e diye te Manama: ka halad ne me pegkeen, ka me halad eyew egkapasaylu ka etew, wey ka me halad tenged te pegsupak. Egkaangken nu seini wey te me anak nu.
10 Keena niyu seini diye te amana ne matulus ne inged. Egkaayun degma ne egkeen kayi ka langun ne lukes. Ne isipa niyu seini ne amana ne matulus para kaniyu.
11 “Egkaangken nu man‑e isip baad nu ne kene egkataman ka egkayawen ne me halad te me kabuhalan ni Israil. Imbehey ku seini keykew wey te me kabuhalan nu isip baad niyu ne kene egkataman. Ne ka langun ne malinis ne sakup te pamilya nu, lukes ma wey se malitan, egkaayun ne egkeen te seini ne me halad.
12 “Igbehey ku keykew ka amana ne mateles ne mentika, binu, trigu, wey ka an-anayan ne me behas ne ighalad te me kabuhalan ni Israil kayi te keddi.
13 Egkaangken nu ka langun ne an-anayan ne uma ne eg-uyanen te me kabuhalan ni Israil kayi te keddi puun te tane dan. Ne ka langun ne sakup te pamilya nu ne in-isip ne malinis, egkaayun ne egkeen kayi.
14 “Egkaangken nu ka langun ne igteil te me kabuhalan ni Israil para keddi.
15 “Ne egkaangken nu man‑e ka langun ne panganey ne lukes, etew ma wey se mananap ne ighalad keddi te me kabuhalan ni Israil. Piru keilangan ne igpalekat nu ka me panganey ne lukes ne anak te etew, wey ka me panganey te mananap ne in-isip ne malindit.
16 Ke sabeka pad ne bulan ka idad te bate, ipalekat nu te lalimma ne buuk ne pelata ne intimbang te timbangan te me talagpanubad.
17 Piru kene nu ipalekat ka panganey ne anak te baka, karniru, wey ke kambing naa su keddiey e sikandan. Ne panlapaa nu sika wey imapesik-pesik nu ka me langesa diye te altar wey tutunga nu ka me tabe isip igpanubad ne egtutungen. Ne ka lansi due ka igkeemuti ku.
18 Piru keykew e ka me sapu, lagkes ka kumeng, wey ka kawanan ne bubun ne ingkayew te peghalad.
19 Igbehey ku keykew wey te me anak nu isip ware egtamanan ne dasag ka matulus ne me halad te me kabuhalan ni Israil kayi te keddi. Sabeka seini ne kasabutan ne kene egkabalbalawan te ware egtamanan para keykew wey te me kabuhalan nu.”
20 Ne ingkahiyan pad man‑e te Magbebaye ne Manama si Aarun, “Sikaniyu se me talagpanubad, kene kew egpakapanunud te tane te Israil, su sikeddi mismu ka egbehey kaniyu te egkeilanganen niyu.”
Ka baad para te me Libita
21 Ne migkahi ka Magbebaye, “Ne meyitenged te me kabuhalan ni Libi, egbayaran ku sikandan te pegtrabahu ran diye te Balungbalung ne Temuwanan. Igbehey ku kandan isip kandan ne baad, ka langun ne igkasapulu ne igbehey te me kabuhalan ni Israil.
22 Ne puun kuntee, ware minsan hentew te me kabuhalan ni Israil ne egdani-rani te Balungbalung ne Temuwanan, angin e te me talagpanubad wey me Libita. Su egpakasale wey egkapatey ka me kabuhalan ni Israil ne lerew re due ne egdani-rani te Balungbalung ne Temuwanan.
23 Piru ka me kabuhalan ni Libi ka egtrabahu diye te Balungbalung ne Temuwanan, wey sikandan ka egpakababa ke egpakasale sikandan te pegtrabahu ran diye. Kene egkabalbalawan ka seini ne tulumanen para te langun ne kabuhalan niyu. Ware egkapanunud te me kabuhalan ni Libi ne tane puun te me kabuhalan ni Israil
24 su igbehey ku ma isip baad dan ka me igkasapulu ne igbehey keddi te me kabuhalan ni Israil. Sikan naa ka migkahi a te ware egkapanunud dan puun te me kabuhalan ni Israil.”
Ka me pegpaney-paney para te me Libita
25 Ne ingkahiyan e degma te Magbebaye si Muwisis,
26 “Kahii nu pa man‑e ka me kabuhalan ni Libi, ‘Emun ke egkarawat niyud ka me igkasapulu ne igbehey kaniyu te me kabuhalan ni Israil, behey kew degma keddi te igkasapulu niyu puun te sika ne igkasapulu isip halad niyu keddi.
27 Ne eg-isipen ku sika ne halad niyu, iling te halad ne trigu ne egpuun te diekanan, wey ke binu naa ne egpuun te kelesanan te behas te paras.
28 Sikan naa ka keilangan ne eghalad kew degma kayi te keddi puun te langun ne igkasapulu ne egkarawat niyu puun te me kabuhalan ni Israil. Ne ka igbehey niyu keddi ne ikasapulu, diye niyu ibehey ki Aarun.
29 Ne keilangan ne iyan niyu igbehey keddi ka amana ne meupiya ne baad puun te langun ne dasag ne egkarawat niyu.
30 Ne emun ke igpakahalad niyud kayi te keddi ka amana ne meupiya ne baad, kaniyud e ka same, iling te same te uma ne kandin e te talagbasuk ke egpakahalad e sikandin.
31 Egkaayun ne minsan hendei niyu egkeena duma te pamilya niyu ka baad niyu, su unag niyu ma sika te pegtrabahu niyu diye te Balungbalung ne Temuwanan.
32 Kene kew egpakasale ke egkeenen niyu seini, ke inhalad niyud diye te Magbebaye ne Manama ka amana ne mateles ne baad. Piru sihuruwa niyu ne kene niyu egkabaley-baley ka me halad te me kabuhalan ni Israil pinaahi te pegkeen te me baad niyu ke ware niyu pad ipakahalad ka keddi ne baad, eyew kene kew egpatey.’ ”