2
Ka pegkateil te me kabuhalan diye te kampu
1 Ne ingkahiyan te Magbebaye ne Manama si Muwisis wey si Aarun:
2 Pakekampuwa niyu ka tagse kabuhalan diye te lenged te bendila te tagse kabuhalan dan ne diye egpakatangke wey egpakalingut te Balungbalung ne Temuwanan.
3 “Ka me punduk enni Huda, Isakar, wey Sabulun diye egkekampu dapit te igsile te Balungbalung ne Temuwanan, diye te diralem te me bendila te tagse kabuhalan dan. Seini ka me ngaran te me kabuhalan dan, me pangulu ran, wey ka kasuluhan te me sakup dan: Te me kabuhalan ni Huda si Naasun ne anak ne lukes ni Aminadab ka pangulu,
4 ne 74,600 ka kasuluhan dan.
5 Te me kabuhalan ni Isakar si Natanail ne anak ne lukes ni Suar ka pangulu,
6 ne 54,400 ka kasuluhan dan.
7 Te me kabuhalan ni Sabulun si Iliyab ne anak ne lukes ni Hilun ka pangulu,
8 ne 57,400 ka kasuluhan dan.
9 Ne 186,400 ka kasuluhan te me lukes diye te me kampu enni Huda, Isakar, wey Sabulun. Sikandan ka eggun‑a eggipanew.
10 “Ka me punduk enni Rubin, Simyun, wey Gad diye egkekampu dapit te igkakawanan ne balabahan te Balungbalung ne Temuwanan, diye te diralem te me bendila te tagse kabuhalan dan. Seini ka me ngaran te me kabuhalan dan, me pangulu ran, wey ka kasuluhan te me sakup dan: Te me kabuhalan ni Rubin si Ilisur ne anak ne lukes ni Sidiyur ka pangulu,
11 ne 46,500 ka kasuluhan dan.
12 Te me kabuhalan ni Simyun si Silumil ne anak ne lukes ni Surisaday ka pangulu,
13 ne 59,300 ka kasuluhan dan.
14 Te me kabuhalan ni Gad si Iliyasap ne anak ne lukes ni Diyuwil ka pangulu,
15 ne 45,650 ka kasuluhan dan.
16 Ne 151,450 ka kasuluhan te me lukes diye te me kampu enni Rubin, ni Simyun, wey ni Gad. Sikandan ka igkarangeb ne eggipanew.
17 Ne ka egsinundul te me kabuhalan ni Gad, iyan ka me kabuhalan ni Libi ne eg-uyan te Balungbalung ne Temuwanan, wey diye sikandan te elat-elat te duma ne punduk. Ne ka langun ne kabuhalan egsinundul eggipanew iling te pegkateil te pegkekampu ran, wey eglenged te tagse bendila dan.
18 “Ka me punduk enni Ipraim, Manasis, wey Binhamin diye egkekampu dapit te iglineb te Balungbalung ne Temuwanan, diye te diralem te me bendila te tagse kabuhalan dan. Seini ka me ngaran te me kabuhalan dan, me pangulu ran, wey ka kasuluhan te me sakup dan: Te me kabuhalan ni Ipraim si Ilisama ne anak ne lukes ni Amihud ka pangulu,
19 ne 40,500 ka kasuluhan dan.
20 Te me kabuhalan ni Manasis si Gamalil ne anak ne lukes ni Pidasur ka pangulu,
21 ne 32,200 ka kasuluhan dan.
22 Te me kabuhalan ni Binhamin si Abidan ne anak ne lukes ni Gidyun ka pangulu,
23 ne 35,400 ka kasuluhan dan.
24 Ne 108,100 ka kasuluhan te me lukes diye te me kampu enni Ipraim, ni Manasis, wey ni Binhamin. Sikandan ka igkatelu ne eggipanew puun te kampu.
25 “Ka me punduk enni Dan, Asir, wey Naptali diye egkekampu dapit te igkahibang ne balabahan te Balungbalung ne Temuwanan, diye te diralem te me bendila te tagse kabuhalan dan. Seini ka me ngaran te me kabuhalan dan, me pangulu ran, wey ka kasuluhan te me sakup dan: Te me kabuhalan ni Dan si Ahisir ne anak ne lukes ni Amisaday ka pangulu,
26 ne 62,700 ka kasuluhan dan.
27 Te me kabuhalan ni Asir si Pagil ne anak ne lukes ni Ukran ka pangulu,
28 ne 41,500 ka kasuluhan dan.
29 Te me kabuhalan ni Naptali si Ahira ne anak ne lukes ni Inan ka pangulu,
30 ne 53,400 ka kasuluhan dan.
31 Ne 157,600 ka kasuluhan te me lukes diye te me kampu enni Dan, ni Asir, wey ni Naptali. Sikandan ka igkeep‑at wey kamewuriyan ne eggipanew puun te kampu.
32 Sika ka langun ne me kabuhalan ni Israil ne nalista diye te listaan te tagse kabuhalan. Migginguma te 603,550 ka kasuluhan te langun ne diye te me kampu.
33 Piru ware ilagkes te egpanlista ka me kabuhalan ni Libi, sumale te insuhu te Magbebaye ne Manama.
34 Sikan naa ka intuman te me kabuhalan ni Israil ka langun ne insuhu te Magbebaye kandan pinaahi ki Muwisis. Migkekampu ka tagse tribu ne miglenged te kandan ne bendila wey miggipanew ka tagse sabeka duma te tribu wey pamilya rin.