3
Ka me lukes ne anak ni Aarun
1 Ne seini ka pangguhuren meyitenged te me kabuhalan enni Aarun, wey ni Muwisis te timpu ne migpakiglalag ka Magbebaye ne Manama ki Muwisis diye te Bubungan ne Sinay.
2 Due hep‑at ne anak ni Aarun ne me lukes ne iyan ensi Nadab, si Abihu, si Iliyasar, wey si Itamar.
3 Ne seini se me anak ni Aarun, in-alam wey in-urdinaan isip me talagpanubad.
4 Piru migpatey ensi Nadab wey si Abihu diye te tangkaan te Magbebaye te diye pad sikandan langun te disirtu, diye te Sinay, tenged te peggamit dan te hapuy ne kene ne matulus te timpu ne migpanubad sikandan. Ne tenged te ware me anak enni Nadab wey ni Abihu, ensi Iliyasar naan de wey si Itamar ka migpamakey isip me talagpanubad duma te amey ran ne si Aarun.
5 Ne ingkahiyan te Magbebaye si Muwisis,
6 “Ipeumew nu ka me kabuhalan ni Libi wey dumaa nu sikandan diye ki Aarun ne talagpanubad eyew egbulig kandin.
7 Sikandan ka egbulig ki Aarun wey te langun ne kabuhalan ni Israil pinaahi te peggimu te me himu diye te Balungbalung ne Temuwanan.
8 Sikandan man‑e ka egtanggu te langun ne me kasangkapan te Balungbalung ne Temuwanan wey egtrabahu diye para te me kabuhalan ni Israil.
9 Ipiyal nu ki Aarun wey te me anak din ka me kabuhalan ni Libi eyew egbulig kandan.
10 Ne ibehey nu ki Aarun wey te me anak din ka katenged isip me talagpanubad. Ne eggimatayan ka minsan hentew ne kene ne kabuhalan ni Libi ne eggimu te himu te talagpanubad.”
11 Ne ingkahiyan e man‑e te Magbebaye ne Manama si Muwisis,
12 “In-alam ku ka me kabuhalan ni Libi puun te me kabuhalan ni Israil isip liwan te langun ne lukes ne kinakakayan ne anak te me kabuhalan ni Israil. Keddiey ka me kabuhalan ni Libi,
13 su keddiey ma ka langun ne lukes ne kinakakayan ne anak te me kabuhalan ni Israil. Te diye kew pad te Ihiptu, impangimatayan ku ka langun ne lukes ne kinakakayan ne anak te me Ihiptuhanen piru inlein ku mule ka langun ne lukes ne kinakakayan ne anak te me kabuhalan ni Israil wey te me mananap dan. Sikan naa ka keddiey sikandan. Sikeddi ka Magbebaye.”
14 Ne ingkahiyan e man‑e te Magbebaye si Muwisis diye te disirtu, diye te Sinay,
15 “Seela nu ka langun ne lukes ne sakup te kabuhalan ni Libi sumale te me pamilya ran wey me kabuhalan. Ilista nu ka langun ne bate ne lukes ne senge-bulan pad se idad peendiye te buyag-buyag e.”
16 Purisu impanlista ni Muwisis ka langun ne lukes ne kabuhalan ni Libi sumale te insuhu kandin te Magbebaye.
17 Si Libi due tatelu ne anak ne me lukes ne iyan ensi Girsun, si Kuhat, wey si Mirari.
18 Ne ka me lukes ne anak ni Girsun iyan ensi Libni wey Simii.
19 Ne ka me lukes ne anak ni Kuhat iyan ensi Amram, Isar, Hibrun, wey si Usil.
20 Ne ka me lukes ne anak ni Mirari iyan ensi Mali wey si Musi.
Sikandan langun ka me kabuhalan ni Libi, sumale te me pamilya ran.
21 Ne ka me kabuhalan ni Girsun, iyan ka me pamilya enni Libni wey ni Simii.
22 Ne migginguma te 7,500 ka langun ne lukes ne senge-bulan pad se idad peendiye te buyag-buyag e.
23 Ne diye migkekampu ka me kabuhalan ni Girsun te liyu te Matulus ne Balungbalung ne In-alad dapit te iglineb.
24 Ne ka egpangulu te me kabuhalan dan, iyan si Iliyasap ne anak ni Lail.
25 Sikandan ka egtanggu te Balungbalung ne Temuwanan, te tel-eb kayi, wey te kurtina te gumawan
26 wey te me kurtina ne nakalingut diye te lama te Matulus ne Balungbalung ne In-alad, te altar ne tutunganan te igpanubad, te kurtina te gumawan, wey te me hiket kayi. Sikandan man‑e ka egtanggu te langun-langun ne himu ne egkahamitan te seini ne me kasangkapan.
27 Ne ka me kabuhalan ni Kuhat, iyan ka me pamilya enni Amram, Isar, Hipuni, wey ni Usil.
28 Ne migginguma te 8,600 ka langun ne lukes ne senge-bulan pad se idad peendiye te buyag-buyag e.
29 Ne diye migkekampu ka me kabuhalan ni Kuhat te igkakawanan ne balabahan te Matulus ne Balungbalung ne In-alad.
30 Ne ka egpangulu te me kabuhalan dan, iyan si Ilisapan ne anak ni Usil.
31 Sikandan ka egtanggu te Tahuanan te Kasabutan, te lamisa, te tahuanan te sulu, te me altar, te me kasangkapan ne eggamiten te me talagpanubad te pegtrabahu diye te Matulus ne Sinabeng, wey te kurtina te gumawan. Sikandan man‑e ka egtanggu te langun-langun ne himu ne egkahamitan te seini ne me kasangkapan.
32 Ne si Iliyasar ne anak ni Aarun ne talagpanubad, iyan egpangulu te me igbuyag te me kabuhalan ni Libi, wey te seeye se me talagtanggu te Matulus ne Sinabeng.
33 Ne ka me kabuhalan ni Mirari, iyan ka me pamilya enni Mali wey ni Musi.
34 Ne migginguma te 6,200 ka langun ne lukes ne senge-bulan pad se idad peendiye te buyag-buyag e.
35 Si Suriil ne anak ni Abihail ka egpangulu te me kabuhalan ni Mirari. Ne diye sikandan migkekampu te igkahibang ne balabahan te Matulus ne Balungbalung ne In-alad.
36 Ka me kabuhalan ni Mirari ka impiyalan te pegtanggu te me tukeg te Balungbalung, te me sungkaleg, lagkes ka me balabag, wey me pabunsuranan. Sikandan man‑e ka eggimu te langun-langun ne himu ne egkahamitan te seini ne me kasangkapan.
37 Sikandan man‑e ka egtanggu te me sungkaleg te alad te lama, te me pabunsuranan, te igpakpak te tane ne eggiketan te lubid te balungbalung, wey te me lubid.
38 Ne diye migkekampu te egkatangkaan te Matulus ne Balungbalung ne In-alad dapit te igsile ensi Muwisis wey Aarun wey ka me anak ni Aarun. Sikandan man‑e ka impiyalan te langun-langun ne himu diye te Balungbalung ne Temuwanan, wey te minsan nekey ne keilangan ne eggimuwen para te me kabuhalan ni Israil. Ne eggimatayan ka minsan hentew ne kene ne kabuhalan ni Libi ne egdani-rani te Matulus ne Sinabeng.
39 Ne migginguma te 22,000 ka langun ne kabuhalan ni Libi ne lukes. Inseel sikandan ni Muwisis sumale te insuhu te Magbebaye ne Manama. Ne iyan de inlagkes te egseel ka senge-bulan pad se idad peendiye te buyag-buyag e.
Ka peglekat te me kinakakayan
40 Ne ingkahiyan te Magbebaye si Muwisis, “Seela nu wey ilista nu ka langun ne lukes ne kinakakayan ne anak te me kabuhalan ni Israil puun te senge-bulan pad se idad peendiye te buyag-buyag e.
41 Iteil nu ka me kabuhalan ni Libi para keddi isip liwan te langun ne lukes ne kinakakayan ne anak te me kabuhalan ni Israil. Ne ihalad nu degma keddi ka me ayam dan, isip liwan te me panganey ne anak te me ayam te me kabuhalan ni Israil. Sikeddi ka Magbebaye.”
42 Purisu inseel ni Muwisis ka langun ne lukes ne kinakakayan ne anak te me kabuhalan ni Israil sumale te insuhu kandin te Magbebaye.
43 Ne migginguma te 22,273 ka langun ne kinakakayan ne me lukes ne senge-bulan pad se idad peendiye te buyag-buyag e.
44 Ne ingkahiyan te Magbebaye si Muwisis,
45 “Ihalad nu keddi ka me kabuhalan ni Libi isip liwan te langun ne kinakakayan ne me lukes ne anak te me kabuhalan ni Israil wey ka me ayam te me kabuhalan ni Libi isip liwan te me ayam te me kabuhalan ni Israil. Keddiey ka me kabuhalan ni Libi. Sikeddi ka Magbebaye.
46 Ne tenged te due subla ne 273 ne kinakakayan ne me anak te me kabuhalan ni Israil du te anak te me kabuhalan ni Libi, keilangan ne eglekaten sikandan.
47 Ka iglekat te tagse sabeka kandan, lalimma ne buuk ne pelata ne seleppi. Ne ka tagse buuk te seleppi egtimbangen te timbangan te me talagpanubad.
48 Ne ibehey nu seini ki Aarun wey te me anak din isip iglekat te nakasubla ne kinakakayan ne me lukes ne anak te me kabuhalan ni Israil.”
49 Purisu migpanguwa si Muwisis te seleppi isip iglekat te seeye se me kinakakayan ne me lukes ne anak te me kabuhalan ni Israil ne nakasubla te kasuluhan te me kabuhalan ni Libi.
50 Ne ka nalimud din ne seleppi ne iglekat te me kinakakayan ne me lukes ne anak te me kabuhalan ni Israil, migginguma te 1,365. Ne ka kabehat te tagse buuk te seleppi, nekeiling kabehat te pelata ne intimbang te timbangan te me talagpanubad.
51 Ne imbehey e ni Muwisis ka seleppi ki Aarun wey te me anak din sumale te insuhu kandin te Magbebaye ne Manama.