20
Ka neneyitabu diye te Kadis
(Iks. 17:1-7)
1 Te an-anayan ne bulan, nekeuma ka me kabuhalan ni Israil diye te disirtu ne egngaranan te Sin, wey nangekampu sikandan diye te marani te lungsud te Kadis. Ne diyad e migpatey si Miryam wey diye de degma ilebeng.
2 Te seeye ne timpu, ware weyig diye ne egkeinum te me kabuhalan ni Israil. Ne tenged dutu, migsabeka sikandan ka egkuntere ki Muwisis wey ki Aarun.
3 Ne insenditan dan si Muwisis te migkahi, “Meupiya pad perem ke nakalagkes key e te me duma ney ne nammatey diye te tangkaan te Magbebaye ne Manama!
4 Mania te in-uyan key pad nikeykew kayi te disirtu? In-uyan key naa nikeykew kayi eyew egpatey duma te me ayam ney?
5 Mania te impaawe key pad iya nikeykew puun te Ihiptu wey in-uyan kayi te malised ne eg-ugpaan ne kene egkapamulaan te trigu wey ke iggira naa wey ke paras naa wey ke granada naa? Ne ware pad iya man‑e weyig kayi ne egkeinum ney.”
6 Ne mig-awe e si Muwisis wey si Aarun puun te tangkaan te me kabuhalan ni Israil wey miggendiye te gumawan te Balungbalung ne Temuwanan wey miglangkeb sikandan diye. Ne migpapitew kandan diye ka katelesan te Magbebaye.
7 Ne ingkahiyan te Magbebaye si Muwisis,
8 “Kua nu ka tuked ne sika te tangkaan te Tahuanan te Kasabutan, wey palibulunga niyu ki Aarun ka me kabuhalan ni Israil. Ne taheed te egtetengteng sikandan, suhua nu sika se batu ne egpatulayas te weyig ne egkeinum dan. Te seini ne paahi, egkabehayan niyu sikandan te weyig wey ka me ayam dan.”
9 Ne ingkuwa ni Muwisis ka tuked puun te tangkaan te Tahuanan te Kasabutan, sumale te insuhu kandin te Magbebaye.
10 Ne impalibulung ni Muwisis wey ni Aarun ka me kabuhalan ni Israil diye te egkatangkaan te batu. Ne ingkahiyan sikandan ni Muwisis, “Pammineg kew se me masinupaken; keilangan bes naan iya ne egbehayan ney sikaniyu te weyig puun te seini ne batu?”
11 Ne ingkayew ni Muwisis ka tuked din wey inlampesan din e ka batu te kararuwa, wey sahuhune ne due migtulayas ne dakel ne weyig. Ne nanginum e ka me kabuhalan ni Israil wey ka me ayam dan.
12 Piru ingkahiyan te Magbebaye si Muwisis wey si Aarun, “Tenged te ware kew ma migsalig keddi, wey wara a tahura nikaniyu diye te tangkaan te me kabuhalan ni Israil, kene ne sikaniyu ka egpangulu kandan peendiye te tane ne igbehey ku kandan!”
13 Ne ingngaranan seeye te weyig ne Miriba su diye ma migsagsahukul te Magbebaye ka me kabuhalan ni Israil, wey diye degma ipapitew te Manama ka pegkamatulus din.
Ware pabayaa te Hari te inged ne Idum ka me kabuhalan ni Israil
14 Ne migsuhu si Muwisis te me etew puun te Kadis peendiye te Hari te inged ne Idum, eyew te pegkahi, “Seini ka lalag ne egpuun te me suled nu ne me kabuhalan ni Israil: Nakanengneng ka te langun ne kalised ne nabayaan ney.
15 Nangendiye te Ihiptu ka me kabuybuyahan ney, wey diye key nenekeugpe te naluhey ne timpu. Ne amana key baybayari te me Ihiptuhanen duma te me kaap-apuan ney.
16 Ne migpangananey key te Magbebaye, wey narineg din ka me laheng ney. Ne migsuhu sikandin te panalihan wey impalihawang key puun te Ihiptu. Ne seini key e kuntee te Kadis, ka sabeka ne lungsud te eletanan te tane nu.
17 Tuhuti key ubag nikeykew ne egbaye te tane nu. Kene key egbaye diye te me kamet wey ke parasan naa, wey kene key degma eg-inum te weyig puun te me belun. Diye key re egbaye te dalan nu, Hari—kene key egsuwey diye te igkakawanan wey ke igkahibang naa taman te egpakalihad key te eletanan te tane nu.”
18 Piru migtabak ka Hari te inged ne Idum, “Kene kew baye kayi te kanami; emun ke egbaye kew, eglusuran wey egpangimatayan ney sikaniyu.”
19 Ne migtabak ka me kabuhalan ni Israil, “Eg-ikul key te maluag ne dalan. Ke egpekeinum key wey ka me ayam ney te weyig niyu, egbayaran ney sikaniyu; pabayaa key re ubag wey sikan de iya.”
20 Piru migtabak man‑e ka Hari, “Kene egkaayun.”
Ne inlibulung te Hari ka masulug wey mannekal ne me sundalu rin eyew egpakiggira te me kabuhalan ni Israil.
21 Ne tenged te ware pabayaa te me Idumihanen ka me kabuhalan ni Israil, mig-alihu naan de sikandan.
Ka pegpatey ni Aarun
22 Ne nangipanew e ka langun ne kabuhalan ni Israil puun te Kadis, wey migginguma sikandan diye te Bubungan ne Hur.
23 Ne diye te Hur, ne marani te eletanan te inged ne Idum, migpakiglalag ka Magbebaye ne Manama ki Muwisis wey ki Aarun te migkahi,
24 “Kene egpakaseled si Aarun diye te tane ne igbehey ku te me kabuhalan ni Israil; egpatey sikandin wey eglemung e te me kabuybuyahan din su migsupak kew ma se daruwa te me suhu ku meyitenged te weyig diye te Miriba.
25 Dumaa nu naa si Aarun wey ka anak din ne si Iliyasar wey takereg kew diye te Bubungan ne Hur.
26 Ne luunga nu ka kumbale ni Aarun te pegkatalagpanubad, wey isaluub nu te anak din ne si Iliyasar. Ne egpatey si Aarun diye wey eglemung e te me kabuybuyahan din.”
27 Ne intuman ni Muwisis ka insuhu kandin te Magbebaye. Migtakereg sikandan se tatelu diye te Bubungan ne Hur taheed te egpamipitew kandan ka me kabuhalan ni Israil.
28 Ne inluung e ni Muwisis ka kumbale ni Aarun te pegkatalagpanubad wey insaluub din e ki Iliyasar. Ne migpatey e si Aarun diye te puntul te bubungan. Ne nataman migtupang e si Muwisis wey si Iliyasar.
29 Te pegkanengnengi te me kabuhalan ni Israil ne migpatey e si Aarun, miglungku e sikandan langun para kandin seled tatelu ne pulu (30) ne aldew.