21
Ka pegkatalu te me Kanaanen
1 Te pegkarineg te Kanaanen ne Hari te Arad ne mig-ugpe te inged te Nigib ne egpalundaniyan e ka me kabuhalan ni Israil diye te dalan te Atarim, inlusuran din sikandan, wey nakarakep sikandin te duma ne kabuhalan ni Israil.
2 Ne migpanaad diye te Magbebaye ne Manama ka me kabuhalan ni Israil te migkahi, “Ke igbehey nu kanami seini ne me etew, egtamtamanan ney iya te eglundus ka me lungsud dan.”
3 Ne intabak te Magbebaye ka inhangyu te me kabuhalan ni Israil, wey imbehey rin iya kandan ka me Kanaanen. Ne indereetan dan iya ka me Kanaanen wey ka me lungsud dan. Purisu ingngaranan ka seeye ne inged te Hurma.
4 Ne nataman, nangipanew e man‑e sikandan puun te Bubungan ne Hur, wey diye migbaye te dalan ne egpeendiye te Malalab ne Dahat, eyew eg-alihu te inged ne Idum. Piru naawaan te pegpariralem ka me kabuhalan ni Israil taheed te nangipanew sikandan.
5 Ne migsagsahukul sikandan te Manama wey ki Muwisis te migkahi, “Mania te impalihawang key pad nikeykew puun te Ihiptu eyew re egpatey kayi te disirtu ne ware egkakeen wey egkeinum? Napelaan key e kayi te egkakeen ne ware nanam.”
6 Purisu migpeuyan ka Magbebaye te me uled ne egmanggilu, wey masulug ne me kabuhalan ni Israil ka impangahat wey nammatey.
7 Ne migparani ki Muwisis ka me kabuhalan ni Israil wey migpangananey te migkahi, “Nakasale key su migsagsahukul key ma keykew wey te Magbebaye. Ampu ka ne egpangaween din ka me uled.” Purisu mig-ampu si Muwisis para te me kabuhalan ni Israil.
8 Ne ingkahiyan te Magbebaye si Muwisis, “Himu ka te burunsi ne larawan te uled ne eggilu, wey isel-et nu seini diye te geed ne impes-ek. Ne kene egpatey ka langun ne nakahatan te uled ke egpitew kayi.”
9 Sikan naa, miggimu e si Muwisis te burunsi ne larawan te uled ne eggilu, wey intahu din seini diye te geed ne impes-ek. Ne ka minsan hentew ne egkakahatan te uled, kene egpatey ke egtengteng te sika se burunsi ne uled.
Ka peg-alingkus dan diye te Muwab
10 Ne nataman nangipanew e man‑e ka me kabuhalan ni Israil, wey diyad man‑e sikandan nangekampu te Ubut.
11 Ne nataman, nangipanew e man‑e sikandan puun te Ubut, wey diyad man‑e nangekampu te Abarim ne diye te disirtu ne egkatalipag te Muwab, dapit te igsile.
12 Ne puun diye, nangipanew e man‑e sikandan wey diyad man‑e nangekampu te bangalug ne egngaranan te Sirid.
13 Ne puun diye, nangipanew e man‑e sikandan wey diyad man‑e nangekampu te ilis te Weyig ne Arnun ne diye te disirtu, ne marani te eletanan te tane te me Amurihanen. Eletanan ka Arnun te tane te me Muwabihanen wey te me Amurihanen.
14 Sikan naa ka nasulat diye te Baseen te Gira te Magbebaye ka, “lungsud te Wahib ne sakup te Supa, ka me napu, ka Weyig ne Arnun,
15 ka me kakiliran te bangalug ne nakapatangke diye te lungsud te Ar ne diye te eletanan te Muwab.”
16 Ne puun diye, migpabulus e man‑e ka me kabuhalan ni Israil diye te Bir, ne diye iya ka belun ne diye kahii te Magbebaye si Muwisis, “Libulunga nu ka keet-etawan, su egbehayan ku sikandan te weyig.”
17 Ne mig-ulahing ka me kabuhalan ni Israil te seini ne ulahingen:
“He belun, tulayas ka,
wey eg-ulahingan ney sikeykew!
18 Ka belun ne impakaliyan te me pangulu
wey te me talahuren ne me etew,
pinaahi te me katenged dan.”
Ne nataman nangipanew e man‑e ka me kabuhalan ni Israil puun te disirtu, wey nangendiyad e te Matana.
19 Ne puun te Matana, nangendiyad sikandan te Nahalil, wey puun te Nahalil, nangendiyad sikandan te Bamut.
20 Ne puun te Bamut, migpabulus-bulus sikandan diye te bangalug te Muwab ne marani te puntul te Bubungan ne Pisga ne egpakapantew te disirtu.
Ka pegkatalu enni Sihun wey ni Ug
(Diy. 2:26–3:11)
21 Ne migsuhu ka me kabuhalan ni Israil te me suluhuanen eyew egpalalahen ki Sihun ne Hari te me Amurihanen,
22 “Pabayaa key te tane nu. Kene key egsuwey diye te me kamet wey ke parasan naa, wey kene key eg-inum te weyig diye te me belun niyu. Diye key re iya egbaye te dalan te Hari taman te egpakalihad key te eletanan te tane nu.”
23 Piru ware tuhuti ni Sihun ne egbaye ka me kabuhalan ni Israil te eletanan te tane din. Nasi din mule libulunga ka me sundalu rin wey inlusuran dan ka me kabuhalan ni Israil diye te disirtu, diye te Hahas.
24 Piru natalu sikandan te me kabuhalan ni Israil diye te giraanan, wey naahew e ka tane dan puun te Weyig ne Arnun peendiye te Weyig ne Habuk taman te tane te me Amunihanen ne iyan eletanan ka Hasir.
25 Naahew te me kabuhalan ni Israil ka langun ne siyudad te me Amurihanen lagkes ka Hisbun wey ka langun ne bariyu diye, wey sikandan e mule ka nangugpe.
26 Ka Hisbun iyan siyudad ni Sihun ne Hari te me Amurihanen. Sikandin ka migpakig-ehet dengan te hun‑a ne Hari te Muwab wey mig-ahew te langun ne tane te Hari diye taman te Arnun.
27 Sikan naa ka migkahi ka me talagbalak te,
“Pangendini kew te Hisbun,
ne iyan ka siyudad ni Sihun.
Balbalawi niyu seini te egpasasindeg.
28 Migmanlusud dengan ka me sundalu te Hisbun
ne egpekeiling te hapuy ne migkanlabkanlab
ne nakasilab te lungsud te Ar ne sakup te Muwab,
wey te me bubungan diye te ilis te Weyig ne Arnun.
29 Mekeyid‑u-hid‑u kew se langun ne me matig-Muwab!
Egkareetan kew se keet-etawan ne migsimba te diyus-diyus ne si Kamus!
Imbalahad ni Kamus ne egpekeeles-heles ka me anak din ne me lukes,
wey narakep ni Sihun ne Hari te me Amurihanen ka me anak din ne mengebay.
30 Purisu naawe e ka me kabuhalan te me Amurihanen puun te Hisbun taman te Dibun,
wey nahuhus e ka Nupa wey ka Midiba.”
31 Purisu iyan e nangugpe te inged te me Amurihanen ka me kabuhalan ni Israil.
32 Ne migsuhu si Muwisis te me etew ne egpeiipaten diye te Hasir. Ne impangahew ran ka me bariyu kayi, wey impandeldel ran ka me Amurihanen ne nangugpe diye.
33 Ne migbatiku ka me kabuhalan ni Israil wey migpangendiyad te Basan. Ne miglihawang si Ug ne Hari te Basan duma te langun ne sundalu rin, wey migpakiggira sikandan te me kabuhalan ni Israil diye te Idrii.
34 Piru ingkahiyan te Magbebaye ne Manama si Muwisis, “Kene ka kaaldek su igbehey ku sikandin keykew lagkes ka langun ne keet-etawan din wey ka intiru ne tane din. Ne himuwa nu diye te kandin ka inggimu nu ki Sihun, ka matig-Hisbun ne Hari te me Amurihanen.”
35 Purisu inggimatayan te me kabuhalan ni Israil si Ug lagkes ka me anak wey ka langun ne keet-etawan din, wey warad iya nasame kandan. Ne naangken e te me kabuhalan ni Israil ka tane din.