6
Ka me balaud meyitenged te Nasariyu
1 Ne ingkahiyan te Magbebaye ne Manama si Muwisis,
2 “Kahii nu ka me kabuhalan ni Israil: ‘Emun ke due lukes wey ke malitan naa ne egpanaad te pegka-Nasariyu wey eghalad te pegkeetew rin diye te Magbebaye,
3 keilangan ne kene sikandin eg-inum te binu wey te duma pad ne inumen ne egpekewubug. Kene degma sikandin eg-inum te suka ne inggimu puun te binu, wey ke inumen naa ne ingkeles puun te behas te paras, wey ke egkeen naa te iyam pad ne behas te paras wey ke indampil e.
4 Te intiru ne timpu te pegka-Nasariyu rin, keilangan ne kene sikandin egkeen te minsan nekey ne egpuun te paras, minsan behas de te behas te paras wey ke luwit naa kayi.
5 “ ‘Keilangan ne kene sikandin egpatabulug te kene pad egkeimpusan ka panaad din tenged su matulus sikandin wey nateil para te Magbebaye. Ne egbalaharen din de due ne egmalayat ka bulbul rin te kene pad egkataman ka saad din.
6 “ ‘Ne keilangan man‑e ne kene sikandin egdani-rani te minatey
7 minsan ke amey rin wey ke iney rin naa, ke suled din wey ke atebey rin naa. Keilangan ne kene din eglinditan ka pegkeetew rin tenged de kandan, su ka malayat ne bulbul rin ka palinneu te peghalad kandin diye te Magbebaye.
8 Te intiru ne timpu te pegka-Nasariyu rin, inhalad sikandin diye te Magbebaye.
9 “ ‘Ne emun ke due etew ne egkatigkew egpatey diye te dulug din wey nalinditan ka bulbul rin ne iyan palinneu te peghalad kandin diye te Magbebaye, keilangan ne egpatabulug sikandin te igkapitu ne aldew te peglinis. Ne egmalinis e man‑e sikandin puun te pegkalinditi rin.
10 Te igkawalu ne aldew, keilangan ne eg-uyan sikandin te daruwa ne buuk ne selepati wey ke tukmu naa diye te talagpanubad diye te gumawan te Balungbalung ne Temuwanan.
11 Ne egtutungen te talagpanubad ka sabeka isip egtutungen ne igpanubad, wey ka dangeb, igpalangesa eyew te peglinis te sale. Te seini ne paahi, egkapasaylu ka etew te sale din te pegsamsam din te minatey. Te sika ne aldew, ighalad din e man‑e ka pegkeetew rin wey egpatulinen din e man‑e ka bulbul rin.
12 Ne egbunsud e man‑e sikandin te panaad din te pegka-Nasariyu. Keilangan ne eg-uyan man‑e sikandin te lukesan ne nati te karniru ne sabeka pad ne leg‑un se kabuyahi eyew igpanubad tenged te sale din. Ne tenged te nalinditan ma sikandin, eg-isipen ne ware karuan te me aldew te pegka-Nasariyu rin dengan te ware pad sikandin nalinditi.
13 “ ‘Ne seini ka eggimuwen para te Nasariyu ke egkeimpusan e ka panaad din: eg-uyanen sikandin diye te gumawan te Balungbalung ne Temuwanan.
14 Ne eg-uyan sikandin te lukesan ne nati te karniru ne sabeka pad ne leg‑un se kabuyahi wey ware nabalbalangi eyew igpanubad ne egtutungen, wey sabeka ne beyan ne nati te karniru ne sabeka man‑e ne leg‑un se kabuyahi wey ware nabalbalangi eyew igpalangesa ne ig-awe te sale. Eg-uyan man‑e sikandin te sabeka ne lukesan ne karniru ne ware nabalbalangi isip panubad para te keupianan.
15 Ne eg-uyan man‑e sikandin te senge-liyang ne paan ne ware patulin ne inggimu puun te meupiya ne klasi te harina ne linuyang te mentika, wey mannipis ne paan ne impamulitan te mentika duma te halad ne egkakeen wey binu.
16 Ne eg-uyanen seini te talagpanubad diye te tangkaan te Magbebaye ne Manama wey ighalad din ka halad eyew te peglinis te sale, wey ka igpanubad ne egtutungen.
17 Ne igpanubad te talagpanubad diye te Magbebaye ka lukesan ne karniru isip igpanubad ne para te keupianan, duma te senge-liyang ne paan ne ware patulin. Ne eghalad man‑e sikandin te binu wey halad ne egkakeen ne egpuun te egketuen ne pinamula.
18 Ne egpatabulug ka Nasariyu diye te gumawan te Balungbalung ne Temuwanan. Ne egkuen din ka bulbul rin ne palinneu te peghalad kandin diye te Magbebaye, wey igtuug din seini te hapuy ne intutungan te impanubad para te keupianan.
19 “ ‘Ne emun ke egkeimpusan e te egtabulug ka Nasariyu, egkuwa ka talagpanubad te pamanayen te lukesan ne karniru ne impakalkalaan, wey daruwa ne paan—manipis ka sabeka wey makepal ka sabeka ne neelin ne ware patulin, wey igbehey rin seini te Nasariyu.
20 Ne egkuen e man‑e seini te talagpanubad wey igkayew rin diye te tangkaan te Magbebaye isip egkayawen ne igpanubad. Matulus seini ne baad te halad wey kandin seini te talagpanubad, lagkes ka kumeng wey ka bubun te karniru ne ingkayew degma diye te tangkaan te Magbebaye. Ne pegkeimpus kayi, egkaayun e man‑e ne eg-inum te binu ka Nasariyu.’
21 “Seini ka balaud para te sabeka ne Nasariyu ne egpanaad: ka igpanubad din te Magbebaye keilangan ne eleg iya te impanaad din isip Nasariyu. Ke duen pad igtimul rin, keilangan ne egtumanen din iya seini sumale te balaud te pegka-Nasariyu.”
Ka peg-ampu te talagpanubad
22 Ne ingkahiyan e man‑e te Magbebaye si Muwisis,
23 “Kahii nu si Aarun wey ka me anak din te eg-ilingen dan kayi te eg-ampu para te me kabuhalan ni Israil,
24 ‘Egpanalanginan wey egbantayan kew te Magbebaye.
25 Igkeyid‑u kew te Magbebaye wey egtumpisan kew nikandin.
26 Igkahale kew te Magbebaye wey egbehayan kew nikandin te keupianan.’ ”
27 Ne migkahi ka Magbebaye, “Ke egdawiten ni Aarun wey te me anak din ka ngaran ku eyew egpanalanginan ku ka keet-etawan ku ne me kabuhalan ni Israil, egpanalanginan ku iya sikandan.”