7
Ka me halad te me pangulu
1 Te neimpusan e ni Muwisis te egpasasindeg ka Matulus ne Balungbalung ne in-alad, immapespesikan din e seini te lana wey inhalad din e diye te Magbebaye ne Manama duma te langun ne kasangkapan kayi. Ne in-itisan din e degma te lana ka altar wey ka langun degma ne kasangkapan kayi.
2 Ne migpanguyan te me halad para te Magbebaye ka me pangulu te Israil wey ka me pangulu te tagse tribu ne impiyalan degma ne egpangulu te seeye se immanlista.
3 Migpanguyan sikandan te hen‑em ne karwahi wey sapulu wey daruwa (12) ne baka. Tigsabeka ne buuk ne karwahi ka egpuun te tagse daruwa ne pangulu, wey tigsabeka ne buuk ne baka ka egpuun te tagse sabeka kandan. Impanguyan dan seini diye te tangkaan te Magbebaye.
4 Ne ingkahiyan te Magbebaye si Muwisis,
5 “Dawata nu ka me halad dan eyew egkahamit seini para te me himu te pegtrabahu diye te Balungbalung ne Temuwanan, wey ibehey nu seini diye te me kabuhalan ni Libi sumale te egkeilanganen te tagse sabeka ke nekey ka eggimuwen din.”
6 Purisu indawat ni Muwisis ka me karwahi wey me baka, wey imbehey rin e seini diye te me kabuhalan ni Libi.
7 Daruwa ne karwahi wey hep‑at ne baka ka imbehey rin te me anak ni Girsun sumale te egkeilanganen te tagse sabeka ke nekey ka eggimuwen din.
8 Ne hep‑at ne karwahi wey walu ne baka ka imbehey rin te me anak ni Mirari sumale te egkeilanganen te tagse sabeka ke nekey ka eggimuwen din. Ne iyan dan pangulu si Itamar ne anak ni Aarun.
9 Piru ware behayi ni Muwisis ka me anak ni Kuhat minsan sabeka su sikandan ma ka impiyalan te pegtiang te me kasangkapan ne ingkahalad e diye te Manama.
10 Te timpu ne in-itisan e te lana ka altar, migpanguyan e degma te me dasag ka me pangulu para te peghalad kayi. In-uyan dan seini diye te tangkaan te altar.
11 Ne ingkahiyan te Magbebaye si Muwisis, “Keilangan ne tagse aldew te sapulu wey daruwa (12) ne aldew, tigsabeka re ne pangulu ka eg-uyan te me dasag para te peghalad te altar.”
12-83 Te an-anayan ne aldew, iyan eg-uyan te ighalad si Naasun ne anak ni Aminadab, ka pangulu te me kabuhalan ni Huda. Te igkarangeb ne aldew, iyan eg-uyan te ighalad si Natanail ne anak ni Suar, ka pangulu te me kabuhalan ni Isakar. Te igkatelu ne aldew, iyan eg-uyan te ighalad si Iliyab ne anak ni Hilun, ka pangulu te me kabuhalan ni Sabulun. Te igkeep‑at ne aldew, iyan eg-uyan te ighalad si Ilisur ne anak ni Sidiyur, ka pangulu te me kabuhalan ni Rubin. Te igkalimma ne aldew, iyan eg-uyan te ighalad si Silumil ne anak ni Surisaday, ka pangulu te me kabuhalan ni Simyun. Te igkeen‑em ne aldew, iyan eg-uyan te ighalad si Iliyasap ne anak ni Diyuwil, ka pangulu te me kabuhalan ni Gad. Te igkapitu ne aldew, iyan eg-uyan te ighalad si Ilisama ne anak ni Amihud, ka pangulu te me kabuhalan ni Ipraim. Te igkawalu ne aldew, iyan eg-uyan te ighalad si Gamalil ne anak ni Pidasur, ka pangulu te me kabuhalan ni Manasis. Te igkasiyam ne aldew, iyan eg-uyan te ighalad si Abidan ne anak ni Gidyun, ka pangulu te me kabuhalan ni Binhamin. Te igkasapulu (10) ne aldew, iyan eg-uyan te ighalad si Ahisir ne anak ni Amisaday, ka pangulu te me kabuhalan ni Dan. Te igkasapulu wey sabeka (11) ne aldew, iyan eg-uyan te ighalad si Pagil ne anak ni Ukran, ka pangulu te me kabuhalan ni Asir. Te igkasapulu wey daruwa (12) ne aldew, iyan eg-uyan te ighalad si Ahira ne anak ni Inan, ka pangulu te me kabuhalan ni Naptali.
Egmekeg-iling-iling de ka me halad ne eg-uyanen te tagse sabeka ne pangulu: sabeka ne buuk ne palatu ne pelata ne senge-kilu wey liware ka kabehat, wey sabeka ne buuk ne pelenggana ne pelata ne walu ne gatus (800) ne gramu. Egtimbangen seini diye te timbangan te me talagpanubad. Ne ka tagse sabeka kayi, eggipenuen te meupiya ne klasi te harina ne in-amutan te mentika isip halad ne egkakeen. Eg-uyan man‑e sikandan te sabeka ne buuk ne palatu ne bulawan ne 114 ne gramu se kabehat ne eggipenuen te insinsu. Ne eg-uyan man‑e sikandan te sabeka ne lukesan ne nati te baka, sabeka ne lukesan ne karniru, sabeka ne lukesan ne nati te karniru ne sabeka pad ne leg‑un se kabuyahi eyew igmanubad ne egtutungen, wey sabeka ne lukesan ne kambing isip igpalangesa ne ig-awe te sale. Eg-uyan man‑e ka tagse sabeka te daruwa ne turu ne baka, lalimma ne lukesan ne karniru, lalimma ne lukesan ne kambing, wey lalimma ne nati te karniru ne tigsabeka ne leg‑un se kabuyahi, eyew igpanubad diye te Magbebaye para te keupianan.
84 Seini ka me dasag te sapulu wey daruwa (12) ne pangulu te Israil te timpu te peghalad te altar: sapulu wey daruwa (12) ne palatu ne pelata, sapulu wey daruwa (12) ne pelata ne yahung, wey sapulu wey daruwa (12) ne bulawan ne ubab.
85 Sabeka ne kilu wey liware ka kabehat te tagse sabeka te palatu ne pelata, wey tigwalu ne gatus (800) ne gramu ka pelata ne yahung. Ne intimbang seini diye te timbangan te me talagpanubad wey daruwa ne pulu wey walu (28) ne kilu ka langun.
86 Nenapenu te insinsu ka sapulu wey daruwa (12) ne bulawan ne ubab ne 114 ne gramu ka tagse sabeka. Ne intimbang seini diye te timbangan te me talagpanubad wey 1,368 langun ne gramu seini.
87 Ne seini ka kasuluhan te langun ne mananap ne egtutungen ne igmanubad: sapulu wey daruwa (12) ne nati ne turu ne baka, sapulu wey daruwa (12) ne lukesan ne karniru, wey sapulu wey daruwa (12) ne lukesan ne nati te karniru ne tigsabeka ne leg‑un se kabuyahi duma te me halad ne egkakeen ne egpuun te egketuen ne pinamula. Ne due man‑e sapulu wey daruwa (12) ne kambing ne igpalangesa ne ig-awe te sale.
88 Ne seini ka kasuluhan te langun ne mananap ne egtutungen ne igmanubad para te keupianan: daruwa ne pulu wey hep‑at (24) ne turu ne baka, hen‑em ne pulu (60) ne lukesan ne karniru, hen‑em ne pulu (60) ne lukesan ne kambing, wey hen‑em ne pulu (60) ne lukesan ne nati te karniru ne tigsabeka ne leg‑un se kabuyahi. Sika ka langun ne igdasag te peghalad te altar ke igkahalad e seini.
89 Ne emun ke egseled si Muwisis te Balungbalung ne Temuwanan eyew te pegpakiglalag te Magbebaye ne Manama, egkarineg din ka laheng ne egpakiglalag kandin. Egpuun ka laheng diye te elat-elat te daruwa ne kirubin ne diye te ampew te Tahuanan te Kasabutan.