14
1 Ka malitan ne matagseb, egpakalig‑en te pamilya rin,
piru ka malitan ne ungel, egpakahuhus te pamilya rin.
2 Ka matareng ne etew, egkaaldek te Magbebaye ne Manama,
piru egpakabaley-baley re te Manama ka etew ne eggimu te mareet.
3 Ka egpanlalahen te ungel ne etew, egpekeuyan te parusa para kandin,
piru ka egpanlalahen te matagseb ne etew, egpakabulig mule kandin.
4 Ke ware baka nu ne igdaru, ware egkahaani nu,
piru ke due baka nu ne manekal ne igdaru, egkapenu ka lelapeng nu.
5 Ka egkasalihan ne egpamalehet, egpangguhud te malehet,
piru ka kene egkasalihan, eg-uubat de iya.
6 Ka etew ne lemeten, kenad iya egpakaangken te katagseb minsan egmemenu pad sikandin,
piru ka etew ne due salabutan, mahaan de egkateu.
7 Pariyu ka te seeye se me ungel
su ware egkaangey nu ne katuenan puun kandan.
8 Ka katagseb te etew ne due salabutan, egpakabulig kandin te pegnengneng te eleg ne eggimuwen din,
piru ka keungelan te ungel ne etew, egpakaakal te pegkeetew rin.
9 Hendue te ware de diye te me ungel ne etew ke egpakasale sikandan,
piru ka me matareng, egkeupian mule ne egkapasaylu ka me sale dan.
10 Sikeykew re ka nakanengneng te kalaggew wey kahale nu,
wey ware degma duma ne egkabaaran kayi.
11 Egdereetan ka baley te maddeet ne me etew,
piru egmatubung ka peg-ugpe te taltalaanak ne matareng.
12 Due dalan ne egkahiyen nu ne eleg,
piru egpeendiye bes seini te kamatayen.
13 Egkaayun ne iggeles ka peglungku pinaahi te pegngisi,
piru ke egkapenge e ka pegngisi, duen ded ka pegkalaggew.
14 Egkarawat te mareet ne etew ke nekey ka eleg para kandin,
wey egdasahan ka meupiya ne etew te meupiya ne hinimuwan din.
15 Ka etew ne ware aperu, egpalintutuu te minsan nekey,
piru ka matagseb ne etew, egtanud-tanud te eleg ne egbayaan din.
16 Ka matagseb ne etew, egbantey te pegkeetew rin wey egpariyu te mareet,
piru ka ungel, nasi mule egparani te gubut.
17 Ka etew ne mahaan de egkabelu, egpekeyimu te keungelan,
wey ka etew ne migplanu te mareet, igkalangeti te Manama.
18 Ka me etew ne ware aperu, egpakahaani te behas te me keungelan dan,
piru ka me matagseb ne etew, egdasahan te katuenan dan.
19 Ka maddeet ne etew, egpanimbuel diye te matareng ne me etew
wey egpeyid‑u-hid‑u ne egpabulig kandan.
20 Ware egkeupian te me etew ne egkaayu-ayu, minsan ka me sumbaley ran,
piru masulug mule ka alukuy te me meyaman.
21 Sale ka peglemet te minsan hentew,
piru egpanalanginan seeye se egkeyid‑u te egkengaayu-ayu.
22 Egpakasale ke re ke egsuman-suman ka te mareet diye te duma,
piru ke egsuman-suman ka te meupiya, eggeyinawaan ka te etew wey eg-unungan ka.
23 Egpakabehey te keupianan ka pegtrabahu,
piru egpakaayu-ayu ka iyan de eggimuwen se egpeggasal.
24 Egdasahan te karatuan ka matagseb,
piru ka dasag te me ungel, iyan de iya degma ka subla pad ne keungelan.
25 Ka malehet ne talagpamalehet, egpakaluwas te masulug ne umul,
piru ka ubaten, kene egkasalihan.
26 Ka etew ne due pegkaaldek te Magbebaye, ware igkangilam,
wey egkeyimu sikandin ne aputanan te me anak din.
27 Ka pegkaaldek wey ka pegtahud te Magbebaye
ka egpuunan te umul wey sika ka paahi te peg-alihu te kamatayen.
28 Egmabantug ka Hari ke masulug ka me sakup din,
piru ke ware sakup din, egkareetan din iya.
29 Matagseb ne subla ka etew ne mananey egkabelu,
piru ka mahaan de egkabelu, migpeila re ne ungel sikandin.
30 Egpakameupiya te lawa ka meupiya ne suman-suman,
piru ka pegkeimma, egpekeiling te dalu ne egpakamahebu te tul‑an.
31 Ka seeye se egdeeg-deeg te egkengaayu-ayu,
migpakita ne inlemetan din ka Magbebaye ne miggimu kandan.
Piru ka egkeyid‑u te seeye se egkengaware-ware,
migpakita te pegtahud din te Magbebaye.
32 Egpatey ka mareet ne etew tenged te mareet ne hinimuwan din,
piru egbulihan ka matareng minsan te timpu te kamatayen din.
33 Ka etew ne due salabutan, katagseb de ka egsumsumanen,
piru ka etew ne ungel, warad iya hanew meyitenged te katagseb.
34 Egmalig‑en ka sabeka ne nasud ke matareng ka me mahinged kayi,
piru ke eggimu sikandan te sale, egkeyilawan iya ka nasud dan.
35 Igkabennali te Hari ka suluhuanen ne matagseb,
piru egparusaan din ka suluhuanen ne egpakapeyilew kandin.