15
1 Egpakaawe te langet ka meupiya ne tabak,
piru egpekeundul te langet ka malangit ne lalag.
2 Egpakabehey te katuenan ka me lalag te matagseb ne etew,
piru ware karuan te me lalag te egkeungel.
3 Egkakita te Magbebaye ne Manama ka langun diye te minsan hendei ne inged,
egkakita rin ka eggimu te mareet wey meupiya.
4 Egpakabehey te umul ka me meupiya ne lalag,
piru ka me mallangit ne lalag, egpakamasakit te pusung.
5 Kene egdawaten te ungel ne etew ka pegpanulu te amey rin,
piru egdawaten seini te matagseb ne etew.
6 Due dakel ne karatuan diye te baley te matareng,
piru egkaddeetan ka me karatuan te me maddeet.
7 Egpekeempet ka katuenan pinaahi te pegpanulu te me matagseb,
wey kene ne pinaahi te me ungel.
8 Egkahale ka Magbebaye ke eg-ampu ka me matareng,
piru igkeepes din ka me halad te maddeet ne me etew.
9 Egkalindit ka Magbebaye te me hinimuwan te etew ne maddeet,
piru eggeyinawaan din mule ka eggimu te matareng.
10 Egdisiplineen te mangune-kune ka seeye se eg-engked te matareng ne dalan,
wey egpatey ka kene egdawat te me panulu.
11 Ke nanengnengan te Magbebaye
ka diye te inged te me minatey,
iyan naan pa ka suman-suman te etew.
12 Ka me etew ne lemeten, kene egkeupian ne egsaparan,
sikan naa ka egpariyu sikandan te matagseb.
13 Eggimun-gimun ka etew ne nahale,
piru eglungku sikandin ke due igkalaggew rin.
14 Ka etew ne due salabutan, egkeupian te katuenan,
piru keungelan de ka igkeupii te ungel.
15 Malised layun ka egkeula-ula te egkengaayu-ayu,
piru ka etew ne egkahale de due,
egkahale iya sikandin te tagse aldew.
16 Meupiya pad ka egkaayu-ayu ne due pegkaaldek te Manama
du te meyaman ne kene egkataman se samuk.
17 Meupiya pad ke egkeen ke re te gulay duma te inggeyinawaan nu
du te egkeen ka te mananam ne ngalap ne egkalangetan ke re due.
18 Ka etew ne mahaan de egkabelu, iyan egpuunan te samuk,
piru ka etew ne egpariralem, egpakapapeeneng-eneng te egpeg-ehetey.
19 Ka etew ne pehulen, egkalised-lised minsan hendei,
piru mateles mule ka peg-ugpe te matareng.
20 Egpakapahale te amey wey iney ka anak ne matagseb,
piru egpekeyilew kandan ka ungel.
21 Igkahale te ungel ka keungelan din,
piru ka due salabutan, eggimu te matareng.
22 Kene ka eglampus te eggimuwen nu ke ware egpakatambag keykew,
piru ke masulug ka egtambag keykew, eglampus ka iya.
23 Amana egkahale ka etew ke egpakatabak sikandin te eleg ne tabak.
Meupiya naan de iya ke egpakaselengan te eleg ne timpu ka eleg ne tabak din.
24 Ka matareng ne etew, eg-ikul te dalan ne egpeendiye te umul,
wey eg-alihu sikandin te dalan ne egpeendiye te kamatayen.
25 Egguhusen te Magbebaye ka me baley te me etew ne hambuhen,
piru egbantayan din mule ka karatuan te me balu.
26 Igkalindit te Magbebaye ka me suman-suman te maddeet ne etew,
piru igkahale din ka meupiya ne me peglalag.
27 Ka etew ne egpakaangken te karatuan te mareet ne paahi,
egpekeuyan te samuk te pamilya rin.
Piru egmalayat mule se umul te etew ne kene egdawat te sagpeng te be‑be.
28 Ka matareng ne etew, egsuman-suman te kene pad sikandin egtabak,
piru ka mareet ne etew, mahaan egtabak piru egpekeuyan seini te samuk.
29 Egpamminehen te Magbebaye ka me peg-ampu te matareng,
piru kene din eglinglingeen ka maddeet.
30 Egpakapahale ka peggimun-gimun
wey egpakabagget ka meupiya ne guhuren.
31 Egmatagseb ka etew ne egpammineg ke egsaparan.
32 Ke kene ka eglinga-linga te me panulu,
egkareetan ka pegkeetew nu.
Piru ke egpammineg ka te me panulu,
egkatimulan ka katagseb nu.
33 Ka pegkaaldek te Magbebaye
ka egpakapanulu te katagseb.
Ka pegpariralem egpakapanulud te etew eyew egmabantug.