21
1 Egbuutan te Magbebaye ne Manama ka suman-suman te Hari
iling te pegpatulayas din te weyig minsan hendei.
2 Egsuman-suman ka etew ne eleg ka langun ne inggimu rin,
piru eg-ug-ugsiyen te Manama ka pusung din.
3 Egkahale pad ka Magbebaye
ke eleg wey matareng ka eggimuwen ta
du te igmanubad ne mananap.
4 Sale ka egpaambug wey egparibabew;
sika ka ilaan te me etew ne maddeet.
5 Emun ke egplanu ka te meupiya wey egbasuk ka, egmatubung ka iya.
Piru ke egkaana-ana ka ne egmeyaman, nasi ka egkaayu-ayu.
6 Ka karatuan ne egkaangken pinaahi te limbung
mahaan de egkaamin wey egpanulud diye te kamatayen.
7 Ka kabulut te maddeet ne etew,
iyan ded egpakarereet kandan,
su ware ma sikandan miggimu te matareng.
8 Ka etew ne nakasale, mig-ikul te dalan ne nabegkul,
piru ka ware sale, mig-ikul te dalan ne matul-id.
9 Meupiya pad ke diye ka eg-ugpe te ampew te atep te baley nu,
du te eglemung ka te asawa nu ne matalabad.
10 Ka maddeet ne etew, layun naan de mareet ne himu se igkeupii,
wey ware himenew ran te duma.
11 Emun ke egparusaan ka me etew ne egbaley-baley te duma,
egkapanulu ka me ware aperu wey egkengeyimu sikandan ne matagseb.
Ne emun ke egpanuluen ka matagseb, egkatimulan pad ka katuenan din.
12 Ka Manama ne matareng,
nakakita te me hinimuwan te me makasesale diye te baley ran,
wey egparusaan din sikandan.
13 Emun ke kene nu egpamminehen ka pegpeyid‑u-hid‑u te egkengaayu-ayu,
kene degma egtabaken ka pegpeyid‑u-hid‑u nu.
14 Ke due egkabelu keykew,
egkaawe ka langet din ke egduwaran nu te heles de.
15 Emun ke egkatuman ka eleg ne peggukum,
egkahale ka me matareng,
piru egkasuhey mule ka maddeet.
16 Ka etew ne kene eggamit te katuenan,
diye iya egpangkus te inged te me minatey.
17 Ka minsan hentew ne egkeupian ne eggale-gale wey egsahakeen, egkaayut-ut iya;
ka minsan hentew ne egkaam-amanaan te binu wey te me mahal ne peemut,
kene iya egkaratu.
18 Egkaluwas puun te parusa ka me matareng,
piru egkabay-bayaran mule ka me maddeet.
19 Meupiya pad ke diye ka eg-ugpe te inged ne ware mahinged,
du te eglemung ka te asawa nu ne apulen wey malangit.
20 Ka me etew ne matagseb, egmatubung ka peg-ugpe dan
piru ka me ungel, eg-aminen dan de te eggastu ka diye te kandan.
21 Ka etew ne eg-ugpe ne matareng wey hiid‑uwen te duma,
egpakaangken te malayat ne umul, egmatubung, wey egmabantug.
22 Ka matagseb ne etew, egpakaahew te siyudad
ne imbantayan te mabbulut wey me makeseg ne me etew,
wey egguhusen din ka malig‑en ne alad ne insalihan dan.
23 Ka etew ne egbantey te me lalag din,
mariyu te samuk.
24 Ka etew ne amana egpeggasal, egparibabew,
wey egpanlemet te duma,
egngaranan te “Hambuhen”.
25 Ka igkeupii te pehulen ne etew,
egpekeuyan kandin diye te karereetan
su kene ma sikandin egtrabahu.
26 Due me etew ne iyan de ugpe se egpalelehed.
Piru ka me etew ne matareng,
kene mule egkannuhun ne egpamehey.
27 Igkeepes te Magbebaye ka igmanubad te maddeet ne etew,
wey naan pa iya ka igmanubad dan ne egdumaan te mareet ne igkeupii ran.
28 Egpatey ka kene ne malehet ne tigpamalehet,
piru kene egpatey ka egguhud te malehet.
29 Ka mareet ne etew, egpaambug te neyimu rin,
piru ka matareng ne etew, egsuman-suman pad mule ke nekey ka neyimu rin.
30 Ware eglampus ne katuenan, salabutan, wey ke planu naa
ke kene egpuun te Magbebaye.
31 Minsan ke naandam e ka me kudde para te pegpakiggira,
piru ka Manama red iya man‑e ka egpakabehey te kapanaluwan.