22
1 Meupiya pad ka bantug,
du te dakel ne karatuan;
meupiya pad ke igkabennali ka te me etew,
du te bulawan wey ke seleppi naa.
2 Ware kaleinan te me meyaman wey te egkengaayu-ayu
su nekeg-iling de sikandan ne inggimu te Magbebaye ne Manama.
3 Ka matagseb ne etew, egpakakita te egginguma ne karereetan,
purisu egpakapanalliye e mule sikandin daan.
Piru ka etew ne ware aperu,
egsahap iya mule, wey egkabaybayaran.
4 Ka dasag te pegpariralem, wey pegkaaldek te Magbebaye,
iyan ka me karatuan, kabantug, wey malayat ne umul.
5 Ka maddeet ne etew, eggipanew te dalan ne masulug se karereetan wey samuk,
piru eg-alihu mule te seeye ne dalan ka egbantey te pegkeetew rin.
6 Panulua nu ka bate te eleg ne eggimuwen din;
kene din seini eglingawan minsan egkabuyag sikandin e.
7 Egmanduan te me meyaman ka egkengaayu-ayu
wey egmanduan te talagpeutang ka migpangutang.
8 Ka migpamula te mareet ne himu,
eggaani te karereetan,
wey egkataman e ka pegpandeeg-deeg dan te duma.
9 Egpanalanginan seeye se matumpis
su migpanalad ma sikandan te egkakeen diye te egkengaayu-ayu.
10 Ke egdeldelen nu ka etew ne lemeten,
egkasanggel e degma ka pegpaap-apuley, pegpeehetey,
wey ka pegpataltalesebey.
11 Emun ke malinis se suman-suman nu,
wey meupiya ka ne eglalag,
egkaalukuy nu ka Hari.
12 Eg-ay-ayaran egtamengi te Magbebaye ka malehet ne katagseb,
piru egdereetan din mule ka me planu te me akalen.
13 Ka pehulen ne etew, eg-uugpe de te baley wey egkahi,
“Kema ke egdawiyen a te liyun ke eglihawang a.”
14 Ka mekein-inniyat ne me lalag te egpalibug-libug ne malitan,
egpekeiling te maralem ne bitu te karereetan.
Ne egkengeulug iya kayi ka langun ne igkalangeti te Magbebaye.
15 Batasan iya te bate ka eg-ungel-ungel,
piru egmatareng ded sikandin ke egpanuluen.
16 Ka etew ne egdeeg-deeg te egkaayu-ayu,
wey ke egdasag naa te meyaman eyew egkaratu sikandin,
nasi sikandin egkaayut-ut.
Ka tatelu ne pulu ne me lalahen
17 Pammineg ka te me lalag te matagseb ne me etew wey tantanuri nu seini.
18 Egkahale ka iya ke egtantanuran nu seini wey egkalalag nu.
19 Egkeupian a ne egsalig ka te Magbebaye, sikan naa ka inlalag ku seini keykew.
20 Migsusulat a te tatelu ne pulu (30) ne me panulu para kaniyu. Dakel ka egkaangey niyu ne katuenan wey me meupiya ne me tambag.
21 Ne pinaahi kayi egkanengnengan nu ka kamalehetan, wey egpakatabak ka te malehet te seeye se eg-inse keykew.
-1-
22 Kene ka leig-leig te egkengaayu-ayu su ware egkeyimu ran wey kene nu dieki ka katenged dan diye te hukumanan,
23 su egpangabangan sikandan te Magbebaye, wey eggimuwen din keykew ka inggimu nu diye te kandan.
-2-
24 Kene ka alukuy te me etew ne lelangeten wey mahaan egkabbelu,
25 su kema ke egkaalinan ka te batasan dan wey kene kad e egpekeengked due.
-3-
26 Kene ka saad ne sikeykew ka egbayad te utang te duma ne etew
27 su ke kene ka egpakabayad, egpanguen dan minsan ka hibatanan nu.
-4-
28 Kene nu halina ka tapey ne eletanan te tane ne intahu te kaap-apuan nu.
-5-
29 Ka etew ne meupiya ne egtrabahu, diye egpamakey te me Hari, wey kene ne diye te lerew re ne me etew.