7
Ka malitan ne egpanpanlibug
1 Anak, pammineha nu ka me lalag ku keykew wey tantanuri nu ka me suhu ku.
2 Itines nu te pusung nu ka impanulu ku keykew, wey tumana nu ka me suhu ku eyew egmalayat ka umul nu. Isipa nu ka impanulu ku ne iling te amana nu igkannuhun ne kasangkapan nu.
3 Ibibinukul nu wey itines nu te pusung nu eyew kene nu egkalingawan.
4 Isipa nu ka katagseb ne iling te atebey nu, wey ka salabutan iling te suled nu.
5 Sika ka egpakapariyu keykew puun te egpalibug-libug ne malitan wey te egpekeinniyat ne me lalag din.
6 Sabeka ne aldew, migpampamintana a diye te baley ku
7 wey due nakita ku ne me kanakan ne ware pad me aperu. Ne due sabeka kandan ne kene egtulik.
8 Ne migpatiralan sikandin diye te marani te pikungan ne in-ugpaan te malitan.
9 Maapun e seeye wey egpangilumkilum e.
10 Ne insinug-ung e sikandin te malitan ne migkukumbale iling te malitan ne egpamelegye te lawa, wey migplanu te mareet.
11 Matale ka seeye ne malitan, wey ware hilew, wey kene egpakatelen te baley.
12 Senge-kakuwa ne eg-eatang sikandin diye te bebalakan, wey ke diye naa te deralanen, wey diye te me palingkiyan.
13 Ne inleheng din ka lukes-lukes wey inggarekan, intetengtengan din ka mata wey ingkahiyan,
14 “Kuntee ne aldew mighalad a wey nabayaran kud e ka me saad ku.
15 Purisu seini a ka egpamitew keykew wey nakita kud en iya sikeykew!
16 Inhagpiyan ku ka hibatanan ku te mabatek ne hinabel ne egpuun te Ihiptu.
17 Impeemutan ku seeye te mira, alu wey sinamun.
18 Mahaan ka su egpewulirey ki te egkapawaan taman te egkapelaan kid.
19 Ware diye te baley ka asawa ku su miggipanew sikandin diye te mariyu.
20 Mig-uyan sikandin te dakel ne seleppi wey kene buwa egpekeuli te me daruwa ne simana.”
21 Purisu natintal din ka lukes-lukes pinaahi te kateles din wey te mekein-inniyat ne me lalag din.
22 Te sikan de, migdume en iya kandin ka lukes-lukes, iling te turu ne baka ne diye egpabulus te gilanganan, wey iling te kuleping ne diye egpabulus te due balatik
23 taman te natampakan e te pane ka pusung din. Egpekeiling sikandin te manuk-manuk ne diye egpabulus te luyluy wey ware nakataha te kamatayen ka eggingumaan din.
24 Purisu pammineg kew keddi me anak, wey tantanuri niyu ka iglalag ku kaniyu.
25 Pariyu kew te iling due ne malitan wey kene kew patintal kandin.
26 Su masulug e ka me lukes ne naddeetan, wey kenad egkaseel ka nammatey tenged kandin.
27 Ka baley rin dalan peendiye te Siyul ke eg-ikul ka te sika ne dalan egpabulus ka te inged te me minatey.