8
Indayan ka katagseb
1 Pammineg kew! Migpangumew ka katagseb iling te etew;
migparineg-dineg ka katuenan te laheng din.
2 Diye sikandin migsasindeg te matikang ne me inged,
diye te ilis te dalan wey te me bebalakan.
3 Migpangumew sikandin diye te kakiliran te me gumawan te siyudad,
diye te egkatangkaan ne gumawan ne bayaanan te egseled te siyudad. Migkahi sikandin,
4 “Migpangumew a kaniyu, keet-etawan;
migpanulekuk a kaniyu langun.
5 Sikaniyu se me ware pad hanew, bebasbas kew ne egmatesan e ka me suman-suman niyu!
Sikaniyu se me ungel, suman-suman kew e!
6 Pammineha niyu ka eglalahen ku,
su dakel ka karuan kayi wey eleg.
7 Malehet iya ka eglalahen ku
su igkeepes ku ka ubat.
8 Malehet ka langun ne eglalahen ku;
kene ne ubat wey ke limbung naa.
9 Amana ne klaru seini te etew ne egpakasabut,
wey eleg iya te etew ne masulug se natuenan.
10 Iyan niyu alama ka me panulu ku du te seleppi,
wey iyan niyu awesa ka katuenan du te bulawan.
11 “Su ka katagseb, subla pad ne dakel se karuan du te mahal ne me batu.
Ne ware iya labew pad te katagseb te langun ne igkeinniyat niyu.
12 Sikeddi ka katagseb! Egkateu a ne egtengteng ke nekey ka malehet,
wey egkateu a ne eg-alam ke nekey ka eleg.
13 Ka pegkaaldek te Magbebaye ne Manama, iyan sika se pegdumut te mareet.
Igkeepes ku ka egpaambug wey ka egparibabew,
ka kene ne meupiya ne me paahi, wey ka mareet ne me lalag.
14 Meupiya a ne egtambag wey matagseb a.
Due salabutan ku wey geem.
15 Ne tenged keddi, egpakamandu ka me Hari.
Ne ka me pangulu, egpekeyimu te meupiya ne me Balaud.
16 Tenged keddi, ka me pangulu wey ka me Hari,
egpakamandu te keet-etawan te matareng ne paahi.
17 Inggeyinawaan ku ka miggeyinawa keddi,
wey egpakakita keddi ka migpamitew keddi.
18 Egpakabehey a te karatuan,
kabantug, keupianan wey katubung.
19 Dakel ka keupianan te etew ne egdawat keddi,
subla pad te mahal ne bulawan
wey mateles ne pelata.
20 Mig-ikul a te dalan te katareng,
wey te eleg ne peggukum.
21 Inggimu ku ne meyaman ka miggeyinawa keddi,
wey inggipenu ku te karatuan ka me baley ran.
22 “Sikeddi ka an-anayan ne inggimu te Magbebaye te langun ne inggimu rin. Duen ad te ware pad neyimu ka langun.
23 Sikeddi iya ka an-anayan ne inggimu te Manama
te ware din pad himuwa ka kalibutan.
24 Duen ad e te ware pad ka me pused te dahat;
tapey ad ne due te ware pad ka me bunlud.
25 Duen ad e te ware pad ka me katalunan, wey me bubungan,
26 te ware pad himuwa te Magbebaye ka kalibutan, ka tane wey te ware pad ka me kallatian.
27 Duen ad e te peggimu rin te me langit,
wey te pegtahu din te eletanan te langit wey te tane,
28 te pegtahu din te me gapun diye te langit,
te pegluwang din te sebseb,
29 te pegtahu din te eletanan te dahat
eyew kene seini egsibu.
Duen ad e te pegtahu din te me pabunsuran te kalibutan.
30 Duen a te dulug din iling te talagbebaley.
Nakapahala a kandin tagse aldew;
egkahala a layun duma kandin.
31 Amana a egkahale ne eg-ugpe te kalibutan duma te me etew.”
32 “Purisu me anak, pammineha a kuntee.
Due keupianan te seeye se eg-ikul te igkeupii ku.
33 Pammineha niyu ka igpanulu ku kaniyu, eyew egmatagseb kew;
sumsumana niyu seini wey kene niyu balahara.
34 Due keupianan te etew ne egpammineg keddi,
wey te etew ne egtetameng keddi tagse aldew diye te gumawan ku,
wey te etew ne egtetahad diye te baley ku.
35 Ka egpakakita keddi, egpakaangken te umul
wey igkeyid‑u sikandin te Magbebaye.
36 Piru ka kene egpamitew keddi, migdereet te pegkeetew rin,
wey ka langun ne egkeepes keddi, egkeupian ne egpatey.”