132
Indayan ka timplu te Manama
Ka ulahingen ni Dabid para te pegpatakereg diye te Hirusalim.
1 He Magbebaye ne Manama, kene nu lingawi si Dabid,
wey ka langun ne malised ne in-antus din.
2 Sumsumana nu, he Magbebaye ne Manama,
ka insaad din keykew te Amana ne Maresen ne Manama ni Hakub:
3 “Kena a eg-uli diye te baley ku,
wey ke eggibat naa diye te hibatanan ku,
4 kena a eglipereng wey ke egpileng naa,
5 taman te egpakakita ad te eg-ugpaan te Magbebaye ne Manama,
baley ne para te Amana ne Maresen ne Manama ni Hakub.”
6 Ne diye te Iprata, nakarineg key meyitenged te Tahuanan te Kasabutan,
wey nakita ney seini diye te unayan te Haar.
7 Ne migkahi key, “Egmangendiye ki te timplu te Magbebaye;
egsimba ki kandin diye te tangkaan te pinnuuwan din!”
8 Hendiye kad, he Magbebaye ne Manama te baley ne himelayanan nu,
duma te Tahuanan te Kasabutan ne palinneu te karesen nu.
9 Meupiya perem ke eleg layun ka eggimuwen te me talagpanubad nu,
wey egkuleyi perem te pegkahale ka matinumanen ne keet-etawan nu!
10 Ne tenged ki Dabid ne suluhuanen nu,
kene nu ubag inniyuhi sikandin se in-alam nu ne Hari.
11 Migsaad ka dengan ki Dabid, wey egtumanen nu iya seini:
“Sabeka te me anak nu ka eggimuwen ku ne Hari,
wey eghari sikandin subal keykew.
12 Ne emun ke egtumanen te me anak nu ka kasabutan ku wey ka me suhu ku,
eghari degma ka me anak dan taman te ware egtamanan.”
13 In-alam te Magbebaye ne Manama ka Hirusalim,
su igkeupii rin ne eg-ugpe diye.
14 Migkahi sikandin, “Seini ka himelayanan ku taman te ware egtamanan;
kayi a eg-ugpe, su igkeupii ku seini.
15 Ne egbehayan ku ka Siyun te langun ne keilangan din;
egpeyib-hibulungen ku ka egkengaayu-ayu ne keet-etawan din.
16 Egluwasen ku layun ka me talagpanubad din;
egmangulahing wey egmanguleyi te pegkahale ka keet-etawan din.
17 Ne kayi, eggimuwen ku ne maresen ne Hari ka sabeka te me kabuhalan ni Dabid;
inteil kud ne eglayag ka in-alam ku ne eghari.
18 Egpeyilawan ku ka me kuntere din,
piru egpabantuhen ku ka peghari din.”