138
Ka peg-ampu te pegpasalamat
Ka ulahingen ni Dabid.
1 Egpasalamat a keykew te intiru ne pusung ku, he Magbebaye ne Manama;
eg-ulahing a te pegdayan keykew diye te tangkaan te me manama.
2 Mig-usengul a diye te tane ka migtangke te matulus ne timplu nu,
wey migdayan te ngaran nu tenged te geyinawa nu ne kene egkabalbalawan, wey te pegtuman nu te lalag nu;
impakita nu ne sikeykew wey ka lalag nu labew iya te langun.
3 Intabak a nikeykew te in-umew ku sikeykew;
inlig‑en a nikeykew te kanekal nu ne imbehey nu keddi.
4 Egpasalamat keykew, he Magbebaye ne Manama, ka langun ne Hari te kalibutan,
tenged su narineg dan ka me lalag nu.
5 Eg-ulahing sikandan meyitenged te impangimu nu,
su dakel ka kabantug nu Magbebaye.
6 Su minsan pad amana ka ne Mabantug ne Manama,
insuman-suman nu ka egkengaayu-ayu;
kene egpekeeles keykew ka me mapegpeggasal.
7 Ne minsan amana ne masulug ka igkangilam ku,
impangabangan a nikeykew;
imbalabahan nu ka langet te me kuntere ku,
wey inluwas a nikeykew pinaahi te geem nu.
8 Eggimuwen nu iya ke nekey ka insaad nu ne egtamanan ku;
ka geyinawa nu kene egkabalbalawan, he Magbebaye ne Manama, ware egtamanan.
Kene nu ubag balahara ka impangimu nu.