139
Ka kumplitu ne katagseb wey pegtanggu te Manama
Ka ulahingen ni Dabid para te pangulu te mangngulahing.
1 He Magbebaye ne Manama, nakita nud ka seled te pusung ku wey neilaan ad iya nikeykew.
2 Nakataha ka te langun ne eggimuwen ku,
minsan pad mariyu ka, nakanengneng ka te egsumsumanen ku.
3 Egkakita a nikeykew, eggimu e ma wey ke eggimeley;
nakataha ka te langun ne eggimuwen ku.
4 Ne minsan ke kene e pad eglalag, he Magbebaye,
natahaan nud ka iglalag ku.
5 Egdumaan a nikeykew minsan hendei;
impangabangan a nikeykew.
6 Kein-inuwan ka katagseb nu para keddiey;
kene ku egkeumaan ka sumansuman nu.
7 Hendei e naan e egbaye eyew egpakapariyu a te Panisingan nu?
Hendei e naan e egbaye eyew egpekeeles a keykew?
8 Emun ke eggendiya a te langit, ne diye ke ma iya;
emun ke eggendiya a te inged te me minatey,
ne diye ke ma iya.
9 Emun ke eggendiya a te igsile,
wey ke eg-ugpe e naa diye te diriyui ne inged dapit te iglineb,
10 ne diye ke ma iya ka eg-inahak keddiey,
diye ke ma iya ka eggen-gen keddiey.
11 Emun ke egkaangyu ku re iya perem ka marusilem ne egdingding keddi,
wey seini se malayag ne egmarusilem,
12 piru minsan ka marusilem kene ne marusilem keykew,
wey iling ded kalayag te maaldew ka marusilem.
Su nekeg-iling de ka malayag wey ka marusilem keykew.
13 Sikeykew ka miggimu keddiey;
impaay-ayaran a nikeykew te eggimu diye te aanakan te iney ku.
14 Egdayanen ku sikeykew tenged su amana ne kein-inuwan ka peggimu nu keddiey;
kein-inuwan ka me himu nu,
wey nakataha a iya due.
15 Nakita nu ka me tul‑an ku
te innelhelesan a nikeykew te eggimu diye te aanakan te iney ku.
16 Nakita ad nikeykew te ware e pad miglesut.
Ne ka kaluhayan te umul ku,
nakasulat e diye te baseen nu,
minsan ware pad seini migbunsud.
17 He Manama, amana ne tetelesi te geyinawa ku ka egkasuman-suman nu;
leleheni ne egsabuten ka egkengasuman-suman nu.
18 Ne masulug pad sika du te pantad ke egseelen ku;
te peggimata ku, duma ku red sikeykew.
19 He Manama, meupiya perem ke eggimatayan nud ka me etew ne mareet se hinimuwan!
Meupiya perem ke kena ad eggilabetan te me etew ne mangngimatey!
20 Maddeet ka egmanlalahen dan keykew;
indereetan dan ka ngaran nu.
21 Igkalangeti kud iya, he Magbebaye, ka egkalangetan keykew;
egdumutan kud iya ka egsukul keykew!
22 Ware egpekeiling te pegdumut ku kandan;
in-isip ku sikandan ne me kuntere ku.
23 Pitawa a, he Manama, eyew egkatahaan nu ke nekey ka diye te pusung ku;
el-elehi a, eyew egkanengnengan nu ka egsumsumanen ku.
24 Ne pitawa nu ke due mareet ne neyimu ku,
wey panulua a te dalan peendiye te umul ne ware egtamanan.