14
Ka mareet ne hinimuwan te keet-etawan
Ka ulahingen ni Dabid para te pangulu te mangngulahing.
(Salmu 53)
1 Migkahi diye te geyinawa ran ka egkengeungel,
“Kene ne malehet ne due Manama.”
Mareet ka eggimuwen dan,
wey warad iya egkateu pad ne eggimu te meupiya.
2 Migpamantew ka Manama diye te langit,
wey impitew rin ka keet-etawan.
Su egnengnengan din ke duen pad matagseb,
wey ke duen naan pad migpamitew kandin.
3 Migsuwey e ka langun te maheteng ne dalan;
langun dan iya ne eggimu te mareet.
Ware sabeka kandan ne eggimu te meupiya,
minsan senge-etawan naan de iya.
4 Ware kaligneepan te me etew ne mareet se hinimuwan.
Mareet ka inggimu ran te keet-etawan ku.
Ne kenad sikandan eg-ampu diye te Magbebaye.
5 Piru egkaliyasan sikandan te mangune-kune,
su egpangabangan te Magbebaye ka mig-ugpe ne maheteng.
6 Indereetan dan ka me planu te egkengaayu-ayu,
piru ka Magbebaye ne Manama ka talagpangabang dan.
7 Meupiya ke eggingume e ka talagluwas te Israil ne egpuun te Hirusalim.
Emun ke igpalibed e man‑e te Magbebaye ka katubung te keet-etawan din,
egkahale-gale si Hakub,
wey egmahalew-galew si Israil.