15
Ka igkeupii te Magbebaye te egsimba kandin
Ka ulahingen ni Dabid.
1 He Magbebaye ne Manama, hentew‑a ka egpakaseled diye te timplu nu?
Manama, hentew‑a ka egpekeugpe diye te matulus ne bubungan nu?
2 Seeye iya se ware igkarew‑ey wey mig-ugpe ne maheteng.
Seeye se kene eggeeles wey egpangguhud te melehet puun te pusung din.
3 Seeye se kene egsesalupet.
Seeye se kene egdereet te alukuy rin.
Seeye se kene egpangehet te duma rin.
4 Seeye se egkeepes te me etew ne ware pulus,
piru egtahud te me etew ne egpamakey keykew;
seeye se egtuman te insaad din,
minsan ke masakit kandin.
5 Seeye se egpeutang te seleppi ne kene egpaanakan.
Seeye se kene egpamalehet te ware sale minsan egbayaran.
Ka etew ne eggimu kayi langun, kene iya egkaweil.