145
Ka ulahingen te pegdayan
Ka ulahingen ni Dabid.
1 Egsimbeen ku sikeykew Manama ku wey Hari ku.
Egdayanen ku ka ngaran nu te ware egtamanan.
2 Egdayanen ku sikeykew te tagse aldew,
wey egdayanen ku ka ngaran nu te ware egtamanan.
3 Mabantug ka Magbebaye ne Manama,
wey likes ka ne egdayanen;
kene egkatepengan ka kabantug nu.
4 Ka me kein-inuwan ne neyimu nu,
igpanugtul te langun ne kabuhalan diye te me anak dan.
5 Egpalemlemen ku ka karesen nu wey kabantug nu,
wey ka me kein-inuwan ne neyimu nu.
6 Igpanengneng te keet-etawan ka me kein-inuwan ne neyimu nu,
wey igpanugtul ku degma ka kabantug nu.
7 Igpangguhud dan ka keupiya nu,
wey eg-ulahingen dan ka pegkamatareng nu.
8 He Magbebaye ne Manama, hiid‑uwen wey hiimenawen ka;
kene ka mahaan egkabelu wey dakel ka geyinawa nu ne kene egkabalbalawan.
9 Meupiya ka te langun Magbebaye ne Manama.
Hiimenawen ka te langun ne hinimuwan nu.
10 He Magbebaye ne Manama,
egpasalamatan ka te langun ne hinimuwan nu,
wey egdayanen ka te langun ne keet-etawan nu.
11 Igpangguhud dan ka katelesan te migharian nu;
igpanugtul ran ka dakel ne geem nu,
12 igpangguhud dan diye te langun ne etew ka me kein-inuwan ne neyimu nu,
wey ignangen dan ka karesen wey kabantug te migharian nu.
13 Ware egtamanan te migharian nu,
wey kene egkataman ka pegmandu nu te langun ne kabuhalan.
Egtumanen nu ka langun ne lalag nu,
wey meupiya ka te langun ne inggimu nu.
14 Impangabangan nu seeye se nenatalu te gira,
wey imbulihan nu seeye se egkaleig-leig.
15 Migpallateng keykew ka langun ne eggeheyinawa,
wey impamehayan nu sikandan te me pegkeen ne ingkeilangan dan tagse aldew.
16 Mabehey-behey ka te langun ne hinimuwan nu ne eggeheyinawa,
wey matumpis ka kandan taman te egkeuralan e sikandan.
17 He Magbebaye ne Manama, matareng ka te langun ne himu nu,
wey meupiya ka te langun ne inggimu nu.
18 Marani ka Magbebaye te langun ne eg-umew keykew;
te me etew ne mapahetpet ne egpangananey keykew.
19 Igbehey nu ka ingkeilangan te langun ne migtahud keykew;
egpamminehen nu ka pegpangananey ran wey egbulihan nu sikandan.
20 Egtetamengan nu Magbebaye ka langun ne miggeyinawa keykew,
piru egpandereetan nu ka langun ne me etew ne mareet se hinimuwan.
21 Eg-ulahing a te pegsaye ku keykew, Magbebaye ne Manama;
egdayanen te langun ka matulus ne ngaran nu te ware egtamanan.