146
Egdayanen ka Manama ne Manluluwas
1 Egdayanen ku ka Magbebaye ne Manama!
He pusung ku, dayana nu ka Magbebaye!
2 Egdayanen ku ka Magbebaye taheed te manekal e pad;
eg-ulahingan ku ka Manama te intiru ne umul ku.
3 Kene ka salig te me pangulu su me etew re sikandan;
ware etew ne egpakaluwas keykew.
4 Emun ke egpatey e sikandan, eglibed ded sikandan diye te tane,
te sika ne aldew, egkataman e ka langun ne me planu ran.
5 Keupianan te etew ne egsalig te Manama ni Hakub,
wey egpallateng te Magbebaye ne Manama rin
6 ne miggimu te langit wey tane,
dahat wey ka langun ne nakatahu dutu.
Egtuman sikandin layun te me saad din;
7 eggukum sikandin lapig te egkenga-ayu-ayu,
wey egbehayan din te egkeenen ka egmanggutasan.
Igpalihawang te Magbebaye ka naddakep,
8 wey impakita rin ka me butud.
Egliwangen din ka egmangay-ayuwen;
inggeyinawaan din ka me matareng.
9 Egpangabangan din ka me lapu ne in-ugpe te Israil;
egbulihan din ka me balu wey ka me ilu,
piru egdereetan din ka me etew ne mareet se hinimuwan.
10 Eghari ka Magbebaye te ware egtamanan!
Eghari ka Manama nu Hirusalim, te langun ne timpu.
Dayanen ka Magbebaye ne Manama!