2
Ka Hari ne in-alam te Manama
1 Mania te migplanu te pegribildi ka me nasud?
Mania te migplanu ka me etew te ware karuan?
2 Miglibulung ka me Hari,
wey me pangulu ran wey migpangandam te pegpakig-ehet te Magbebaye ne Manama wey te Hari ne in-alam din.
3 Ne migkahi sikandan, “Kene ki egpariralem kandan wey ke egpasakup naa te pegmandu dan.”
4 Piru ingngisiyan sikandan,
wey imbaley-baley re sikandan te Magbebaye ne Manama ne migpinnuu te trunu rin diye te langit.
5 Ne tenged te langet din, impanpanayan din sikandan,
wey tenged te kabelu din, ingginalatan din sikandan.
6 Ne migkahi sikandin, “Impapinnuu kud e ka Hari ne in-alam ku diye te Hirusalim,
ka matulus ne bubungan ku.”
7 Ne migkahi ka Hari ne in-alam te Magbebaye ne Manama, “Igpangguhud ku ka ingkahi keddi te Magbebaye ne miggenendue,
‘Sikeykew ka anak ku,
wey te seini ne aldew amey ad e nikeykew.
8 Buyu ka keddi, ne igbehey ku keykew ka me nasud eyew sikeykew e ka egpakakamuney kayi,
wey egkaangken nu ka intiru ne kalibutan.
9 Ne egdereetan nu sikandan te mangune-kune ne geem nu.
Egpekeiling sikandan te tane ne kuren ne eglupeten nu.’ ”
10 Purisu, sikaniyu se me Hari wey me pangulu te kalibutan, pakatagseb kew.
Pammineha niyu seini ne me paney-paney.
11 Pamakaya niyu ka Magbebaye ne Manama ne due pegtahud,
wey gale-gale kew due te kandin.
12 Tahura niyu ka Hari ne in-alam din,
eyew kene egkabelu sikandin kaniyu wey kene kew nikandin eggimatayan,
su mahaan eglukindab ka kabelu din.
Keupianan te keet-etawan te Magbebaye ne Manama ne egparani kandin eyew egpabulig.