3
Ka peg-ampu te timpu te keyirapan
Ka ulahingen ni Dabid te migpallahuy sikandin te anak din ne si Absalum.
1 He Magbebaye ne Manama, amana ne masulug ka me kuntere ku,
wey susuluhi ka eg-ehet keddi.
2 Masulug ka egkahi keddi,
“Kene egbulihan sikandin te Magbebaye ne Manama.”
3 Piru sikeykew, iling ka te kalasag ne nakalingut keddi.
He Magbebaye ne Manama, impepanalu a nikeykew
wey impalibed nu layun ka kabulut ku.
4 Migpangumew a ka egpabulig keykew, he Magbebaye ne Manama,
wey intabak a nikeykew puun te matulus ne bubungan nu.
5 Miggibat a, miglipereng, wey nekeyimata pad,
su imbantayan e ma nikeykew, he Magbebaye ne Manama.
6 Kena a egkaaldek te sapulu ne libu ne kuntere,
ne miglingut keddi.
7 Hendini ka, he Magbebaye ne Manama!
Luwasa a nikeykew, Magbebaye ne Manama ku!
Legpari nu ka langun ne me kuntere ku,
wey pangawei nu sikandan te geem eyew kena ad e egpasakitan nikandan.
8 Due te keykew egpuun ka kapanaluwan,
panalangini key nikeykew se keet-etawan nu.