26
Ka peg-ampu te etew ne matareng
Ka ulahingen ni Dabid.
1 Pamaleheti nu Magbebaye ne ware sale ku,
su mig-ugpa a ne ware miggimu te mareet,
wey migsalig a keykew Manama te ware pegduwa-ruwa.
2 Ug-ugsiya a Magbebaye wey gerami a Manama.
Gerami nu ka pusung ku wey el-elehi nu ka keddi ne suman-suman.
3 Su layun ku egtantanuran ka geyinawa nu ne kene egkabalbalawan,
wey mig-ugpa a ne matinumanen layun keykew.
4 Wara a migduma-ruma te me etew ne ubaten,
wey wara a mig-alukuy te egmapitew-pitew re.
5 Igkeepes ku ka kalibulungan te me etew ne mareet se hinimuwan,
wey kena a eg-ambag-ambag te peglibulung dan.
6 Eglu‑luan ku ka belad ku eyew palinneu ne wara a nekeyimu te mareet.
Eglingut-lingut a te altar nu, he Magbebaye te pegsimba keykew
7 eyew egpasalamat ne eg-ul-ulahing,
wey egpangguhud te langun ne kein-inuwan ne himu nu.
8 Igkatelesi ku Magbebaye ka baley ne in-ugpaan nu,
ka baley ne in-emengan te katelesan nu.
9 Kena a ilagkes te egdereet duma te me makasesale,
wey kena a himatayi lagkes te me mangngimatey.
10 Iyan dan de egpulungan ka eggimu te mareet,
wey eggelebek egdawat te bayad te me limbungen.
11 Piru sikeddiey mule, eg-upa a ne maheteng,
sikan naa ka luwasa a wey ikeyid‑u a nikeykew.
12 Nakasasindeg a kuntee ne warad igkalaggew,
purisu egdayanen ku sikeykew diye te kalibulungan te masulug ne me etew.