27
Ka peg-ampu te pegdayan
Ka ulahingen ni Dabid.
1 Ka Magbebaye ka kalayag ku,
wey ka Manama ka talagluwas ku.
Nekey naan pad se igkaaldek ku?
Ka Magbebaye ka sandihanan ku.
Nekey naan pad se igkaliyasi ku?
2 Te timpu ne miglusuran a te me etew ne mareet se hinimuwan eyew eggimatey keddiey,
nasi de iya ne sikandan ka napaddel wey nahule.
3 Minsan pad ke eglingutan a te masulug ne me sundalu,
kene egkabantalan ka geyinawa ku.
Minsan pad ke due egpakiggira keddi,
egsalig a iya te Magbebaye.
4 Sabeka re ka egbuyuen ku te Magbebaye,
wey seini re ka igkeupii ku puun te Manama:
ka egpekeugpe diye te baley rin taman te egpatey a,
wey egpakakita te katelesan te Magbebaye,
wey egpamitew kandin diye te timplu rin.
5 Su iggeles a nikandin diye te ugpaan din,
te timpu te samuk.
Igtahu a nikandin diye te timplu rin,
wey igpeuntud a nikandin te matikang ne batu.
6 Purisu egpanalu a te nakalingut keddi ne me kuntere ku.
Egpanubad a ne egkahale-gale diye te timplu te Magbebaye,
wey eg-ulahing a te eparen diye te Manama.
7 Pammineha a Magbebaye ke egpangumew a.
Ikeyid‑u a wey tabaka a nikeykew.
8 Migkahi ka te egpaaputen a nikeykew,
wey mig-aput a iya keykew te malehet-lehet.
9 Kene ka heles keddiey.
Kena a deldela se suluhuanen nu tenged te langet nu.
Sikeykew ka migbulig keddiey, sikan naa ka kena a engkeri.
Kena a balahara Manama ne manluluwas ku.
10 Ne minsan pad ke egdeldelen a te amey wey iney ku,
piru egtangguwen a mule nikeykew Magbebaye.
11 Panulua a ke nekey ka igkeupii nu ne eggimuwen ku,
wey ipanulud a diye te meupiya ne dalan tenged te me kuntere ku.
12 Kena a ibehey kandan.
Su imbebayungan a nikandan te mareet ne ware ku neyimu, egkeupian sikandan ne egdereetan a.
13 Egpalintutuu a ne egkakita ku pad ka keupiya te Magbebaye,
taheed te neuyag e pad.
14 Salig kew te Magbebaye.
Pakannekal kew wey kene kew kapeleyi.
Salig kew re te Magbebaye.