28
Peg-ampu te pegpangananey
Ka ulahingen ni Dabid.
1 Egpangumew a keykew, he Magbebaye ne Manama.
Pammineg ka keddi sandihanan ku.
Emun ke kene ka eglinga-linga, egpatey a iya,
iling te seeye se nakalebeng e te tane.
2 Pammineha nu ka iglalag ku ke egpangananey a keykew.
Egpabulig a keykew ke egkayew a te belad ku diye te matulus ne timplu nu.
3 Kena a ilagkes te egparusa te seeye se me etew ne mareet se hinimuwan.
Egpapitew sikandan te me sumbaley ran ne meupiya sikandan,
kunaleg te mareet bes ka egkasuman-suman dan.
4 Legpari nu sikandan sumale te neyimu ran,
te mareet ne neyimu ran.
Legpari nu sikandan te langun ne inggimu ran,
wey behayi nu sikandan te eleg kandan.
5 Su insamsamilian dan ka me himu nu Magbebaye,
sikan naa ka dereeti nu sikandan eyew egkahule.
6 Egdayanen ka Magbebaye,
su indineg nu Manama ka pegpangananey ku keykew.
7 Sikeykew Magbebaye ka kanekal ku wey paandilunganan ku.
Sikeykew Manama ka egsalihan te pusung ku wey imbulihan a nikeykew.
Nahale-gale ka geyinawa ku wey eg-ulahing a ka egpasalamat keykew.
8 Sikeykew Magbebaye ka egpuunan te kanekal te keet-etawan nu,
wey sikeykew Manama ka paandilunganan te in-alam nu ne me etew.
9 Luwasa nu wey panalangini nu ka keet-etawan nu.
Tangguwa nu sikandan iling te talagtameng ne egtanggu te me karniru,
wey tantanuri nu sikandan te ware egtamanan.