38
Ka pegpangananey te etew ne nabaybayaran
Ka ulahingen ni Dabid eyew egsumsumanen sikandin te Manama.
1 He Magbebaye, kena a ubag paruseyi ke egkabelu ka,
wey kena a legpari ke egkalangetan ka.
2 Su hendue te impana a nikeykew,
wey inggumian a nikeykew.
3 Migmemasakit e ka lawa ku tenged te nabelu ka,
wey nareetan e ka me tul‑an ku tenged te sale ku.
4 Hendue te egkatimpaan ad e te me sale ku,
wey nekeiling a te nabegbehatan te dakel ne dinulan.
5 Migngareg e ka me kehang ku ne namewu,
puun te keungelan ne nangimu ku.
6 Napeku ad wey kenad egkaketeng,
wey egkaapunan e re ka egkalange.
7 Memasakit e amana ka me lawa ku,
wey eg-al-al re due ka kakiliran ku.
8 Mahuya ad amana wey kenad egpekeeleg.
Egpakareg-uy ad te masakit ne eggeramen te pusung ku.
9 Magbebaye natahaan nud ke nekey ka igkeupii te geyinawa ku,
wey ware nekeeles keykew ka pegdeg-uy ku.
10 Egpetik-petik ka pusung ku wey naawe ka keseg ku.
Kena ad egpakameleg-meleg wey kenad e ne malayag ka mata ku.
11 Kenad egdani keddi ka me alukuy wey ka me duma ku puun te dalu ku,
wey egpariyu e keddi ka me karumaan ku.
12 Egsahiluten a te me etew ne eggimatey keddi,
wey egpanlalag te mareet ka me etew ne egpasakit keddi,
wey egkaapunan de iya ka egpalemlem te pegdereet keddiey.
13 Piru wara a migpammineg iling te kene egdineg,
wey wara a miglalag iling te ummew.
14 Nekeiling ad e te etew ne kene egdineg,
wey te etew ne kene egpakalalag.
15 Piru sikeykew mule ka egtaharan ku, he Magbebaye.
Sikeykew Manama ku ka egtabak keddi.
16 Su mig-ampu a ne kene nu igtuhut ne egkahale ka me kuntere ku,
wey ke egpaambug naa ke egkareetan a.
17 Su mahaan ad e egkareeti,
wey kene egkataman ka masakit ne eggeramen ku.
18 Impanugtul kud keykew ka mareet ne neyimu ku.
Kena a egpekegteil tenged te me sale ku.
19 Maagsik-agsik ka me kuntere ku wey mannekal,
wey masulug sikandan se eg-usig keddi minsan ware egpuunan.
20 Insulian dan te mareet ka meupiya ne inggimu ku,
ingkuntera a nikandan tenged su meupiya ka in-ikul ku.
21 Kena a balahara Magbebaye!
Manama ku, kene ka pariyu keddi.
22 Mahaan ka ubag ka egbulig keddi, he Magbebaye ne talagluwas ku.