39
Ka pegpangguhud te sale te etew ne nabaybayaran
Ka ulahingen ni Dabid para ki Hidutun, ka pangulu te mangngulahing.
1 Ne migkahi a,
“Eg-ay-ayaran ku ka eggimuwen ku,
eyew kena a egpakasale te eglalahen ku.
Egpeeneng-eneng a wey kena a eglalag,
ke diye e pad te tangkaan te me etew ne mareet se hinimuwan.”
2 Sikan naa ka migpeeneng-eneng e re,
wey wara ad iya miglalag-lalag.
Piru ware seini nakabulig keddiey,
wey nasi de iya migmasakit ka inggeram ku.
3 Amana ne masakit ka pusung ku.
Emun ke egsuman-suman a, nasi de iya ne egkaprublimaan a,
sikan naa ka nekeinsa ad:
4 “Magbebaye, panengnenga a ke ken‑u a egpatey,
wey nangeni a ke kamenu kalayat ka umul ku.
Panengnenga a ke mahaan e egkabigtew ka geyinawa ku.”
5 Mahaan e egkataman ka umul ne imbehey nu keddiey,
ne hendue te ware de sika diye te keykew.
Ka malehet, nekeiling de ka umul te etew,
te kalamag ne eglihad de.
6 Egpekeiling de ka etew te alung ne egkatarin-tarin.
Layun egkahulikid ka etew te himu ne ware karuan.
Miglilimud sikandin te karatuan,
piru ware nakanengneng ke hentew ka egpakakuwa.
7 Na kuntee, warad duma ne egpallatengen ku Magbebaye.
Sikeykew naan de ka egpallatengen ku Manama.
8 Luwasa a puun te mareet ne nangimu ku.
Kena a ipabaley-baley te egkengeungel.
9 Egpeeneng-eneng e re wey kena a eglalag,
su sikeykew ka egpuunan ne nakabaya a kayi.
10 Awaa nud ka inlegpad nu keddi.
Egkabigtawan ad e te pegbayad-bayad nu keddi.
11 Egsaparan nu wey egdisiplineen ka etew tenged te sale din.
Egpekeiling ka te aney ne egpangetket, ne egpahanad-ganad ne egdereet te langun ne mahal ne kasangkapan din.
Ka malehet, nekeiling de iya ka umul te etew te kalamag ne eglihad de.
12 Pammineha nu ka peg-ampu ku Magbebaye,
wey panallinga ka te pegpangananey ku keykew.
Linga-linga ke man ded te pegsinehew ku.
Su nakalapu e re iling te kabuybuyahan ku ne eglihad de.
13 Kene kad e kabelu keddiey eyew egkahale ad man‑e,
te kene e pad eg-ayun wey egkaawe te inged.