41
Ka pegpangananey te etew ne egderalu
Ka ulahingen ni Dabid para te pangulu te mangngulahing.
1 Keupianan te etew ne egsuman-suman te egkaayu-ayu.
Egbulihan sikandin te Magbebaye te timpu te samuk.
2 Egpangabangan sikandin te Magbebaye wey igpariyu te karereetan.
Egpanalanginan sikandin te Magbebaye diye te tane te Israil,
wey kene igbehey diye te me kuntere din.
3 Egtangguwen sikandin te Magbebaye ke egderalu sikandin,
wey egbawian sikandin te Manama eyew egmanekal e man‑e.
4 Sikan naa ka migkahi a,
“He Magbebaye keyid‑u ka keddiey.
Bawii a su nakasala a keykew.”
5 Mareet ka impanlalag te me kuntere ku meyitenged keddiey.
Migkahi sikandan, “Ken‑u bu pad sikandin egpatey eyew egkalingawan e?”
6 Egpanumbaley sikandan keddiey wey egpapitew-pitew ne meupiya,
kunaleg te eglilimud bes te mareet ne guhuren meyitenged keddiey,
wey igwangal-wangal ran e seini ke eg-awe e sikandan.
7 Egmana-naasey ka langun ne eg-ehet keddiey,
wey egsuman-suman sikandan te mareet ne egtamanan ku.
8 Migkahi sikandan, “Masumpit ka dalu rin,
wey kenad sikandin egpekeenew.”
9 Ka insalihan ku ne alukuy ku, mig-akal e keddiey,
minsan ke miglagpu sikandin keddiey te egkeen.
10 Piru ikeyid‑u a nikeykew, he Magbebaye,
bawii a eyew egpakasuli a te egkuntere keddi.
11 Egkanengnengan ku ne igkeupii a nikeykew,
ke kena a egkatalu te egkuntere keddiey.
12 Imbulihan a nikeykew tenged su meupiya ka eggimuwen ku,
wey egtantanuran a nikeykew te ware egtamanan.
13 Egdayanen ka Magbebaye, ka Manama te Israil,
te ware egtamanan.
Uya, malehet iya.