Igkarangeb ne Baad
42
(Salmu 42–72)
Ka peg-iman-iman ne egpakarani te Manama
Ka ulahingen te me kabuhalan ni Kura para te pangulu te mangngulahing.
1 Egpamitew a keykew, he Manama,
iling te usa ne egkammaraan ne egpamitew te weyig.
2 Iling ka te weyig ne igkammareyi te geyinawa ku Manama.
Ken‑u e bu pad egpekeyipanew eyew egpakigkita keykew?
3 Egsinsinehew e re due tagse aldew wey marusilem,
taheed degma te eg-in-insaan a te me etew,
“Hendei naan e ka Manama nu?”
4 Egkalange e re due ke egkasuman-suman ku ka nabayaan ku,
ne impanguluwan ku ka susuluhi ne me etew peendiye te baley nu.
Miggale-gale key ka egpanguleyi wey eg-ulahing,
ka egdayan wey egpasalamat keykew.
5 Mania te egkalange e re due wey egkabantalan?
Egpallateng a keykew Manama wey egdayanen ku man‑e sikeykew,
su sikeykew ka talagluwas ku wey sikeykew ka Manama ku.
6 Nasasew a amana wey nasuman-suman ku sikeykew diye tane te Hurdan,
wey diye te bubungan te Hirmun diye te Misar.
7 Su hendue te naalep ad te weyig wey te mahulub ne sampew,
wey nabunbunan ad te derakel ne bunlud nu Manama.
8 Tagse aldew ne impapitew nu ka geyinawa nu ne kene egkabalbalawan Magbebaye,
wey eg-ulahing a te marusilem eyew eg-ampu keykew te Manama te umul ku.
9 Migkahi a te Manama ne paalindungan ku,
“Mania te inlingawan ad nikeykew?
Mania te eg-antus e pad puun te pegbayad-bayad keddi te me kuntere ku?”
10 Hendue te nalupet e ka me tul‑an ku,
su layun e re egbalbalaya te me kuntere ku.
Egkahiyan a nikandan layun,
“Hendei naan e ka Manama nu?”
11 Mania te egkalanga a wey egkabantalan?
Egpallateng a keykew Manama wey egdayanen ku sikeykew man‑e,
su sikeykew ka talagluwas ku wey sikeykew ka Manama ku.