62
Egsalig te pegpangabang te Manama
Ka ulahingen ni Dabid para te pangulu te mangngulahing ne si Hidutun.
1 Ka Manama re ka egtetaharan ku wey kena a egkapelaan.
Sikandin de ka egpuunan ne egkaluwas a.
2 Sikandin ka egpaalindungan ku wey ka talagluwas ku.
Maresen sikandin ne aputanan ku wey kena a iya egkamenu.
3 Sikaniyu langun se me kuntere ku,
ken‑u kew egsanggel ka eglusud ne egdereet keddiey?
Egpekeiling ad e te alabat ne egpakakiling e wey alad ne egpakayadyad e.
4 Igkeupii niyu ne egkaawa a te dakel ne katungdanan ku.
Egkatelesan kew re iya ka eggelebek eg-uubat.
Meupiya ka egpanlalahen niyu kunaleg te egpandilus e ka geyinawa niyu.
5 Diye e re eg-iman-iman te Manama wey kena a egkapelaan,
su sikandin de ka egkapallatengan ku.
6 Sikandin de ka egpaalindungan ku wey ka talagluwas ku.
Maresen sikandin ne aputanan ku wey kena a iya egkamenu.
7 Diye te Manama egkakita ka kaluwasan wey ka kabantug.
Sikandin ka maresen ne batu ne aputanan ku.
8 Salig kew kandin te langun ne timpu.
Sikaniyu se keet-etawan, isalig niyu ka umul niyu kandin.
Ka Manama ka aputanan ta.
9 Ka me etew ne iling te re, iyan de egkeilingan ka geyinawa.
Ne ka etew ne mabantug, ware degma karuan.
Minsan egtimbangen sikandan ke hentew ka mabehat,
piru mabmabehat pad kandan ka kalamag.
10 Kene kew pasakit te etew eyew re egkaangey niyu ka igkeupii niyu.
Kene kew panakew eyew re egkaangey niyu ka igkeupii niyu.
Kene kew salig-salig te dakel ne karatuan.
11 Miglalag e ka Manama ne maresen sikandin,
wey kapapila kud seini narineg.
12 Migkahi man‑e ka Magbebaye te kene iya egkabalbalawan ka geyinawa rin.
Malehet iya ne eg-unahan te Manama ka etew sumale te neyimu rin.