63
Ka peg-iman-iman te Manama
Ka ulahingen ni Dabid te diye sikandin te disirtu diye te Huda.
1 He Manama sikeykew ka Manama ku.
Egparani a keykew su egkeupian ka geyinawa ku keykew.
Egkeupian ka geyinawa ku ne egpakaheram keykew,
iling te eggeramen ku te diya a te mammara ne inged,
wey egkammaraan a te weyig.
2 Nakita ku sikeykew diye te timplu nu,
wey nakita ku ka karesen nu wey katelesan nu.
3 Egdayanen ku sikeykew su ka geyinawa nu ne kene egkabalbalawan,
subla pad ne dakel se karuan du te umul.
4 Egdayanen ku sikeykew taman te egkeuyag e pad.
Egkayawen ku ka belad ku te peg-ampu keykew.
5 Egkabennalan a iya keykew,
iling te etew ne egkabulung-bulung te sahakeen.
Ne eg-ulahing a ka egdayan keykew duma te kahale.
6 Egkasuman-suman ku sikeykew taheed te eggibat a,
wey egpalemlem a keykew te egkapawaan,
7 tenged su egbulihan a layun nikeykew.
Egkahale-gala a ne eg-ulahing keykew su imbantayan a nikeykew
iling inayan ne egkupkup te me piyak.
8 Egsalig a layun keykew,
wey eggen-genan a nikeykew.
9 Piru seeye se eglelalis ne eggimatey keddi,
nasi egpakalebeng diye te inged te me minatey.
10 Egpamatey sikandan,
wey egpangeenen e te mabbulut ne me mahintalunan.
11 Piru egkahale ka Hari tenged te inggimu te Manama,
wey egkahale degma ka migsesaad te Manama.
Piru egsagpengan din ka be‑be te me ubaten.