80
Ka peg-ampu para te kaligwangan te nasud
Ka ulahingen ni Asap para te pangulu te mangngulahing ne eg-ulahingen iling te peg-ulahing te “Me Liryu te Kasabutan.”
1 Pammineha key, he Talagtanggu te Israil.
Intanggu nu si Husi iling te karniru ne egtangguwen.
Ipapitew nu ka katelesan nu, sikeykew se migpinnuu te trunu rin,
ne nakaampew te me kirubin.
2 Ipapitew nu ka karesen nu te me kabuhalan ni Ipraim, Binhamin, wey ni Manasis.
Keiyal ka wey luwasa key e.
3 He Manama, ipalibed nu red ka keupianan ney.
Ipapitew nu kanami ka malayag-layag ne ulaula nu,
eyew egkaluwas key red.
4 He Magbebaye ne Amana ne Maresen ne Manama.
Ken‑u egkataman ka langet nu kanami te eg-ampu keykew?
5 Impakeen key nikeykew te kalasayan iling te egkakeen;
innibulung key nikeykew te pegsinehew iling te egkeinum.
6 Intuhutan nu ne egkarulihis key te samuk puun te me sumbaley ney,
eyew eg-ahew te tane ney, wey migngingisiyan key e te me kuntere ney.
7 He Amana ne Maresen ne Manama, ipalibed nu red ka keupianan ney.
Ipapitew nu kanami ka malayag-layag ne ulaula nu,
eyew egkaluwas key red.
8 Nekeiling key te paras ne imbarut nu te Ihiptu,
wey impamula diye te inged ne indeldel nu ka me mahinged.
9 Inggawanan nu ka tane wey nakareralid te maralem ka paras,
wey migtulin seini wey neempet ka inged.
10 Naralungan ka me bubungan te paras,
wey nabunbunan ka derakel ne me sidar te me sugpang.
11 Nakalampey ka me sugpang te paras diye te dahat te Miditiranyu,
wey nekeuma ka me dalid diye te Weyig ne Iyupratis.
12 Ne mania te ingguhus nu ka alad te paras?
Impamupu e nasi te egmanlihad ka behas.
13 Indereetan e seini te me mahintalunan ne babuy,
wey impangeen e te me mananap diye te mabbenes.
14 Libed kad ubag se Amana ne Maresen ne Manama.
Pantew ka puun te langit wey pitawa key se nekeiling e te paras.
15 Tangguwa key e te karesen nu se impamula nu,
wey inggimu nu ne maresen eyew egkabantug ka.
16 Natutung e seini wey napeled e.
Nareetan e seini su nabelu ka.
17 Bulihi nud ka keet-etawan ne in-alam nu,
ka kabuhalan ne inlig‑en nu eyew egkabantug ka.
18 Ne kene key e eg-engked keykew.
Uyaha key red wey sikeykew re ka egpangananayen ney.
19 Uyaha key red Magbebaye ne Amana ne Maresen ne Manama.
Ipakita nu kanami ka malayag-layag ne ulaula nu,
eyew egkaluwas key.