81
Ka ulahingen te pegdayan te Manama
Ka ulahingen ni Asap para te pangulu te mangngulahing ne egbalesen te intagpesan ne instrumintu.
1 Panaman-taman kew ulahing te Manama ne migbehey kanta te keseg.
Kuleyi kew te kahale diye te Manama ni Hakub.
2 Ulahing kew wey iparahing niyu ka me tamburin,
wey ka me lira wey ka me alpa.
3 Parahinga niyu ka me trumpita te iyam ne bulan,
wey te aldew te pegsahakeen ta.
4 Su balaud seini ne igpatuman te Israil,
wey insuhu seini te Manama ni Hakub.
5 Impatuman din seini te me kabuhalan ni Husi,
te mig-awe sikandan diye te Ihiptu.
Nakarineg a te laheng ne ware ku pad narineg ne migkahi,
6 “Impeyimeley ku sikaniyu ka egluehan ne egpamaba,
wey impapeeneng-eneng ku sikaniyu ka egpangenat te me bukag.
7 Migpangananey kew keddi te timpu ne nabaybayaran kew,
wey impangabangan ku sikaniyu.
Ne intabak ku sikaniyu puun diye te migpaddusilem,
wey inggeraman ku sikaniyu diye te weyig te Miriba.
8 Keet-etawan ku pammineg kew ke egpanuluen ku sikaniyu,
kabuhalan ni Israil linga-linga kew te iglalag ku kaniyu.
9 Kene kew kuwa te duma ne diyus-diyus,
wey kene kew simba te me diyus-diyus.
10 Sikeddiey ka Magbebaye ne Manama niyu,
ne iyan migpaawe kaniyu te inged te Ihiptu.
Hinganga ka pataman-taman wey egpakeenen ku sikeykew.
11 Piru kene egpammineg keddi ka keet-etawan ku.
Kene egparuma-ruma keddi ka me kabuhalan ni Israil.
12 Sikan naa ka imparuyun-duyunan kud sikandan te makehal ne ulu ran,
wey balahad e sikandan ka egparuma-ruma te igkeupii ran.
13 Meupiya naan de iya ke egpamminehen a te keet-etawan ku,
wey mateles naan de iya ke eg-ikul sikandan te igkeupii ku.
14 Egdagdahawan ku te egtalu ka me kuntere dan,
wey egkayawen ku ka belad ku eyew egdereetan ka eg-ehet kandan.
15 Ne seeye se egkabelu keddiey,
egpanimbuel diye te tangkaan ku.
Sikan de iya ka egkeula-ula ran te ware egtamanan.
16 Piru egpakeenen ku mule sikaniyu te meupiya amana ne trigu.
Egpeuralan ku sikaniyu te teneb puun te batu.”