27
Ka me upisyal ni Hari Dabid
1 Seini ka me listaan te me pangulu, te me kumandir te linibu wey te ginatus ne me sundalu, wey te me upisyal te me matig-Israil ne migpamakey te Hari isip me pangulu te me punduk. Te tagse bulan te intiru ne leg‑un, due sabeka ne punduk te me sundalu ne egpamakey. Ka tagse punduk due daruwa ne pulu wey hep‑at ne libu (24,000) ne sundalu.
2 Te an-anayan ne bulan, si Hasubim ne anak ni Sabdiil ka migpangulu te an-anayan ne punduk. Ne due daruwa ne pulu wey hep‑at ne libu (24,000) ne sundalu te punduk din.
3 Kabuhalan sikandin ni Piris wey sikandin ka migpangulu te langun ne kumandir te me sundalu te an-anayan ne bulan.
4 Te igkarangeb ne bulan, si Duday ne kabuhalan ni Ahuwa ka migpangulu te igkarangeb ne punduk. Ne si Miklut ka labew ne upisyal rin. Ne duen ded man‑e daruwa ne pulu wey hep‑at ne libu (24,000) ne sundalu te punduk din.
5 Te igkatatelu ne bulan, si Binayas ne anak ni Hihuyada ne talagpanubad ka migpangulu te igkatelu ne punduk. Ne duen ded man‑e daruwa ne pulu wey hep‑at ne libu (24,000) ne sundalu te punduk din.
6 Seini ne Binayas ka migpangulu te punduk te me bahani ni Dabid ne neilaan te gennal ne Tatelu ne Pulu. Ne ka anak din ne si Amisabad iyan labew ne upisyal rin.
7 Te igkeep‑at ne bulan, si Asahil ne suled ni Huwab ka migpangulu te igkeep‑at ne punduk. Ne ka anak din si Sibadiyas ka nakasubal kandin. Ne duen ded man‑e daruwa ne pulu wey hep‑at ne libu (24,000) ne sundalu te punduk din.
8 Te igkalalimma ne bulan, si Samhut ne kabuhalan ni Isra ka migpangulu te igkalalimma ne punduk. Ne duen ded man‑e daruwa ne pulu wey hep‑at ne libu (24,000) ne sundalu te punduk din.
9 Te igkeen‑em ne bulan, si Ira ne anak ni Ikis ne matig-Tikuwa ka migpangulu te igkeen‑em ne punduk. Ne duen ded man‑e daruwa ne pulu wey hep‑at ne libu (24,000) ne sundalu te punduk din.
10 Te igkapitu ne bulan, si Hilis ne kabuhalan ni Pilun ne kabuhalan ni Ipraim ka migpangulu te igkapitu ne punduk. Ne duen ded man‑e daruwa ne pulu wey hep‑at ne libu (24,000) ne sundalu te punduk din.
11 Te igkawalu ne bulan, si Sibikay ne kabuhalan ni Husa ne kabuhalan ni Sira ka migpangulu te igkawalu ne punduk. Ne duen ded man‑e daruwa ne pulu wey hep‑at ne libu (24,000) ne sundalu te punduk din.
12 Te igkasiyam ne bulan, si Abisir ne matig-Anatut ne kabuhalan ni Binhamin ka migpangulu. Ne duen ded man‑e daruwa ne pulu wey hep‑at ne libu (24,000) ne sundalu te punduk din.
13 Te igkasapulu ne bulan, si Maharay ne matig-Nitupa ne kabuhalan ni Sira ka migpangulu te igkasapulu ne punduk. Ne duen ded man‑e daruwa ne pulu wey hep‑at ne libu (24,000) ne sundalu te punduk din.
14 Te igkasapulu wey sabeka (11) ne bulan, si Binayas ne matig-Paratun ne kabuhalan ni Ipraim ka migpangulu te igkasapulu wey sabeka (11) ne punduk. Ne duen ded man‑e daruwa ne pulu wey hep‑at ne libu (24,000) ne sundalu te punduk din.
15 Te igkasapulu wey daruwa (12) ne bulan, si Hilday ne matig-Nitupa ne kabuhalan ni Utnil ka migpangulu te igkasapulu wey daruwa (12) ne punduk. Ne duen ded man‑e daruwa ne pulu wey hep‑at ne libu (24,000) ne sundalu te punduk din.
Ka me pangulu te me kabuhalan ni Israil
16 Seini ka me pangulu te me kabuhalan ni Israil:
Si Ilisir ne anak ni Sikri ka pangulu te kabuhalan ni Rubin.
Ne si Sipatiyas ne anak ni Maaka ka pangulu te kabuhalan ni Simyun.
17 Ne si Hasabiyas ne anak ni Kimuil ka pangulu te kabuhalan ni Libi.
Ne si Saduk ka pangulu te kabuhalan ni Aarun.
18 Ne si Ilihu ne sabeka te me suled ni Dabid ka pangulu te kabuhalan ni Huda.
Ne si Umri ne anak ni Maykil ka pangulu te kabuhalan ni Isakar.
19 Ne si Ismayas ne anak ni Ubadiya ka pangulu te kabuhalan ni Sabulun.
Ne si Hirimut ne anak ni Asril ka pangulu te kabuhalan ni Naptali.
20 Ne si Husiya ne anak ni Asasiyas ka pangulu te kabuhalan ni Ipraim.
Ne si Huwil ne anak ni Pidayas ka pangulu te katenge te kabuhalan ni Husi ne iyan ka me kabuhalan ni Manasis.
21 Ne si Idu ne anak ni Sakariyas ka pangulu te katenge te kabuhalan ni Husi ne iyan ka me kabuhalan ni Manasis diye te Gilyad.
Ne si Hasil ne anak ni Abnir ka pangulu te kabuhalan ni Binhamin.
22 Ne si Asaril ne anak ni Hiruham ka pangulu te kabuhalan ni Dan.
Sikandan ka me pangulu te me kabuhalan ni Israil.
23 Te pegsinsus ni Dabid te me matig-Israil, masulug ka me etew tenged su migsaad ma ka Magbebaye ne Manama ne egpamasuluhen din iling te me bituen ka me matig-Israil. Purisu iyan de impasinsus ni Dabid ka migdaruwa ne pulu (20) se idad wey subla.
24 Si Huwab ne anak ni Siruya ka migbunsud migpaninsus piru ware din neimpusi su nabelu ma ka Magbebaye ne Manama te pegpaninsus din. Purisu ware nasulat diye te Sulatanan te me Guhuren ni Hari Dabid ka langun ne kasuluhan te me matig-Israil.
Ka impamiyalan ni Hari Dabid
25 Ne si Asmabit ne anak ni Adiil iyan impiyalan ne egbantey te tahuanan te karatuan te Hari. Ne si Diyunatan ne anak ni Usiyas iyan impiyalan te me tahuanan te karatuan diye te me distritu, te me lungsud, te me bariyu, wey te me matikang ne baley.
26 Ne si Isri ne anak ni Kilub iyan impiyalan ne egbebantey te me talagbasuk diye te kamet te Hari.
27 Ne si Simii ne matig-Rama iyan impiyalan ne egbantey te parasan; ne si Sabdi iyan impiyalan te tahuanan te binu.
28 Ne si Baal-Hanan ne matig-Gidir iyan impiyalan ne egbantey te me kayu ne ulibu wey sikumuru diye te lenlen te me bubungan te Huda. Ne si Huwas iyan impiyalan te tahuanan te mentika te ulibu.
29 Ne si Sitray ne matig-Sarun iyan impiyalan ne egbantey te me ayam diye te panabtaban te Siyarun. Ne si Sapat ne anak ni Adlay iyan impiyalan ne egbantey te me ayam diye te me napu.
30 Ne si Ubil ne Ismailita iyan impiyalan ne egbantey te me kamil. Ne si Hidayas ne matig-Mirunut iyan impiyalan ne egbantey te me asnu. Ne si Hasis ne kabuhalan ni Hagar iyan impiyalan ne egbantey te me karniru.
31 Sikandan langun ka impiyalan ne egbantey te me karatuan ni Hari Dabid.
Ka me talagtambag ni Hari Dabid
32 Ka talagtambag ni Hari Dabid iyan ka anggam din ne si Diyunatan. Matagseb si Diyunatan wey sabeka ne sikritari. Ne iyan degma talagpanulu te me anak te Hari si Hihil ne anak ni Hakmuni.
33 Ne si Ahitupil pad man‑e ka lein ne talagtambag ni Hari Dabid, wey si Husay ne matig-Arak ne amana rin ne alukuy.
34 Te migpatey e si Ahitupil, si Huyada ne anak ni Binayas ka nakasubal kandin duma ki Abiyatar. Ne si Huwab ka kumandir te me sundalu te Hari.