28
Ka me planu ni Dabid te timplu
1 Ne impalibulung ni Dabid diye te Hirusalim ka me pangulu te me matig-Israil—me pangulu te me tribu, me upisyal te me punduk ne migpamakey te Hari, me pangulu te linibu wey ginatus ne me sundalu, me piniyalan te me karatuan, me piniyalan te me ayam te Hari wey te me anak din, me upisyal diye te palasyu, me bahani, wey ka mabbulut ne me sundalu.
2 Ne migsasindeg si Hari Dabid wey migkahi, “Pammineg kew keddi me suled wey keet-etawan ku. Amana a perem egkeupian ne egpasasindeg te timplu eyew diye igtahu ka Tahuanan te Kasabutan te Magbebaye ne Manama ta eyew due egkeyimelayan din. In-andam kud e perem ka langun ne egkeilanganen para te pegpasasindeg kayi.
3 Piru ingkahiyan a te Manama, ‘Kene ne sikeykew ka egpasasindeg te timplu para keddi, su sundalu ka nahud wey nakapatey ka te masulug ne etew.’
4 “Piru minsan pad due, in-alam a te Magbebaye ne Manama te Israil, puun te intiru ne pamilya ku eyew egkeyimu ne Hari te Israil te ware egtamanan. In-alam din ka kabuhalan ni Huda isip pangulu te me kabuhalan wey puun te sika ne kabuhalan, in-alam din ka pamilya ku, ne puun te pamilya ku, igkeupii rin ka peg-alam din keddi isip Hari te intiru ne Israil.
5 Ne impamehayan a te Magbebaye ne Manama te masulug ne anak ne me lukes, wey puun kandan, in-alam din si Sulumun eyew iyan eghari te Migharian te Manama ne iyan ka Israil.
6 “Ne ingkahiyan a te Magbebaye ne Manama, ‘Ka anak nu ne si Sulumun ka egpasasindeg te timplu para keddi wey te lama kayi, su in-alam ku sikandin ne egkeyimu ne anak ku, wey egkeyimu a ne amey rin.
7 Ne emun ke egpabulus sikandin eg-ikul te me balaud ku wey me suhu ku iling te inggimu rin kuntee, egpaharien ku degma ka me kabuhalan din te ware egtamanan.’
8 “Ne kuntee, te tangkaan te langun ne me matig-Israil ne keet-etawan te Magbebaye ne Manama, wey duma te Manama ne talagpamalehet ta, egsuhuen ku sikaniyu ne keilangan ne egtumanen niyu ka langun ne suhu te Magbebaye ne Manama niyu. Ne emun ke egtumanen niyu seini, egkaangken niyu seini se meupiya ne tane, wey isip karatuan ne inggaat ne egkapanunud te me kabuhalan niyu te ware egtamanan.
9 “Ne sikeykew, Sulumun ne anak ku, ilaa nu ka Manama ku wey pamakaya nu sikandin te intiru ne pusung nu wey te suman-suman nu, su egpakanengneng ka Magbebaye ne Manama te me planu ta wey te me suman-suman ta. Ke egpamitew ka kandin, egpakita sikandin keykew. Piru ke eg-inniyug ka kandin, eg-inniyuhan ka degma nikandin te ware egtamanan.
10 Ne sumsumana nu ne in-alam ka te Magbebaye ne Manama eyew egpasasindeg te timplu ne egsimbaan kandin. Pakannekal ka wey himuwa nu seini.”
11 Ne imbehey ni Dabid ki Sulumun ka langun ne egpeilingan te pegpasasindeg te timplu, te likansu kayi, me sinabeng ne tinesanan te karatuan, me sinabeng diye te dibabew, me sinabeng ne diye te seled, wey te Subla ne Matulus ne Sinabeng ne egpasayluwan te me sale te me etew.
12 Impanulu man‑e ni Dabid ki Sulumun ka implanu rin te lama te timplu te Manama, te langun ne sinabeng ne nakalingut te timplu, te me sinabeng ne tinesanan te karatuan, wey te me sinabeng ne tinesanan te me matulus ne kasangkapan.
13 Impanulu din man‑e ki Sulumun ka pegpunduk te me talagpanubad wey te me Libita wey te langun ne me himu ran te pegpamakey diye te timplu te Magbebaye ne Manama, wey te langun ne me kasangkapan ne eggamiten te egpamakey diye te timplu te Manama.
14 Impanulu din man‑e ki Sulumun ke pila ne kilu ka pelata wey ka bulawan ne eggimuwen ne kasangkapan ne eggamiten para te nalein-lein ne tulumanen te pegpamakey.
15 Impanulu din si Sulumun ke pila ne kilu ne bulawan ka eggimuwen ne me sulu wey tahuanan kayi, me pelata ne me sulu wey me tahuanan kayi,
16 bulawan ne lamisa ne eg-unturan te paan ne ighalad diye te Manama, pelata ne me lamisa,
17 derakel ne me tinidur ne bulawan, bulawan ne me yahung wey me pitsil, bulawan wey pelata ne me palatu,
18 wey bulawan ne altar ne egtutungan te insinsu. Impanulu man‑e ni Dabid ki Sulumun ke pila ne kilu ne bulawan ka eggamiten te peggimu te bulawan ne kirubin ne nabekad ka me pakpak diye te ampew te Tahuanan te Kasabutan te Magbebaye.
19 Migkahi si Hari Dabid, “Ka seini ne planu nasulat duma te pegpanulu te Magbebaye ne Manama, wey impasabut din keddi seini.”
20 Migpabulus si Dabid ka migpanulu te anak din ne si Sulumun, “Bagget-bagget ka wey pakannekal ka. Himuwa nu seini ne himu. Kene ka kaaldek wey ke egpaawe naa te kabagget, su egdumaan ka te Magbebaye ne Manama ku. Kene ka nikandin eg-engkeran wey ke egbalaharen naa taman te egkeimpusan nud ka langun ne himu te timplu te Magbebaye ne Manama.
21 Naandam e ka punduk te me talagpanubad wey te me Libita ne eggimu te langun ne himu te timplu te Manama. Ne egbulig keykew ka me trabahanti ne due me katuenan te minsan nekey ne himu. Ne ka keet-etawan wey ka me pangulu ran, andam ne egtuman te igsuhu nu.”