4
Ka duma ne me kabuhalan ni Huda
1 Seini ka duma ne me kabuhalan ni Huda: si Piris, si Hisrun, si Karmi, si Hur, wey si Subal.
2 Ne si Subal ka amey ni Rayas, si Rayas ka amey ni Diyahat, wey si Diyahat ka amey ni Ahumay wey ni Lahad. Sikandan ka me kaap-apuan te me matig-Sura.
3-4 Ne si Hur ka kinakakayan ne anak ni Kalib te asawa rin ne si Iprata, wey ka me kabuhalan din ka migpasasindeg te Bitlihim. Ne si Hur due tatelu ne anak ne me lukes ne iyan si Itam, si Pinuwil, wey si Isir. Ne si Itam due tatelu ne anak ne me lukes ne iyan si Hisril, si Isma, wey si Hidibas, wey due atebey ran ne egngaranan ki Hasililpuni. Si Pinuwil ka amey ni Gidur, wey si Isir ka amey ni Husa.
5 Si Asur ne amey ni Tikuwa, due daruwa ne asawa ne si Hila wey si Naara.
6 Ne seini ka anak dan ki Naara: si Ahusam, si Hipir, si Tamani, wey si Ahastari.
7 Ne seini degma ka me anak dan ki Hila: si Sirit, si Isar, wey si Itnan.
8 Si Kus ka amey ni Anub wey ni Sudiba. Ne sikandin ded degma ka kaapuan te me kabuhalan ni Aharhil ne anak ni Harum.
9 Ne due etew ne egngaranan ki Habis ne subla ne talahuren, du te me suled din. Si Habis ka ingngaran kandin te iney rin, su amana ne masakit ka pegpalesut kandin.
10 Ne mig-ampu si Habis te Manama te Israil ne migkahi, “Panalangini a nikeykew Manama, wey pamaluaha nu pa ka inged ne sakup ku. Dumeyi a ubag nikeykew wey ipaalihu a te karereetan.” Ne imbehey te Manama ka imbuyu din.
11 Si Kalib ne suled ni Suwa iyan amey ni Mihir ne amey ni Istun.
12 Ne si Istun ka amey enni Bitrapa, ni Pasiya, wey ni Tihina. Ne si Tihina ka amey ni Naas. Me matig-Rika sikandan.
13 Si Kinas due daruwa ne anak ne me lukes ne si Utniil wey si Sirayas. Ne ka anak ni Utniil ne me lukes iyan si Hatat wey si Miyunati.
14 Ne si Miyunati ka amey ni Upra. Ne si Sirayas ka amey ni Huwab, ka nekeyimu te inged ne egngaranan te bangalug te me Pandey. Ingngaranan sika te bangalug te me Pandey tenged su me pandey ma ka nangugpe kayi.
15 Ne si Kalib ne anak ni Hipuni, due anak ne me lukes ne iyan si Iru, si Ila, wey si Naam. Ne si Ila ka amey ni Kinas.
16 Si Hihalilil due anak ne me lukes ne iyan si Sip, si Sipa, si Tiraya, wey si Asaril.
17-18 Si Isdras due hep‑at ne anak ne me lukes ne iyan si Hitir, si Mirid, si Ipir, wey si Halun. Ne si Mirid mig-asawa ki Bitiya ne anak te Hari te Ihiptu, wey nakaanak sikandan te malitan ne iyan si Miryam, wey daruwa ne me lukes ne si Samay wey si Hisba. Ne si Hisba ka amey ni Istimuwa. Ne mig-asawa man‑e si Mirid te malitan ne matig-Huda wey nakaanak sikandan te tatelu ne me lukes ne iyan si Harid ne amey ni Gidur, si Hibir ne amey ni Suku, wey si Hikutil ne amey ni Sanuwa.
19 Ne mig-asawa si Hudiyas te atebey ni Naham. Ne ka sabeka te me anak dan ne lukes, iyan amey ni Kila ne kaapuan te me matig-Garmi, wey ka dangeb, amey ni Istimuwa ne kaapuan te me matig-Maaka.
20 Si Simun due hep‑at ne anak ne me lukes ne iyan si Amnun, si Rina, si Binhanan, wey si Tilun.
Si Ishi due daruwa ne anak ne me lukes ne si Suwit wey Binasuwit.
Ka me kabuhalan ni Sila
21 Ne ka me kabuhalan ni Sila ne anak ni Huda, iyan si Ir ne kaapuan te me matig-Lika, si Laada ne kaapuan te me matig-Marisa, wey te me pamilya te me talaggimu te hinabel diye te Bit-Asbis,
22 ni Hukim wey te me mahinged te Kusiba, ni Huwas wey ni Sarap ne migmandu te Muwab wey te Hasubilihim. (Ka seini ne me sinulat puun pad te tapey ne timpu.)
23 Migpamakey sikandan te Hari isip me talaggimu te me kuren, wey diye sikandan mig-ugpe te Nitaim wey Gidira.
Ka me kabuhalan ni Simyun
24 Ne ka me anak ni Simyun ne me lukes iyan si Nimwil, si Hamin, si Harib, si Sira, wey si Saul.
25 Ne si Saul ka amey ni Salum, si Salum ka amey ni Mabsam, wey si Mabsam ka amey ni Misma.
26 Ne si Misma ka amey ni Hamwil, si Hamwil ka amey ni Sakur, wey si Sakur ka amey ni Simii.
27 Ne si Simii due sapulu wey hen‑em (16) ne anak ne me lukes wey hen‑em ne malitan, piru pila-pila re ka anak te me suled din. Sikan naa ka kene ne iling kasulug ka tribu ran te kabuhalan ni Huda.
28 Ne diye nangugpe ka me kabuhalan ni Simyun te Birsiba, te Mulada, te Hasar-Suwal,
29 te Bilha, te Isim, te Tulad,
30 te Bituil, te Hurma, te Siklag,
31 te Bit-Markabut, te Hasar-Susim, te Bitbiri, wey te Sa-Arim. Me lungsud dan sika taman te peghari ni Dabid.
32 Nangugpe degma sikandan diye te lalimma ne me lungsud ne iyan ka Itam, ka Ayin, ka Rimun, ka Tukin, wey ka Asan.
33 Nangugpe man‑e sikandan te langun ne bariyu ne nakalingut te sika ne me lungsud taman te Baal. Sika ka nangugpaan dan, wey due listaan dan te me kabuhalan dan.
34 Ka me pangulu te me kabuhalan dan iyan si Misubab, si Hamlik, si Husa ne anak ni Amasiyas,
35 si Huwil, si Dihu ne anak ni Husabiyas, ne anak ni Sirayas ne anak ni Asiil,
36 wey si Iliyunay, si Haakuba, si Hisuhayas, si Asaya, si Adiil, si Ismil, si Binayas,
37 wey si Sisa. (Si Sisa anak ni Sipi ne anak ni Alun, wey si Alun anak ni Hidayas. Si Hidayas anak ni Simri ne anak ni Simaya.)
38 Ka seeye se nangngaranan, me pangulu te me pamilya ran. Ne migmasalig sikandan amana.
39 Ne nangendiye sikandan te inged te Gidur, diye te bangalug ne dapit te igsile eyew egpamitew te egkapanabtaban te me karniru ran.
40 Ne nakakita sikandan te dakel se hilamunen wey meupiya ne panabtaban. Luluahi seini wey malinawen, wey nangugpaan dengan te me kabuhalan ni Ham.
41 Piru te timpu te peghari ni Hisikiyas te Huda, inlusuran te narawit se me ngaran ne me kabuhalan ni Simyun ka me kabuhalan ni Ham. Inlusuran dan degma ka me Miyunihanen ne nangugpe diye, wey in-amin dan sikandan pangimatayi. Ne ka me kabuhalan e ni Simyun ka nangugpe diye kuntee, su duen ma egkapanabtaban te me karniru ran diye.
42 Me lalimma ne gatus (500) ka kabuhalan ni Simyun ne miglusud diye te Bubungan ne Siir ne impanguluwan enni Pilatiyas, ni Naariyas, ni Ripayas, wey ni Usil ne anak ni Ishi.
43 Ne impangimatayan dan ka me Amalikanen ne nakapallahuy, wey diyad e sikandan nangugpe taman kuntee.