5
Ka me kabuhalan ni Rubin
1-2 Si Rubin ka kinakakayan ne anak ni Israil, piru tenged te inggilabetan din ka duwey te amey rin, sikan naa ka naawe ka katenged din isip kinakakayan wey ka katenged din nekeendiyad te me anak ni Husi ne suled din. Minsan nekeendiyad ka katenged ni Rubin ki Husi, si Huda mule ka neyimu ne mabantug te me kabuhalan din wey migpuun te kabuhalan din ka pangulu te langun ne tribu te Israil.
3 Seini ka me lukes ne anak ni Rubin ne kinakakayan ne anak ni Israil: si Hanuk, si Palu, si Hisrun, wey si Karmi.
4-6 Seini ka me kabuhalan ni Huwil: si Simaya, si Gug, si Simii, si Mika, si Riha, si Baal, wey si Biira. Si Biira ka pangulu te me kabuhalan ni Rubin te timpu ne impandakep wey impanguyan sikandan ni Tiglatpilisir ne Hari te Asirya.
7 Seini ka me karumaan ni Rubin ne nalista diye te listaan te me kabuhalan dan: si Hiil ka pangulu wey si Sakariyas,
8 wey si Bila ne anak ni Asas. Si Asas anak ni Sima wey si Sima anak ni Huwil. Mig-ugpe sikandan puun te Aruwir peendiye te Nibu taman te Baal-Miyun.
9 Ne tenged te amane e ne masulug ka me ayam dan diye te Gilyad, neempet dan te eg-ugpe ka igsile ne dapit te eletanan te disirtu wey te Weyig ne Iyupratis.
10 Te timpu ni Hari Saul, inlusuran dan ka me kabuhalan ni Hagar wey natalu ran iya sikandan. Ne sikandan e ka nangugpe te me ugpaan te me kabuhalanan ni Hagar ne diye te igsile ne dapit te Gilyad.
Ka me kabuhalan ni Gad
11 Ne diye nangugpe ka me kabuhalan ni Gad te tane te Basan ne marani te nangugpaan te kabuhalan ni Rubin taman te Salika.
12 Ne si Huwil ka pangulu ran, ne si Sapan ka igkarangeb, wey iyan nakasinundul si Hanay wey si Sapat.
13 Ka me karumaan dan ne me pangulu te pitu ne pamilya iyan si Maykil, si Misulam, si Siyiba, si Huray, si Hakan, si Siya, wey si Ibir.
14 Sikandan ka me kabuhalan ni Abihail, ne anak ni Huri, ne anak ni Haruwa, ne anak ni Gilyad, ne anak ni Maykil, ne anak ni Hisisay, ne anak ni Hadu, ne anak ni Bus.
15 Ne iyan pangulu te me pamilya ran si Ahi ne anak ni Adbiil, ne anak ni Guni.
16 Ne diye sikandan nangugpe te Gilyad, te Basan wey te me lungsud diye, wey te intiru ne panabtaban ne diye te Sarun.
17 Nenalista sikandan langun te listaan te me kabuhalan te timpu ne iyan Hari te Huda si Hutam, wey iyan Hari te Israil si Hirubuwam.
Ka me sundalu te me kabuhalan ne diye te igsile
18 Due hep‑at ne pulu wey hep‑at ne libu wey pitu ne gatus wey hen‑em ne pulu (44,760) ne amana ne mabbulut ne me sundalu te kabuhalan ni Rubin, ni Gad, wey katenge te kabuhalan ni Husi ne iyan ka me kabuhalan ni Manasis. Amana sikandan nabbasbas te gira, wey mangngateu sikandan ne eggamit te me kalasag, kampilan, wey pane.
19 Migbubunu kandan ka me kabuhalan ni Hagar, ni Hitur, ni Napis, wey ni Nubab.
20 Ne ka mabbulut ne me sundalu te kabuhalan ni Rubin, ni Gad, wey te katenge te kabuhalan ni Husi ne iyan ka me kabuhalan ni Manasis, mig-ampu diye te Magbebaye ne Manama wey intabak din ka peg-ampu dan su migsalig ma sikandan kandin. Sikan naa ka natalu ran ka me kabuhalan ni Hagar wey ka me duma ran.
21 Ne naahew ran puun te me kabuhalan ni Hagar ka lalimma ne pulu ne libu (50,000) ne kamil, daruwa ne pulu ne gatus wey lalimma ne libu (250,000) ne karniru, wey daruwa ne libu (2,000) ne asnu. Ne nakarakep sikandan te sabeka ne gatus ne libu (100,000) ne me etew.
22 Masulug ka migpatey ne me kabuhalan ni Hagar te pegpakiggira dan su ka Manama ka migkuntere kandan. Ne iyan e nangugpe te tane dan ka me kabuhalan ni Rubin, ni Gad, wey ni Manasis, taman te naddakep wey nanguyan e sikandan te me matig-Asirya.
Ka me pangulu te kabuhalan ni Manasis
23 Ne diye nangugpe te Basan taman te Baal-Hirmun, Sinir, wey te bubungan te Hirmun ka katenge te kabuhalan ni Husi ne iyan ka me kabuhalan ni Manasis. Ne amane e migmasalig sikandan.
24 Seini ka me pangulu te tagse pamilya ran: si Ipir, si Ishi, si Iliil, si Asriil, si Hirimiyas, si Hudabiyas, wey si Hadil. Me bahani sikandan, mabbantug ne me etew, wey me pangulu te me pamilya ran.
Ka pegkarakep te me kabuhalan ne diye te igsile
25 Piru ware sikandan migmatinumanen te Manama te me kabuybuyahan dan, su nasi mule sikandan migsimba te me diyus-diyus te keet-etawan te seeye ne tane ne indereetan te Manama.
26 Sikan naa ka imbagget te Manama te Israil si Hari Pul (ne iyan si Tiglatpilisir ne Hari te Asirya) eyew eglusud kandan. Ne impandakep ni Pul ka me kabuhalan ni Rubin, ni Gad, wey ka katenge te kabuhalan ni Husi ne iyan ka me kabuhalan ni Manasis, wey impanguyan din e diye te Hala, Habur, Hara, wey diye te Weyig te Gusan, wey diye ded sikandan taman kuntee.