17
Neyimu si Hihusapat ne Hari
1 Si Hihusapat ne anak ni Asa ka migsubal kandin mighari wey inlig‑en din ka peghari din eyew egpakasukul te Israil.
2 Intahuan din te me sundalu ka langun ne me siyudad te Huda ne in-alad te matikang wey makepal ne batu wey migtahu sikandin te me kampu te sundalu te intiru ne Huda, wey te me siyudad te Ipraim ne naahew te amey rin ne si Asa.
3 Migduma ka Magbebaye ne Manama ki Hihusapat su te an-anayan ne leg‑un te peghari din, in-ikul rin ma ka inggimu ni Dabid ne kaapuan din. Ware migpangananey sikandin te me Baal,
4 ke kene diye de te Manama te kaapuan din. Intuman din ka me suhu te Manama, wey ware sikandin mig-ikul te egbatasanen te me matig-Israil.
5 Purisu, inlig‑en te Magbebaye ka migharian din. Ne migdasahan sikandin te langun ne matig-Huda sikan naa ka naratu sikandin wey amana sikandin tahura.
6 Maahet-ahet sikandin ne migpamakey te Magbebaye wey impangawe din man‑e ka me panubaran diye te me bubungan wey ka me sungkaleg ne larawan ni Asira diye te Huda.
7 Te igkatelu ne leg‑un te peghari din, impeyipanew rin ka me upisyal rin ne si Bin-Hail, si Ubadiyas, si Sakariyas, si Nitanil wey si Mikiyas eyew egpanulu te Balaud te Manama diye te me siyudad te Huda.
8 Duma ran ka me Libita ne si Simayas, si Nitaniyas, si Sibadiyas, si Asahil, si Simiramut, si Diyunatan, si Aduniyas, si Tubiyas, wey Tubaduniyas wey ka me talagpanubad ne si Ilisama wey si Hihuram.
9 In-uyan dan ka Baseen te me Balaud te Magbebaye wey impanulu dan seini diye te keet-etawan te langun ne me siyudad te Huda.
Ka kabantug ni Hihusapat
10 Ne naaldek te Magbebaye ne Manama ka langun ne me migharian ne nakalingut te Huda, sikan naa ka ware egpakiggira ki Hihusapat.
11 Ne mig-uyan ka duma ne me Pilistihanen te dasag ne pelata diye ki Hihusapat. Ne mig-uyan degma ka me matig-Arabya te pitu ne libu wey pitu ne gatus (7,700) ne me lukesan ne karniru wey pitu ne libu wey pitu ne gatus (7,700) ne me lukesan ne kambing.
12 Ne migmabantug e amana si Hihusapat. Migpasasindeg sikandin diye te Huda te me malig‑en ne me baley ne me matikang wey me siyudad ne tinesanan.
13 Dakel ka nenakatines diye te me tinesanan ne diye te siyudad te Huda.
Due degma mangngateu wey mabbulut ne me bahani rin diye te Hirusalim.
14 Ka me sundalu rin nalista sumale te tagse me kabuhalan dan ne impunduk-punduk te tigsenge-libu (1,000). Ne si Adnak ka pangulu te tatelu ne gatus ne libu (300,000) ne mabbulut ne me bahani;
15 ne ka seup kandin iyan si Diyuhanan ne due sakup ne daruwa ne gatus wey walu ne pulu ne libu (280,000) ne me sundalu;
16 ne ka seup kandin iyan si Amasiyas ne anak ni Sikri ne due sakup ne daruwa ne gatus ne libu (200,000) ne me bahani. Maahet-ahet sikandin ne mig-uney-uney ne migpamakey te Magbebaye.
17 Ne seini ka me pangulu puun te me pamilya ne kabuhalan ni Binhamin: si Iliyada ka sabeka ne bahani ne due sakup ne daruwa ne gatus ne libu (200,000) ne me sundalu ne naatul te me piet wey me kalasag.
18 Si Hihusabad ne due nabbasbas ne me sundalu ne sabeka ne gatus wey walu ne pulu ne libu (180,000) ne naatul te me panganiban te pegpakiggira.
19 Migpamakey sikandan langun diye ki Hari Hihusapat. Ne duen pad man‑e intahu te Hari ne me sundalu diye te me siyudad te Huda ne in-alad te matikang wey makepal ne batu.