18
Si prupita Mikiyas wey si Hari Ahab
(1 Hari 22:1-28)
1 Naratu si Hihusapat wey amana tahura sikandin. Migpakigsabeka sikandin ki Hari Ahab pinaahi te pegpaasaweey te me anak dan.
2 Te peglihad te pila ne leg‑un, miggendiye si Hihusapat ki Ahab diye te Samarya. Ne miggilang si Ahab te masulug ne karniru wey baka eyew te pegtahud ki Hihusapat. Ne ingginalig ni Ahab si Hihusapat ne eglusuran dan ka Ramut-Gilyad.
3 Mig-inse si Ahab ki Hihusapat, “Menu, egkarumaan e red nikeykew ka eglusud diye te Ramut-Gilyad?”
Ne migtabak si Hihusapat, “Nasabeka kid e wey ka keet-etawan ta, purisu egdumaan ku sikeykew ka egpakiggira.”
4 Ne migkahi pad ma-e si Hihusapat ki Ahab, “Piru eg-inse ki pad te Magbebaye ne Manama ke nekey ka iglalag din.”
5 Purisu, impeumew ni Ahab ka me prupita ne hep‑at ne gatus (400) wey mig-insaan din sikandan, “Egpakabubunu key naa diye te Ramut-Gilyad wey ke kene?”
Ne migtabak sikandan, “Bubunu kew su egpepanaluwen kew te Manama.”
6 Piru mig-inse si Hihusapat, “Warad duma ne prupita te Magbebaye ne egkeinsaan ta kayi?”
7 Ne migtabak ka Hari te Israil, “Duen pad, si Mikiyas ne anak ni Imla. Piru egkeepes a kandin su egkeelin de ne mareet ka igtagne din keddi; ware meupiya.”
Migtabak si Hihusapat, “Kene ka lalag te iling due.”
8 Purisu, impeumew ni Ahab ka sabeka ne upisyal wey ingkahiyan, “Angaya nu si Mikiyas ne anak ni Imla.”
9 Te seeye ne timpu, migsaluub ka daruwa ne Hari te kumbale dan te pegkahari. Migpinnuu sikandan diye te me trunu ran ne diye te diekanan ne diye te gumawan te Samarya. Ne migpanagne diye te tangkaan dan ka me prupita.
10 Ne si Sidikiyas ka sabeka ne prupita ne anak ni Kinaana, miggimu te sungey-sungey ne putew. Migkahi sikandin, “Seini ka ingkahi te Magbebaye: ‘Egpekeiling kew te baka ne putew se me sungey ne eglusud te me matig-Sirya wey egkaamin niyu sikandan.’ ”
11 Seeye ded degma ka ingkahi te duma ne me prupita. Migkahi sikandan, “Lusuri niyu ka Ramut-Gilyad wey egpanalu kew, su igbehey seini kaniyu te Magbebaye.”
12 Seeye naa ka migkahiyan si Mikiyas te seeye se insuhu ne egpahuhuren, “Nenekeg-iling ka langun ne ingkahi te me prupita ne egpakareeg ka Hari, sikan naa, keilangan ne sikan ded degma ka igkahi nu.”
13 Piru migkahi si Mikiyas, “Egpahunlibet a te neuyag ne Magbebaye ne Manama ku te iyan ku re iglalag ka igpalalag din keddi.”
14 Te pegginguma ni Mikiyas diye te Hari, mig-insaan sikandin te Hari, “Mikiyas, eglusuran ney naa ka Ramut-Gilyad wey ke kene?”
Ne migtabak sikandin, “Lusuri niyu wey egpanalu kew su igbehey seini kaniyu.”
15 Piru migkahi si Ahab kandin, “Kapapila kud e sikeykew pepahunlibeta ne sikan de se malehet ilalag nu te ngaran te Magbebaye.”
16 Ne migtabak si Mikiyas, “Nakita ku ka langun ne matig-Israil ne nekegsuwey diye te me bubungan iling te karniru ne ware talagtameng, wey migkahi ka Magbebaye, ‘Ware me ahalen dan, purisu peulia nu sikandan ne due keupianan.’ ”
17 Ne migkahi si Hari Ahab ki Hihusapat, “Ingkahiyan kud sikeykew ne kene ne meupiya ka iglalag din keddi; neelin de iya ne mareet.”
18 Migpabulus migkahi si Mikiyas, “Pammineha niyu ka lalag te Magbebaye. Nakita ku ka Magbebaye ne migpinnuu te trunu rin, wey migsasindeg ka langun ne panalihan te langit diye te igkakawanan ne belad din wey diye te igkahibang din.
19 Ne migkahi ka Magbebaye, ‘Hentew ka eglimbung ki Ahab ne Hari te Israil ne eglusud te Ramut-Gilyad eyew egpatey sikandin diye?’ Ware nekeg-iling ka tabak te me panalihan.
20 Nataman, due panisingan ne migsasindeg diye te tangkaan te Magbebaye wey migkahi, ‘Sikeddiey ka eglimbung kandin.’ Mig-inse ka Magbebaye, ‘Egmenuwen nu naa te eglimbung?’
21 Ne migtabak sikandin, ‘Eggendiya a wey egpeuubaten ku ka me prupita ni Ahab.’ Ne migkahi ka Magbebaye, ‘Hendiye kad wey himuwa nu sika wey egkeubatan nu sikandin.’ ”
22 Ne migkahi si Mikiyas, “Seeye ka neyitabu. Impeuyanan te Magbebaye seini se me prupita nu te panisingan ne egpeuubaten keykew. Igkeupii te Magbebaye ne egkareetan ka.”
23 Ne migparani ki Mikiyas si Sidikiyas ne anak ni Kinaana wey intagpi din ka beneng ni Mikiyas wey migkahi, “Hendei bes mule migbaye ka Panisingan te Magbebaye ne mig-engked keddi eyew eglalag keykew?”
24 Ne migtabak si Mikiyas, “Egkanengnengan nu sika ke eggeles kad diye te sinabeng.”
25 Ne migsuhu si Hari Ahab, “Uyana niyu sikandin wey ipalibed niyu diye ki Amun ne gubirnadur te siyudad wey diye ki Huwas ne anak ku.
26 Kahii niyu sikandan te igpaprisu ku ka seini ne etew wey egbehayan de te deisek ne paan wey deisek ne weyig taman te egpekeuli a puun te pegpakiggira ne kene egkamenu.”
27 Ne migkahi si Mikiyas, “Ke egpakalibed ka ne kene egkamenu, kene naa ne malehet ne impalalag keddi te Manama seini se langun.” Ne migkahi sikandin diye te me etew, “Tantanuri niyu ka inlalag ku.”
Ka pegpatey ni Ahab
(1 Hari 22:29-35)
28 Purisu, miglusud diye te Ramut-Gilyad si Ahab ne Hari te Israil wey si Hihusapat ne Hari te Huda.
29 Ne migkahi si Ahab diye ki Hihusapat, “Kena a egpeila ne Hari a ka egpakiggira. Ne saluub ka mule te igkukumbale te pegkahari.” Purisu, migpakiggira sikandin ne kene egkeilaan ne Hari.
30 Ne insuhu te Hari te Sirya ka me kumandir te me talag-uyan te me karwahi ne kene egpabunuen te minsan hentew angin e te Hari te Israil.
31 Te pegkakita te me kumandir te me talag-uyan te me karwahi ki Hihusapat, kahiyen dan ne sikandin ka Hari te Israil, purisu indugpu dan sikandin eyew egbunuen. Ne migpangananey si Hihusapat te Magbebaye. Ne impepariyu te Magbebaye seeye se egdugpu kandin.
32 Te nakamaan-maan e seeye se me kumandir te me talag-uyan te me karwahi te kene bes ne sikandin ka Hari te Israil migsanggel e sikandan ka eglupug kandin.
33 Te sasangan pad ka gira, due etew ne egpanalasew re due egpamane wey nasuhat ka Hari te Israil. Diye sikandin nasuhat te temuwanan te igdingding te lawa ne insaluub din. Purisu, migkahi sikandin diye te talag-uyan te karwahi rin, “Ipariyu a nikeykew su napalian a.”
34 Ne migmasumpit pad ka gira te seeye ne aldew, wey nakasandig naan de si Hari Ahab diye te karwahi rin ne nakatangke diye me matig-Sirya taman te maapun. Ne migpatey e sikandin te peglineb te aldew.