12
Ka pegpanaha-taha ni Samwil
1 Ne ingkahiyan ni Samwil ka me matig-Israil, “Intuman ku ka langun ne inlalag niyu wey imbehayan ku sikaniyu te Hari ne egmandu kaniyu.
2 Ne kuntee duen e Hari niyu ne egpangulu kaniyu. Meyitenged keddiey, migmandu a kaniyu bunsud pad te pegkabate ku taman kuntee. Piru buyag ad e wey ubanen e, wey derakel e degma ka me anak ku wey duma niyu iya mismu sikandan.
3 Kuntee nangeni a ke nekey ka igkarew‑ey niyu keddi diye te tangkaan te Magbebaye ne Manama wey diye te tangkaan te Hari ne in-alam din. Duen naa ingkuwa ku ne asnu wey ke baka naa te senge-etew? Duen naa inlimbungan ku wey ke indeeg-deeg ku? Migdawat e naa te seleppi ne bayad te kene ne eleg ne peggukum? Pamaleheti niyu ke nekeyimu a te iling dutu su ig-uli ku seeye kaniyu.”
4 Migtabak sikandan, “Ware ka migpanlimbung wey migdeeg-deeg kanami wey ware ka degma migkuwa te minsan nekey ne egpuun te senge-etew.”
5 Ne ingkahiyan din sikandan, “Te seini ne aldew, egpakapamalehet ka Magbebaye wey ka Hari ne in-alam din te ware nakita niyu ne seyyup ne neyimu ku.”
Ne migkahi sikandan, “Uya, egpakapamalehet ka Magbebaye.”
6 Ne ingkahiyan ni Samwil ka keet-etawan, “Ka Magbebaye ka mig-alam ki Muwisis wey ki Aarun ne egkeyimu ne pangulu te kabuybuyahan niyu ne me matig-Israil, wey sikandin ka migpalihawang kandan puun te Ihiptu.
7 Ne kuntee, pabulus kew sasindeg due te tangkaan te Magbebaye, taheed te igpasuman-suman ku kaniyu ka langun ne meupiya ne neyimu te Magbebaye kaniyu wey te kabuybuyahan niyu.
8 Ne migpangananey si Hakub wey ka me anak din te Magbebaye te diye sikandan te Ihiptu. Sikan naa ka impeuyan te Magbebaye si Muwisis wey si Aarun ne iyan migpalihawang te me kabuybuyahan niyu puun te Ihiptu, wey ka migpeugpe kandan te seini ne inged.
9 Piru inlingawan te me etew ka Magbebaye dan, sikan naa ka impatalu rin e sikandan ki Sisira, ka pangulu te sundalu ni Habin ne Hari te Hasur, wey te me matig-Pilistiya, wey te Hari te Muwab.
10 Ne migpangananey sikandan te Magbebaye ne migkahi, ‘Nakasale key su mig-engkeran ney sikeykew Magbebaye, wey migpamakey key te me larawan ni Baal wey Astarut. Piru luwasa key kuntee puun te me kuntere ney wey egpamakey key e keykew.’
11 Ne insuhu te Magbebaye si Gidyun, si Barak, si Hipta, wey sikeddiey. Ne inluwas ney sikaniyu puun te me kuntere niyu ne miglingut kaniyu. Ne kuntee, warad igkaaldek niyu te peg-ugpe niyu.
12 Te pegkakita niyu ne eglusuran kew e ni Nahas ne Hari te me kabuhalan ni Amun, migkahiyan ad e nikaniyu, ‘Egkeupian key te Hari ne egmandu kanami,’ minsan se ka Magbebaye ka Hari niyu.
13 “Ne kuntee seinid e ka Hari ne in-alam niyu. Imbuyu niyu sikandin wey imbehey e sikandin kaniyu te Magbebaye.
14 Keupianan niyu ke igkaaldek niyu ka Magbebaye, egpamakayen, wey egtumanen ka me suhu din, wey ke eg-ikulen niyu duma te Hari niyu ka Magbebaye ne Manama niyu.
15 Piru ke kene kew eg-ikul te Magbebaye, wey ke kene kew egtuman te me suhu din, eglegparan kew nikandin wey ka Hari niyu.
16 Purisu paheed-geed kew sasindeg wey pitawa niyu ka kein-inuwan ne eggimuwen te Magbebaye due te tangkaan niyu.
17 Tinggaani kuntee te trigu wey ware uran te seini ne timpu. Piru eg-umawen ku ka Magbebaye ne egpaluluhung wey egpeuran su eyew egkanengnengan niyu ke kamenu kareet ka neyimu niyu diye te tangkaan te Magbebaye pinaahi te pegbuyu niyu te Hari.”
18 Sikan naa, in-umew ni Samwil ka Magbebaye. Purisu migpaluluhung wey migpeuran ka Magbebaye te sika ne aldew wey naaldek-haldek ka langun ne etew te Magbebaye wey ki Samwil.
19 Ne ingkahiyan si Samwil te langun ne etew, “Ampu ka te Magbebaye nu para te me suluhuanen nu su eyew kene key egpamatey su intimulan ney ka sale ney pinaahi te pegbuyu ney te Hari.”
20 Ne migkahiyan ni Samwil ka keet-etawan, “Kene kew kaaldek. Minsan nekeyimu kew te sika ne sale, piru kene kew engked te Magbebaye, ke kene, pamakaya niyu sikandin te intiru ne pusung niyu.
21 Kene kew engked kandin tenged te ware karuan ne me diyus-diyus ne kene egpakabulig wey ke egpakaluwas naa kaniyu.
22 Su kene egsamsamilian te Magbebaye ka keet-etawan din su egkeyilawan ka mabantug ne ngaran din, su ingkahale din ka peggimu rin kaniyu ne keet-etawan din.
23 Kena a iya egsanggel ne eg-ampu para kaniyu, su ke kene ku seini eggimuwen, egpakasala a te Magbebaye. Ne egpanuluen ku sikaniyu te meupiya wey eleg ne dalan.
24 Kaaldeki niyu re iya ka Magbebaye wey pamakaya niyu te intiru ne pusung niyu. Sumsumana niyu ka me kein-inuwan ne inggimu rin para kaniyu.
25 Piru ke egpabulus kew ne eggimu te sale, egkengareetan kew iya lagkes ka Hari niyu.”