13
Ka pegdew‑ey ni Samwil ki Saul
1 Tatelu ne pulu (30) ka idad ni Saul te timpu ne neyimu sikandin ne Hari te Israil wey mighari sikandin te hep‑at ne pulu wey daruwa (42) ne leg‑un.
2 Mig-alam si Saul te tatelu ne libu (3,000) ne etew ne me matig-Israil. Ka daruwa ne libu (2,000), induma rin diye te Mikmas wey diye te bubungan te Bitil. Ka senge-libu (1,000), imparuma rin ki Diyunatan diye te Gibiya ne sakup te Binhamin. Ne impeuli din e diye te tagse ugpaan dan ka duma ne me etew.
3 Inlusuran ni Diyunatan ka kampu te me matig-Pilistiya diye te Giba wey narineg seini te duma ne me matig-Pilistiya. Purisu, migsuhu si Saul ne egparahingen ka me trumpita te intiru ne Israil eyew te peglibulung te me Hibruwanen te pegpakiggira.
4 Narineg te langun ne matig-Israil ne natalu ni Saul ka me matig-Pilistiya ne inlusuran din diye te kampu, ne egdumutan e sikandan te me matig-Pilistiya. Purisu, impeumew ka me sundalu eyew te peglibulung duma ki Saul diye te Gilgal.
5 Ne miglibulung ka me matig-Pilistiya eyew egpakiggira te Israil: due tatelu ne pulu ne libu (30,000) ne karwahi ran, wey hen‑em ne libu (6,000) ne etew ne migmangudde wey due me sundalu ne egpekeiling kasalig te pantad diye te ilis te weyig. Ne miggendiyad e sikandan te Mikmas, diye te igsile te Bit-Abin, wey diye dan e migkekampu.
6 Te nakamaan-maan ka me matig-Israil te egkeenget-enget e sikandan su egkasegseg man‑e sikandan te me kuntere dan, nangeles e sikandan diye te me sulung, diye te mabbenes, diye te me dalama, diye te me lungag, wey diye te me belun.
7 Ne miglapas e ka duma te Weyig ne Hurdan peendiye te Gad wey diye te Gilyad.
Ne si Saul diye de mule te Gilgal wey migkelkel ka langun ne sundalu ne migduma kandin.
8 Ne migtetahad si Saul te pitu ne aldew diye te Gilgal sumale te ingkerew ni Samwil kandin, piru ware miggendiye si Samwil. Puun due, bunsud e egmemekegsuwey-suwey ka me sundalu ni Saul.
9 Sikan naa ka migkahi e si Saul, “Uyana niyu kayi te keddi ka igpanubad ne egtutungen wey ka igpanubad para te keupianan.” Ne impanubad din e ka egtutungen ne igpanubad.
10 Te nekeimpus e si Saul ka egpanubad, miggingume e si Samwil, sikan naa ka miglihawang e si Saul eyew te peg-alumama kandin.
11 Ne mig-inse si Samwil, “Nekey‑a ka inggimu nu?”
Ne migtabak si Saul, “Te pegpitew ku ne egmemekegsuwey-suwey e ka me sundalu wey ware ka migginguma te kerew nu, wey nalibulung e ka me matig-Pilistiya diye te Mikmas,
12 nakakahi a, ‘Eglusuran ad iya kuntee te me matig-Pilistiya kayi te Gilgal, ne ware e re due nakapangananey te Magbebaye ne Manama.’ Sikan naa ka napehes a ne egpanubad te egtutungen ne igpanubad.”
13 Ne migkahiyan ni Samwil si Saul, “Keungelan ka inggimu nu. Ware nu tumana ka insuhu keykew te Magbebaye nu. Ke intuman nu seeye, egpaharien din perem ka kabuhalan nu te ware egtamanan kayi te Israil.
14 Piru kenad e kuntee egpakabulus sika se peghari te kabuhalan nu. Egpamitew e ka Magbebaye te igkahale din ne etew ne igkeupii rin ne eghari te keet-etawan din, tenged su ware nu tumana ka suhu din.”
15 Ne mig-awe e si Samwil diye te Gilgal wey miggendiyad e te inged ne Binhamin diye te Gibiya. Ne inseel ni Saul ka me sundalu ne nasame diye te kandin wey me hen‑em ne gatus (600) ka kasuluhan dan langun.
16 Ne migkekampu diye te Giba ne sakup te Binhamin si Saul, si Diyunatan ne anak din, wey ka me etew rin, taheed te diye degma migkekampu ka me matig-Pilistiya te Mikmas.
17 Ne due tatelu ne punduk te me matig-Pilistiya ne miglihawang puun te kampu ran eyew te pegpanlusud. Ka sabeka ne punduk, miggendiye te Upra diye te inged ne Suwal.
18 Ka sabeka ne punduk, miggendiye te Bit-Hurun, wey ka sabeka ne punduk, miggendiye te katamanan te bubungan ne egpakapantew te napu te Sibuyim ne lenged te disirtu.
19 Te seini ne timpu ware Hibruwanen ne mannayab diye te intiru ne Israil tenged su ware tuhuti sikandan te me matig-Pilistiya su kema ke egmannayab sikandan te me kampilan dan wey me deldeg.
20 Sikan naa ka eggendiye ka langun ne matig-Israil te me matig-Pilistiya eyew te pegpakamanga te me daru ran, piku ran, wasey ran, wey me galab dan.
21 Ne mahal ka bayad te pegpakamanga te daru, wasey, piku, wey te iddus ne putew te tuked ne igdalusung te mananap.
22 Sikan naa, ware kampilan wey deldeg te me etew ni Saul wey te me etew ni Diyunatan te aldew te gira, piru due mule ki Saul wey ki Diyunatan.
23 Ne miggendiye te migbangalug ne dalan te Mikmas ka sabeka ne punduk te me matig-Pilistiya eyew te pegbantey diye.