4
1 Ne nekeempet te intiru ne Israil ka lalag ni Samwil.
Ka pegkaahew te Tahuanan te Kasabutan
Te seeye ne timpu, migpakiggira ka me matig-Israil te me matig-Pilistiya. Ne migkekampu ka me matig-Israil diye te Ibinisir wey diye degma migkekampu ka me matig-Pilistiya te Apik.
2 Ne migluyud miglusud ka me matig-Pilistiya ka egpakig-ehet te me matig-Israil. Te egpahiggireey e sikandan, natalu te me matig-Pilistiya ka me matig-Israil wey namatayan sikandan te hapit eghep‑at ne libu (4,000) ne etew diye te giraanan.
3 Te peg-uli te nasame ne me matig-Israil ne sundalu diye te kampu ran, migkahi e ka me igdatu te Israil, “Mania te intuhut te Magbebaye ne Manama ne natalu ki te me matig-Pilistiya? Eg-uyanen ta kayi ka Tahuanan te Kasabutan te Magbebaye puun te Silu eyew egdumaan ki nikandin wey egluwasan puun te me kuntere ta.”
4 Sikan naa ka migsuhu sikandan te me etew te peggendiye te Silu eyew eg-angey te Tahuanan te Kasabutan te Amana ne Maresen ne Magbebaye, ne migpinnuu diye te trunu rin elat-elat te daruwa ne larawan te kirubin ne diye te ampew te Tahuanan te Kasabutan. Ne migduma te migkuwa te Tahuanan te Kasabutan ka daruwa ne anak ni Ili, ne si Hupni wey si Pinihas.
5 Te pegkeuma te Tahuanan te Kasabutan te Magbebaye diye te kampu, migmanguleyi e te heemeni ka langun ne me matig-Israil wey nawelwel ka tane.
6 Te pegkarineg te me matig-Pilistiya te pegpanguleyi dan, migkahi e sikandan, “Nekey‑a ka igpasabut te heemeni ne pegpanguleyi diye te kampu te me Hibruwanen?” Te pegkanengnengi ran ne diyad te kampu ka Tahuanan te Kasabutan,
7 nenaaldek e ka me matig-Pilistiya wey migkahi, “Due sabeka ne manama ne migginguma diye te kampu ran! Mekeyid‑u-hid‑u ki su ware de due neyitabu ne iling kayi bunsud pad dengan!
8 Mekeyid‑u-hid‑u ki! Hentew naa ka egpakaluwas kanta puun te seini se maresen ne me manama? Seini ka me manama ne migpangimatey te me matig-Ihiptu pinaahi te langun ne klasi te karereetan diye te disirtu!
9 Piru egpakannekal ki se me matig-Pilistiya wey igpapitew ta ka pegkalukes ta, su ke kene, egkeuripen ki te me Hibruwanen iling te uripen ta dengan sikandan. Igpapitew ta ka pegkalukes ta wey egpakig-ehet ki iya kandan.”
10 Sikan naa ka migpakig-ehet ka me matig-Pilistiya wey natalu ran ka me matig-Israil. Masalig amana ka migpatey te sundalu te Israil. Namatayan sikandan te tatelu ne pulu ne libu (30,000) ne me sundalu wey namallahuy e peendiye te ugpaan dan ka nasame ne me matig-Israil.
11 Ne naahew ka Tahuanan te Kasabutan te Manama wey namatey ka daruwa ne anak ni Ili ne si Hupni wey si Pinihas.
Ka pegpatey ni Ili
12 Ne due sabeka ne etew ne egpuun te me kabuhalan ni Binhamin ne nakapallahuy puun te giraanan wey nekeuma sikandin diye te Silu te sikan ded ne aldew. Inggisi din ka kumbale din wey intahuan din te tane ka ulu rin isip pegpakita te peglungku din.
13 Te pegginguma rin, diye migpinpinnuu si Ili te pinnuuwan din diye te ilis te dalan ka egmemetmet diye te kewun‑an su amana sikandin nalaggew te Tahuanan te Kasabutan te Manama. Te pegginguma te etew diye te siyudad, in-empet din e ihuhud ka neyitabu wey migpandalawit e ka langun ne nakarineg.
14 Te pegkarineg ni Ili te kahulub, mig-inse e sikandin, “Nekey‑a ka igkewukag dan?” Ne migdagdahew miggendiye ka etew ki Ili eyew te pegpangguhud kandin.
15 Ne siyam e ne pulu wey walu (98) ka idad ni Ili wey egpangalap-halap naan de se pegtengteng din, sikan naa ka kene din e egpakameleg-meleg.
16 Ne migkahiyan te etew si Ili, “Puun e pad te giraanan. Migpallahuy a puun diye te seini ne aldew.”
Ne mig-inse si Ili, “Tatu, nekey‑a ka neyitabu?”
17 Ne migtabak ka etew ne migpangguhud, “Natalu te me matig-Pilistiya ka me matig-Israil wey namallahuy e sikandan. Masalig ka migpatey ne me sundalu ta lagkes ka daruwa ne me anak nu ne si Hupni wey si Pinihas, wey naahew ka Tahuanan te Kasabutan.”
18 Te pegdawit te etew te Tahuanan te Kasabutan, neulug e si Ili ne nakaley-ang puun te pinnuuwan din diye te kakiliran te gumawan te lungsud. Nahepu ka lieg din wey namatey e sikandin tenged su mabehat sikandin wey buyag e. Neyimu sikandin ne pangulu te Israil te hep‑at ne pulu (40) ne leg‑un.
Ka pegpatey te asawa ni Pinihas
19 Te seeye ne timpu, egkaberes ka ambey ni Ili ne asawa ni Pinihas wey mahaan e eglesuti. Te pegkarineg din te guhuren ne naahew ka Tahuanan te Kasabutan wey namatey e ka anuhang din wey ka asawa rin, sahuhune ne egkasakitan e sikandin. Miglesut ka bate piru subla ne masakit ka inggeram din te inlesutan.
20 Te egkapatey e sikandin, ingkahiyan sikandin te me malitan ne mig-uyamu kandin, “Kene ka kalaggew su lukes ka anak nu.” Piru ware sikandin migtabak wey ke miglinga-linga naa.
21 Ne ingngaranan din ki Ikabud ka bate te migkahi, “Warad e ka katelesan te Israil,” su naahew e ka Tahuanan te Kasabutan wey namatey e ka anuhang din wey ka iglukes din.
22 Ne migkahi pad man‑e sikandin, “Warad e ka katelesan te Israil su naahew e ka Tahuanan te Kasabutan.”