5
Ka peg-uyan te Tahuanan te Kasabutan diye te Asdud
1 Te pegkaahew e te me matig-Pilistiya te Tahuanan te Kasabutan te Manama, in-uyan dan e seini puun te Ibinisir peendiye te Asdud.
2 Ne in-uyan dan seini diye te timplu te diyus-diyus dan ne si Dagun wey diye dan seini itahu te andang te larawan din.
3 Te peggimata te me etew te Asdud te seup ne maselem, nakita ran ne nakalangkeb e ka larawan ni Dagun diye te tane, diye te tangkaan te Tahuanan te Kasabutan te Magbebaye ne Manama. Sikan naa ka ingkuwa ran e ka larawan ni Dagun wey inlibed dan e itahu diye te natahuan kayi.
4 Piru te peggimata ran te seup ne meselem, nakalangkeb e man‑e ka larawan ni Dagun diye te tane, diye te tangkaan te Tahuanan te Kasabutan te Magbebaye. Ne ka ulu wey ka me belad kayi, nenatempug e wey diyad nakatahu te gumawan. Ka lawa naan de kayi ka nasame.
5 Purisu ka me talagpanubad ni Dagun wey ka langun ne egseled diye te timplu rin diye te Asdud, kenad e egdiek diye te gumawan taman kuntee.
Ka me siyudad ne inlegparan te Manama
6 Impatamtamanan legpari te Magbebaye ka keet-etawan te Asdud wey ka marani ne me bariyu kayi. Impaantus din amana sikandan pinaahi te masumpit ne me buu.
7 Te pegkakita te me etew te Asdud te neyitabu, migkahi e sikandan, “Keilangan ne kene egpakatetahu kayi ka Tahuanan te Kasabutan te Manama te Israil su impaantus ki nikandin wey ka diyus-diyus ta ne si Dagun.”
8 Purisu impeumew ran ka langun ne pangulu te me matig-Pilistiya wey mig-insaan, “Nekey‑a ka eggimuwen ta te Tahuanan te Kasabutan te Manama te Israil?”
Ne migtabak sikandan, “Keilangan ne eg-uyanen seini diye te Gat.” Purisu in-uyan dan e ka Tahuanan te Kasabutan diye te Gat.
9 Piru te diyad e seini te Gat, inlegparan e degma te Magbebaye ka me etew te sika ne siyudad—kanakan ma wey se buyag. Nenaaldek amana sikandan su impatubuan ma sikandan te Magbebaye te masumpit ne buu.
10 Sikan naa ka indulung dan e diye te Ikrun ka Tahuanan te Kasabutan te Manama, piru te igpaseled dan e seini diye te Ikrun, migmanguleyi e ka keet-etawan diye, “In-uyan dan kayi te kanta ka Tahuanan te Kasabutan te Manama eyew te peggimatey kanta langun.”
11 Sikan naa ka impeumew ran ka langun ne me pangulu te matig-Pilistiya wey migkahiyan, “Ipariyu niyu kayi ka Tahuanan te Kasabutan te Manama te Israil. Iuli niyu red seini diye te migpuunan kayi, su ke kene, egkengamatey ki langun.” Nakahi ran seeye su migbunsud man e ka peglegpad te Manama te siyudad. Nenaaldek sikandan su masalig ma ka migpatey.
12 Ne impanlebahan ka me etew ne ware migpatey wey nekeuma diye te langit ka pegpangananey ran.