6
Ka peg-uli te Tahuanan te Kasabutan
1 Te timpu ne diye pad te me matig-Pilistiya ka Tahuanan te Kasabutan te Magbebaye ne Manama te pitu ne bulan,
2 impeumew te pangulu te me matig-Pilistiya ka me talagpanubad wey ka egmahehane wey ingkahiyan, “Nekey‑a ka eggimuwen ta te Tahuanan te Kasabutan te Magbebaye te Israil? Nangeni key ke egmenuwen ney te eg-uli seini diye te migpuunan kayi?”
3 Ne migtabak sikandan, “Ke ig-uli niyu ka Tahuanan te Kasabutan te Manama, parumeyi niyu seini te halad isip bayad te sale niyu. Ne egkeulian kew e wey egkatahaan niyu ke mania te egpabul-bulusan kew nikandin te eglegpad.”
4 Ne mig-inse sikandan, “Nekey ne halad isip bayad te sale ka igpeuyan ney diye te kandin?”
Migtabak sikandan, “Lalimma ne timman ne bulawan ne impeiling te buu wey lalimma ne timman ne bulawan ne impeiling te ambew, sumale te kasulug te me pangulu te matig-Pilistiya, tenged su nekeg-iling kew re langun te me pangulu niyu ne nakaneem-neem te sika ne me karereetan.
5 Purisu, himu kew te larawan te me buu wey te me ambew ne migdereet te nasud wey tahura niyu ka Manama te Israil su kema ke igsanggel rin e ka peglegpad kaniyu, te me manama niyu, wey te nasud niyu.
6 Mania te makehal ka me ulu niyu iling te inggimu te me matig-Ihiptu wey te Hari dan? Ware dan naa peyipanawa ka me Israilita human sikandan duseyi patamtamani te Manama?
7 Sikan naa, andam kew te iyam ne kerumata wey daruwa ne inayan ne baka ne ware pad nasangeni te yuggu. Sangeni niyu seini te kerumata piru kene niyu iparuma kandan ka me nati kayi.
8 Ne kua niyu ka Tahuanan te Kasabutan te Magbebaye ne Manama wey irulan niyu te kerumata. Ne itahu niyu degma diye te andang kayi ka kehun ne intahuan te larawan ne me bulawan ne igparuma niyu isip halad ne bayad te sale. Ne peyipanawa niyu ka me baka wey balahara niyu re due ke hendei seini egpabaye.
9 Piru pipitawa niyu ke egpabulus naa seini diye te Bit-Simis ne sakup te tane te me matig-Israil, su sika ka palinneu ne ka Magbebaye iya te Israil ka miggimu te dakel ne karereetan. Piru ke kene, egpakakahi ki te kene ne ka Magbebaye te Israil ka miglegpad kanta, ke kene, neyitabu de due seini.”
10 Ne inggimu seini te me etew. Migkuwa sikandan te daruwa ne baka ne inayan wey insangenan dan seini te kerumata wey ingkulung dan ka me nati kayi.
11 Ne indulan dan ka Tahuanan te Kasabutan te Magbebaye diye te kerumata wey ka kehun ne intahuan te me bulawan ne impeiling te ambew wey me buu.
12 Ne migpalaheteng migpeendiye te Bit-Simis ka me baka ne mig-ikul te dalan ne egmangngaa-ngaa taheed te eggipanew sikandan. Ne ware suwey-suwey ran wey migsinundul kandan ka me pangulu te me matig-Pilistiya taman diye te katamanan te Bit-Simis.
13 Te seini ne timpu, miggaani te trigu diye te napu ka me etew te Bit-Simis. Te pegtenggak dan, nakita ran ka Tahuanan te Kasabutan. Ne nenaggale sikandan te pegkakita ran kayi.
14 Ne nekeuma ka me baka ne migganuy te kerumata diye te kamet ni Huswi ne matig-Bit-Simis wey migsanggel seini diye te kakiliran te dakel ne batu. Ne ingguhuhus e te me etew ka kerumata diye wey inggimatayan dan e ka me baka wey intutung isip igpanubad te Magbebaye.
15 Te ware dan pad seeye himuwa, impepamaneug pad te me Libita ka Tahuanan te Kasabutan wey ka kehun ne andang kayi ne intahuan te bulawan ne impeiling te ambew wey buu wey in-untud dan e seeye diye te dakel ne batu. Te seeye ne aldew, mighalad pad man‑e ka me etew wey migpanubad te egtutungen diye te Magbebaye.
16 Te pegkakita kayi te lalimma ne pangulu te me matig-Pilistiya, nanguli e sikandan diye te Ikrun te sika ne aldew.
Ka me bulawan ne impeiling te buu
17 Ka lalimma ne bulawan ne impeiling te buu, egpuun te lalimma ne siyudad te me matig-Pilistiya ne iyan sika se siyudad te Asdud, Gasa, Askilun, Gat, wey Ikrun. Impeuyan dan seeye isip halad ne igbayad te me sale dan diye te Magbebaye.
18 Ka me bulawan ne impeiling te me ambew, para seeye te me siyudad ne in-alad wey te nakalingut ne me bariyu ne ware alara ne immanduan te lalimma ne pangulu te me matig-Pilistiya. Ka dakel ne batu diye te kamet ni Huswi ne diye te Bit-Simis ne in-unturan te Tahuanan te Kasabutan ka egpakapamalehet ke nekey ka neyitabu.
19 Ne due pitu ne pulu (70) ne etew ne impangimatayan te Magbebaye diye te Bit-Simis su migpitew ma sikandan te seled te Tahuanan te Kasabutan. Ne miglungku ka keet-etawan tenged te masalig ka impangimatayan te Magbebaye diye te kandan.
Ka Tahuanan te Kasabutan diye te Kiryat-Hiyarim
20 Sikan naa ka migkahi ka me etew diye te Bit-Simis, “Hentew‑a ka egpakasasindeg diye te tangkaan te Magbebaye, ka matulus ne Manama? Hendei te naa igpeuyan ka Tahuanan te Kasabutan te Magbebaye eyew egpakapariyu seini kanta?”
21 Sikan naa ka migsuhu sikandan te egpahuhuren diye te Kiryat-Hiyarim te pegkahi, “In-uli e te me matig-Pilistiya ka Tahuanan te Kasabutan te Magbebaye. Angaya niyu seini kayi wey uyana niyu due te kaniyu.”