11
Ka peg-ahew ni Dabid te asawa ni Uriyas
1 Te tingsubul e te me pinamula te seeye ne leg‑un, te timpu ne egpangipanew ka me Hari eyew te pegpakiggira, impepangayew e ni Dabid si Huwab wey ka me upisyal rin, wey ka langun ne me sundalu te Israil. Ne natalu ran ka me Amunihanen wey inlingutan dan ka Raba. Piru migpalunggehaat de mule si Dabid diye te Hirusalim.
2 Te sabeka ne maapun, mig-enew si Dabid puun te hibatanan din wey miggiphipanew sikandin diye te atep te palasyu rin. Ne dutu, due napantew rin ne malitan ne migpamanihus ne tetelesi amana.
3 Ne migsuhu si Dabid te etew eyew te peg-inse-inse meyitenged te seeye ne malitan. Ne due sabeka ne etew ne migkahi, “Si Batsiba ka ngaran din. Anak sikandin ni Ilyam, wey asawa ni Uriyas ne Hitihanen.”
4 Ne impaangey ni Dabid si Batsiba. Ne miggendiyad e si Batsiba ki Dabid wey ingguliran e sikandin ni Dabid. (Te seeye ne timpu, sikan pad iya nekeimpus si Batsiba ka migtuman te tagse bulan ne tulumanen te peglinis te eglangeseen.) Te neimpusan e seeye, mig-uli e si Batsiba.
5 Ne nataman, naberes e si Batsiba wey impakahiyan din si Dabid te egkaberes e sikandin.
6 Purisu impakahiyan ni Dabid si Huwab, “Ipeendini nu si Uriyas, ka Hitihanen.” Sikan naa ka impeendiyad e ni Huwab si Uriyas ki Dabid.
7 Te pegginguma ni Uriyas, in-insaan e sikandin ni Dabid, “Na, menua si Huwab wey ka me sundalu, wey nekey e ka natamanan te pegpakiggira niyu?”
8 Ne ingkahiyan ni Dabid si Uriyas, “Uli ka diye te kaniyu, wey himeley ka.” Ne mig-awe e si Uriyas diye te palasyu te Hari wey impasinundulan sikandin te dasag puun te Hari.
9 Piru ware mig-uli si Uriyas diye te baley rin. Diye nasi sikandin miglipereng te gumawan te palasyu duma te me talagbantey te palasyu te Hari.
10 Te nahuhuran dan e si Dabid te ware mig-uli si Uriyas diye te kandan, impeumew rin e si Uriyas wey in-insaan, “Mania te ware ka mig-uli diye te baley niyu te naluhey kad ma ka ware diye te kaniyu?”
11 Ne migtabak si Uriyas ki Dabid, “Diye kuntee te me kampu ne diye te kanapnapuan ka Tahuanan te Kasabutan wey ka me sundalu te Israil wey Huda. Ne diye iya degma ka pangulu ney ne si Huwab duma te me upisyal rin. Na, eggendiye e bes naa mule te baley ku eyew egkeen, eg-inum, wey eggulid te asawa ku? Mengeyibet te umul nu, kene ku iya sika eggimuwen.”
12 Ne ingkahiyan ni Dabid si Uriyas, “Kayi ke naan pa uugpe kuntee ne aldew, wey kaaselem kud sikeykew igpalibed diye te giraanan.” Purisu migpalunggehaat pad si Uriyas diye te Hirusalim te seeye ne aldew. Te seup ne aldew,
13 ingginggat e ni Dabid si Uriyas te egkeen wey eg-inum duma kandin, wey impewubuhan sikandin ni Dabid. Piru te pegkamarusilem, ware ded man‑e sikandin mig-uli wey diye ded man‑e sikandin miglipereng te gumawan te palasyu duma te me talagbantey te gumawan te palasyu.
14 Te pegkamaselem, insulatan ni Dabid si Huwab, wey imparulung din seini ki Uriyas.
15 Seini ka tahu te sulat, “Ipewun‑a nu si Uriyas diye te due masumpit ne egpahiggireey. Ne isues kew naan e puun kandin eyew egkasuhat sikandin wey egkapatey.”
16 Purisu taheed te inlingutan e enni Huwab ka siyudad te Raba, diye din e mule iparapit si Uriyas te due mabbulut ne me sundalu ne me kuntere.
17 Ne migmanlihawang ka me sundalu te siyudad ka egpakiggira engki Huwab. Ne due pila-pila te me sundalu ni Dabid ne migpatey, wey nakalagkes si Uriyas ne Hitihanen.
18 Ne migsuhu si Huwab ne egpahuhuran si Dabid te langun ne neyitabu meyitenged te gira.
19 Ne impanpanayan ni Huwab ka insuhu din, “Ke egkeimpusan nu te egguhud ka Hari meyitenged te gira,
20 ne emun ke egkabelu sikandin wey eg-insaan ka, ‘Mania te amana kew migparani te siyudad ka egpakiggira? Ware kew bes nakataha te egkaayunan kew nikandan te egpane puun te matikang wey makepal ne alad ne batu te siyudad?
21 Nalingew kew bes ke nekey ne paahi ne namatey si Abimilik ne anak ni Hirubisit diye te Tibis? In-uluhan sikandin te malitan te batu ne galingan puun diye te dibabew te alad te siyudad wey namatey sikandin. Mania iya te amana kew migparani te alad te siyudad?’ Ne tabaka nu naa sikandin, ‘Namatey degma ka suluhuanen nu ne si Uriyas ne Hitihanen.’ ”
22 Ne miggipanew e seeye se insuhu. Te pegginguma rin, ingguhuran din e si Dabid te langun ne impanaha ni Huwab kandin.
23 Ne ingkahiyan din si Dabid, “Subla re ne malig‑en ka kuntere para kanami. Inlusuran key nikandan diye te napu piru nenakapallahuy sikandan palibed diye te gumawan te siyudad dan.
24 Ne impamane key te me talagpane ne diye te alad te siyudad wey due pila-pila kanami ne namatey. Ne namatey degma si Uriyas, ka Hitihanen.”
25 Ne ingkahiyan ni Dabid seeye se insuhu, “Kahii nu si Huwab, ‘Kene ka kalaggew te neyitabu su kene iya egkanengnengan ke hentew ka egpatey te gira. Pakannekali niyu te eglusud ka siyudad taman te egkasubalan niyud seini.’ Ne baggeta nu naa si Huwab.”
26 Te pegkarineg ni Batsiba te napatey ka iglukes din ne si Uriyas, miglungku e sikandin.
27 Te nataman e ka peglungku din, impaangey e sikandin ni Dabid wey impeendiyad te palasyu rin. Ne in-asawa e sikandin ni Dabid, wey nakaanak sikandin te lukes. Piru ware ikeupii te Magbebaye ne Manama ka inggimu ni Dabid.