12
Ka pegsapad ni Natan ki Dabid
1 Ne impeendiye te Magbebaye ne Manama si prupita Natan ki Dabid. Te pegginguma rin diye ki Dabid, ingguhuran din e sikandin, “Due daruwa ne etew diye te sabeka ne siyudad. Meyaman ka sabeka wey egkaayu-ayu ka dangeb.
2 Masulug amana ka me karniru wey me baka te meyaman,
3 piru ka egkaayu-ayu ne etew sabsabeka re mule ka ayam din ne beyan ne karniru ne nabeli rin. Ne intanggu rin ka karniru wey migtulin diye te baley rin duma kandin wey te me anak din. Ne iyan din de igpakeen-keen ka pegkeen din wey diye din de egpein-inuma te inumanan din, wey egsapsapipiyen din seini. Ne egpekeiling seini te malitan ne anak din.
4 Ne due mahaliyug te meyaman ne migginguma, piru kene sikandin egkeupian ne egkuwa te sabeka te me karniru rin wey ke baka naa eyew igpakeen te seeye se mahaliyug din. Piru nasi din iyan kua ka karniru te egkaayu-ayu ne etew. Ne impahilang din seini eyew igpakeen din te mahaliyug din.”
5 Ne nabelu-belu amana si Dabid te seeye se meyaman ne etew wey ingkahiyan din si Natan, “Egpahunlibet a te manekal ne Magbebaye ne Manama, ne eleg ne egpatey ka etew ne miggimu due.
6 Keilangan ne egliwanan din te hep‑at ne karniru ka karniru ne ingkuwa rin tenged te inggimu rin wey tenged su ware keyid‑u rin.”
7 Ne ingkahiyan ni Natan si Dabid, “Sikeykew ka sika ne etew. Ne seini ka inlalag te Magbebaye ne Manama, ka Manama te Israil, ‘In-alam ku sikeykew ne Hari te Israil wey inluwas ku sikeykew puun ki Saul.
8 Imbehey ku keykew ka migharian te ahalen nu wey ka me asawa rin. Inggimu ku sikeykew ne Hari te Israil wey te Huda. Ke deisek pad seini diye te keykew, egtimulan ku pad seini.
9 Mania te ware nu linglingaa ka inlalag ku te Magbebaye ne Manama wey iyan nu inggimu ka mareet kayi te tangkaan ku? Impeyimatayan nu si Uriyas ne Hitihanen te Amunihanen wey in-ahew nu ka asawa rin.
10 Purisu puun kuntee, layun e egmeeg-ehetey wey egpeyimhimatayey ka pamilya nu tenged su indali-dian a nikeykew wey in-ahew nu ka asawa ni Uriyas ne Hitihanen.’
11 Ne migkahi pad man‑e ka Magbebaye ne Manama, ‘Due sakup te pamilya nu ne egsamuk keykew. Te mata-mata nu mismu, egkuen ku ka me asawa nu wey igbehey ku diye te senge-etew. Ne egguliran din ka me asawa nu wey egkakita-kita te me etew.
12 Nakasale ka te heles de, piru seini se eggimuwen ku keykew, egkakita te langun ne matig-Israil.’ ”
13 Ne migkahiyan ni Dabid si Natan, “Nakasala a te Magbebaye ne Manama.” Ne ingkahiyan ni Natan si Dabid, “Impasaylu e te Magbebaye ka sale nu wey kene kad egpatey.
14 Piru tenged su ka inggimu nu iyan egpuunan ne nalemetan ka Magbebaye te me kuntere din, egkapatey ka anak nu ne lukes.”
15 Ne mig-uli e si Natan.
Ka pegpatey te anak ni Dabid
Ne impareralu e te Magbebaye ne Manama te mangune-kune ka bate ne anak ni Dabid ki Batsiba ne balu ni Uriyas.
16 Purisu migpeyid‑u-hid‑u si Dabid te Manama para te bate. Ne migpuasa sikandin wey miggipanew, wey diye sikandin miggibat te tane te tagse marusilem.
17 Ne migparani kandin ka me upisyal te baley rin eyew egpeenawen sikandin piru migkene-kene sikandin wey ware migkeen duma kandan.
18 Te igkapitu ne aldew, namatey e ka bate. Naaldek ka me suluhuanen ni Dabid ne egnangen kandin te napatey e ka bate su migkahi ma sikandan, “Te neuyag pad ka bate, migpakiglalag ki kandin piru ware ki nikandin pammineha. Purisu egmenuwen te naa te egnangen te migpatey e ka bate? Kema ke egdereetan din ka lawa rin.”
19 Piru te pegkakita ni Dabid te migmana-naasey ka me suluhuanen din, nasabut din ne namatey e ka bate. Ne mig-inse si Dabid te me suluhuanen din, “Migpatey e ka bate?”
Ne migtabak sikandan, “Uya, migpatey e sikandin.”
20 Ne mig-enew si Dabid puun te tane wey migpamanihus e sikandin, migpamaluhu te lana, wey mig-ilis. Ne miggendiyad sikandin te balungbalung te Magbebaye ne Manama wey migsimba sikandin diye. Te neimpusan e seeye, mig-uli e sikandin, wey migbuyu e te egkakeen. Ne insesendaran e sikandin, wey migkeen e sikandin.
21 Ne mig-insaan sikandin te me suluhuanen din, “Mania te iling due ka inggimu nu? Migpuasa ka wey migsinehew te neuyag pad ka bate piru te migpatey e ka bate, mig-enew kad wey migkeen!”
22 Ne migtabak sikandin, “Taheed te neuyag pad ka bate, migpuasa a wey migsinehew su nakasuman-suman a ne kema ke egkeyid‑u red ka Magbebaye ne Manama keddi wey kene din igtuhut ne egpatey ka bate.
23 Piru kuntee te migpatey e ka bate, mania te egpuase e pad? Egkeuyag ku naan pad sikandin? Egpakasundul a kandin keureme piru kenad iya sikandin egpakalibed keddi.”
Ka pegkeetew ni Sulumun
24 Inliwang ni Dabid si Batsiba ne asawa rin wey migguliran din sikandin. Ne mig-anak si Batsiba te lukes ne ingngaranan ni Dabid ki Sulumun. Ne inggeyinawaan te Magbebaye ne Manama si Sulumun.
25 Ne migpeuyan ka Magbebaye te lalag pinaahi ki Natan, ka prupita, ne egpangaranan ka bate ki Hididiya su inggeyinawaan sikandin te Magbebaye ne Manama.
Naahew ni Dabid ka Raba
(1 Kru. 20:1-3)
26 Ne migpakiggira si Huwab diye te Raba, ka siyudad te me Amunihanen wey naahew rin ka siyudad ne in-ugpaan te Hari.
27 Ne migsuhu si Huwab te me etew wey impakahiyan din si Dabid, “Migpakiggira a kayi te Raba wey naahew ku ka sebseb ne egsaksakuhan dan te weyig.
28 Purisu libulunga nu kuntee ka nahaat ne me etew wey lusuri niyu ka siyudad wey ahawa niyu seini. Su ke kene, sikeddiey e ka eg-ahew te siyudad wey egngaranan ku seini te ngaran ku.”
29 Purisu inlibulung e ni Dabid ka nasame ne me etew wey miggendiyad te Raba. Ne migpakiggira sikandan diye wey naahew ran seini.
30 Ingkuwa ni Dabid ka bulawan ne kuruna puun te ulu te Hari te me Amunihanen wey ingkukuruna rin e seini. Ne me tatelu ne pulu wey lalimma (35) ne kilu ka kabehat, wey due me mahal ne batu kayi. Ne masulug ka kasangkapan ne nakuwa ni Dabid te seeye ne siyudad.
31 Ne impandakep din e ka me etew te seeye ne siyudad wey inggimu rin sikandan ne talaggabas, talagpiku, wey talagpangguley wey impepangimu rin degma sikandan te tisa. Ne iling ded ka inggimu rin te seeye se me etew diye te langun ne bariyu te me Amunihanen. Ne nanguli e ensi Dabid wey ka langun ne etew diye te Hirusalim.